Read Ninia Yali ROMA 11 Bible Online

ROMA 11 - Ninia Yali bible

ROMA 11

¹ Aireg ma, an wene eke hein og-hesa. Allah en omaliki endam momal-enepfag anyo mundoho fotog-esasi behep? Mun eleg. An oho nebe Israel on, Abraham omba nunggul unuk Benyamin on welahi.

²O atam at Allah en omaliki momal-enepfag on mun fotog-esasi fug. Ap homi Israel on siag duruk katfag ma, enowarukwag ulug, at Elia en Allah hweag-etfag anyo Allah wene lisu baleg anyo henelukdeg.

³ Elia en uruk kwit, “Hat hawene hweag-esauk on nabi omano enowareheg, hat hobahet foruk on yaldukmu buhundeg anyo meiyal-heg feheg, duruk kweleg famen, an namu neg fotog-neausa ma, ketia mun nowarukoho lit, duruk, Nakni,”

⁴ ulug, hweag-etfag ma, at Allah en nanggoho hweag-etfag behep? Eleg. Allah en hweag-utuk kwit, “Ap enebe 7.000 kembu Dewa Baal mot-duruk eleg en, inili oko fahat-enesug lahi,” ulug, hweag-etfag.

⁵Ai debag hag ketia Allah enelaheg boruk kwit, foma dorangge neg en-enepfag ma wereg.

⁶Allah en it en-enepfag ai, it fano duruk esalug, en-enepfag fug. Ite, enelaheg bebagdeg en-enepfag. At Allah en en-enepfag ai, it fano debag fam en-eneplep man, enelaheg boruk kwit, en-enepfag anyo seiale belep.

⁷Ai halug, it Israel fano debesebag anyo, nanggoho behep? It Israel on humdoho anyo en, “Nit fanoapdoho nenobahaukwag ulug, nangginuk?” ulug, duruk men, debesouk fug angge welatfag famen, it foma dorangge en-enepfag anyo neg fanoe fesebagdeg, ne, it foma humdoho enenda omamne apdoho fesebag.

⁸ Ap eke en Allah wene endam uruk kwit, “Inil heheg, enesanggo holeheg, duk no ulug, enepe wongdoho fesesi mu, wereg,” ulug, ebag ale Allah wene lisu baloho febag.

⁹ Wene ai higitdoho, at Daud en uruk kwit, “Aben bak warukwag ulug, sapna kahalduk hag, it soni humon esetuk ai fam, enonggwareg enowarukwag ulug yep-dauk mu, enebe enowareheg, dungdoho wambeheg, dukwag.

¹⁰Inil ha no ulug, mum aheg anggin on enummu sahalireg welaheg, deg lamag,” ulug, Daud en ebag.

¹¹Ai halug, ap homi kwe lauk kwit eneyog unggum dungdoho wat-dauk hag, it Israel on en siag atfag ai, ai fam mun siahap-dowag ulug, debesebag behep? Eleg. Ite, Yahudi on Allah wene sahalfag ai fam Allah en it dagma holduk eleg on enahap wendatuk mu halug, iren, “Nit oho airoho wa on famen duruhuk aho!” boukwag ulug, debesebag.

¹²It Yahudi on siag deheg, Allah wene sahaleheg, duruk katfag ma, Allah en fotog-esebagdeg, it di ap homi su ap homi dagma holduk eleg on fanoapdoho feseruk ai fam, it ap homi Yahudi on enenda furebahat-dalug Allah inim hun amuhup halug, ketia dorangge fanoapdoho nenobaharuk famen, fobik it ninim hun-nenebuhu anyo neg de, alongdoho neg nenebuhu.

¹³Ne, ketia hit dagma holduk eleg on wene eke hweag-hesa. An hit dagma holduk eleg on wene hweag-hesauk kamag ulug, mon-enepuk on rasul unduhuk nobahasi mu, an neyabuk unduhuk nobahasi ai, mun leho boruk kwit, duruk karuhuk.

¹⁴Hit an wene hweag-hesauk kahi anyo wauk mu hesalug, it an nowe naut Israel on anyo en, “Nit nunggwelug fotog-nesalug, it neg hweag-esauk aho?” bolug, enenda demdoho bohup mu, Allah enahap wendarukwag ulug, hit hweag-hesauk kahi.

¹⁵At Allah en Israel on fotog-esebag ma, di ap homi su ap homi dagma holduk eleg on seberoho og-enepsi mu, it fotog-esebag anyo og-enepuk halug neg de, nangginoho og-enebuhu boruk kahep? Eleg. Ap homi waratuk on hag eleg atuk mu, hweag-eneplug, enenda enahayeg fam ding-dangdoho og-enepuk hag, fobik it airoho og-enebuhu.

¹⁶Roti kuroho foma Allah obahet foruk halug, ebe abirangge Allah obahet foruk. Ne, e indip Allah angge wereg halug, enggik onggombi abirangge Allah angge wereg.

¹⁷E zaitun ebe on ap homi en yatuk on anyo enggik kisiloho hwik-esalug, obalma dagma amu wilibig on indip fam hundi feik waharuk halug, ahalue ilonggoma lauk kwit, mun ulog-ulog laharuk hag, hit dagma holduk eleg on famen, airoho welamuhup en, Yahudi enobalma hundi henobahaik wahasi.

¹⁸Aireg ma, “Hiren it enebe e enggik kisilig on hag ai fahet, It siag, nit fano,” ulug, leho fahat-da fug. E indip en enggik olugap duruk. Ne, e enggik en indip olugap duruk eleg ai hag, it indip on en de hit enggik on olugap henepuk.

¹⁹Airoho ihi famen de, hiren uruk kwit, “Allah en nit e indip fam hundi nenobahaikoho lit, it kisiloho hwik-esebag ai,” ulug, uruk kahep ane?

²⁰Airoho uruk kahep halug, ai demdoho famen, it demdoho boruk eleg esalug, kisiloho hwik-esebag famen, hit neg de demdoho boruk kahep fam hundi henobahasi mu wereg lit, leho fahat-da fug. Mundoho henakoldoho wereg nu.

²¹E enggik atam wilipsi hag, it ap Yahudi on famen, Allah enelaheg bouk eleg angge kisiloho fesebag ma, hit oho kisiloho henobahaku eleg ma ulug, uruk kahep?

²²Eleg. At Allah enda sakoreg fam debeseheg, olok fam debeseheg, duruk anyo furebeiyek! Ap homi siag duruk esalug, olok enobam feseruk famen, at enda sakoreg fam hinim hundig wereg lahep ale ai furebelug duruk kamuhup halug neg de, at sakoroho henobaharuk karuhu. Ne, hit henolok neg deg lit, dil lauk halug, hit oho Allah en kisiloho hwik-hesahu.

²³Ne, it Israel on demdoho boruk eleg esalug, fotog-esebag famen, ai en, demdoho boruk esalug, enobalma hundi feseik waruhu fug behep? Allah en hundi feseik wam alereg ma, hundi feseik waruhu neg.

²⁴Hit dagma on anyo, e zaitun amu wilibig on e enggik kisilig hag famen, ap homi en yatuk on anyo dagma on inim hundi fouk fug alereg kweleg, hundi henobahasi. Ne, it Yahudi on ai, ap homi en yaho on hag deg ma, e enggik kisiloho hwik-esebag anyo at on deg ma, obalma hundi feseik waruhu ai, anggindeg ma, ulug, uruk kahep? Seroho hundi feseik waruhu, boruk kamul.

²⁵Nori, nerekwi. Hiren, “Mundoho nenelukdeg,” ulug, henenda leho fahat-dehep ha no, wene eke Allah endama wereg on heneluk amluhup en hweag-hesa. Allah en Israel on enenda haroap debesebag ai, mundoho debesebag fug. Ite, fobik it ap homi dagma on, “Diroho og-enebuhuk,” ulug, wenako feseik waruhu li em, it Israel enenda haroreg wereg anyo sako apdoho fesehu.

²⁶ Airoho duhu ulug, at Allah wene uruk kwit, “It ap homi Israel enesiag elehapdoho femin ulug waharuk kwit, it ninim wene balik waruhu ai, fobik enahap wendatuk on o Sion enenggalegman wilibik waruhureg, it Yakub ombasi on at mundoho enesiag elehapdoho fesehu” ulug, lisu baleg higitdoho it Israel on mundoho enahap wendat-enebik waruhu.

²⁸It ap homi Israel on anyo en, “Fano Wene wauk ale nenerim,” ulug, embeseruk mu, Allah inim minggirig wereg fam, hit dagma holduk eleg on Fano Wene wauk kahep famen, Allah en Israel on momal-enepfagdeg, it ap Abraham inim, Ishak inim, Yakub inim, wene sali wat-esebag anyo famen neg de, inim enenda hundig wereg.

²⁹At Allah en momaloho fanoapdoho fesehuk ulug, wenggelduk ale re, fobik enda amu on eke wenggeleheg duhu fug.

³⁰Hit dagma holduk eleg on oho, atam Allah ele melaleg kweleg, amu on duruk katuhup famen, it ap homi Yahudi on Allah wene sahaloho embesebag ai famen, hit henelaheg bebag.

³¹Ne, ketia it Yahudi on Allah wene sahaloho folug, amu on duruk famen, Allah en hit dagma on henelaheg besi ai fam, it inim enelaheg bohu[15] hauk kahe.

³²Nit Allah wene sahalduk kahe on mundoho siahap nenobahaukwag ulug, ap hetdoho feseruk hag, nit airoho hetdoho nenobahasi fug. Ite, nenelaheg boruk ale neneluk amag ulug, nenobahasi.

³³ Allah enda wereg neg en di wene su wene olukdeg ma, angge dindikdeg kweleg, fanoap nenebil wilibik waharuk mu, along deg. At enda wenggele folug, wene kong-duruk ale niren furebehe halereg behep? Ne, at duruk ale nit neneluk am alereg behep?

³⁴ Eleg. Wene ai fahet endam Allah wene lisu diroho balfag. “Nenakni Allah enda boruk anyo, nenelukdeg ma, ulug, uruk kahep? Ne, nit nenenda boruk kahe anyo dukwag ulug, Diroho din, airoho din, ulug, Allah komoruk ale fano behep? Eleg.

³⁵ O endam en ketia hwili fam nit eke en Allah onggo higitdoho og-nomag bolug, di angge su angge og-utuk on, sa mel?” ulug, lisu baleg higitdoho at endan bolug duruk anyo, nit nenapelegdeg lahe.

³⁶ Di angge su angge aren neg wal-debagdeg hwalduk mu, ne, mundoho at obahet neg wereg ma, Allah mundoho mundoho motdeg neg welamag! Amin!