Read Ninia Yali ROMA 13 Bible Online

ROMA 13 - Ninia Yali bible

ROMA 13

¹It di ap su ap wene melaloho hweag-hesauk ai, Allah en fano boruk kweleg, unduhuk feseruk mu, it pemerintah fahat-henesug wereg ai, Allah en neg alongap debeseruk mu, enele hweag-hesauk halug, furoho holduk kamek.

²It pemerintah enap enele sahalduk halug ai, at Allah en alongap debesesi on ai neg enele sahalduk. Enele sahalduk halug, ap homi airoho duruk on ai it enonggwareg en siahap-dauk.

³Aireg ma, it pemerintah fahat-henesug enap ai, it ap homi fano duruk on en enakol boukwag ulug unduhuk wereg fug. Ite, it siag duruk on anyo en enakol boruk kamag ulug unduhuk wereg ma, hit henakol eleg hesangge neg noruk kamuhuk boruk kahep halug de, fano neg dil lauk kamek. It pemerintah enap ai, Allah amingming angge wereg lit, hit fano neg welamuhup ulug, duruk mu re, fano neg dil noruk hesalug, enenda enahayeg henobam foruk kamuhup. Ai famen, hit siag duruk hesalug neg de, sabu het-henepuk kamag ulug, Allah amingming angge it pemerintah enap unduhuk wereg ma, hit henakol boruk kwit, enalong boruk kamuhup. Ap homi siag duruk esalug, Allah olok en siag onggo enebuhuk boruk anyo, it anyo en debeseruk kamuhup.

⁵Aireg ma, it enele furoho neg holduk kamek. Allah olok en henowaruk no, ulug, henakol en holduk kamuhup neg de fug. Ite, henendaman oho, “Siag duk ale ousa,” ulug, wenggel-hesauk mu, holduk kamek.

⁶ Ai fam it pemerintah enap anyo fahat-nenesug wereg lit, Allah amingming angge wereg ma, iren, “Onggo diroho feiyek,” ulug, hweag-nesauk halug, foruk kahe.

⁷Di on su on fahet, “Airoho feiyek,” ulug, melal-henepuk halug, feheg, it mundoho enanggilug boruk kwit, sebe eheg, duruk kamek.

⁸Henombaleg angge deg lam fug famen, we nelaheg-helaheg neg duruk kamek. Ai duruk fam, wene melaleg Allah en Musa hweag-etfag wene higitdoho duruk kamuhup.

⁹ Allah en uruk kwit, “Hit homi baluk fug. Henolok en ap binggi enowaruk fug. Yoholi angge herahauk fug. Ap enangge henambono bouk fug,” ulug, di wene su wene mundoho melalfag anyo uruk kwit, “Henebe henenda hundig dauk kahep anyo hag, it hinim welahep on ai airoho henenda hundig enepuk kamek,” ulug, melalfag wene seberoho su fam neg wereg ma halug, hweag-hesauk kahi.

¹⁰It hinim welahep on henenda hundig enepuk kahep halug, siahap debesehep ha fug alereg. Ite, nelaheg-helaheg enepuk kwit, at Musa en ebag wene mundoho higitdoho duruk kahep.

¹¹Airoho duruk kamuhup ai re nunggwelug? Nenahap wendaruhu anyo yatdeg hag deg kweleg, demdoho boruhuk famen, ketia neg de mun horog aik wahasi mu, hit foma nohoruk hag welahep on heneluk atlug duruk li aik wahasi henelukdeg.

¹²O mum eleg atuk eleg kweleg, o hil yingguruk ale mun horog aik wahasi mu, o mum fam wereg lit duruk hag, dil noruk ale anyo embeselug, o sekan duruk mu, seleg fam dog abukoho, sehen, fit inim fik-fouk debelug enepe hebeloho wereg anyo hag, nit seleg on oho folug, nenepe hebeloho welamul.

¹³Yunggul hesangge duruk kwit, homi hesangge sen-enebeheg, ahalue omamne on homoroho nauk kwit, wenenebo hag deheg, enenda nauk halug neg de, hesangge dil laheg, nerim-herim il laheg, dil lauk kamuhuk fug. Ite, o nukoho angge duruk hag, nit airoho duruk kamuhuk.

¹⁴Hit henenda endam on en siag duk ale henepuk halug neg, duruk kam fug. Ite, enesehen enebit wauk hag Tuhan Yesus Kristus obabut wakiyug.