Read Ninia Yali ROMA 14 Bible Online

ROMA 14 - Ninia Yali bible

ROMA 14

¹ Henori henerekwi enenda Allah fam dip-deberuk famen, enenda owan wirik atuk eleg on en, “Diroho duk on, airoho duk on,” uruk halug, bet-enebuk fug angge, og-enepuk nu.

²Ap eke en demdoho bolug, “Di angge su angge we hesangge ninggi ha alereg,” bolug, nauk famen, at eke en enda demdoho boruk on anyo owan wirik atuk eleg ma, “We siburu yerumingga neg nauk fano,” bolug, nauk.

³At di angge su angge hesangge nauk anyo en, at we siburu yerumingga neg nauk anyo siahapdoho folug, abug baluk fug. Ne, at siburu yerumingga neg nauk anyo en oho, at hesangge nauk anyo Allah en, “Ap su oho an nomalik,” ulug, uruk mu, abug baluk fug neg.

⁴Hiren ap amu on eke amingming angge wereg kweleg, “Hat siag,” ulug, hweag-om ale fano behep? Amingming angge fano duruk halug, leho feheg, ne, siag duruk halug, sebele feheg, duruk ai, at akni en neg duruk famen, at Tuhan let-hauk halug neg de, fano duhu mu, akni en leho fohu behi.

⁵It foman, “Su salim de, di angge su angge duruk ale ousa,” eheg, ne, it foman, “Di salim su salim higitdeg neg,” ulug, eheg, uruk mu, hit henendan neg furoho wenggele folug duruk kamek.

⁶Hit foman, “Yoho su salim, di deheg su deheg, duk fug,” ulug, uruk kahep ai, “Tuhan neg mot-duruk kamul,” ulug, uruk kahep ai halug, fano uruk kahep. Hit foman, “Di angge su angge we hesangge nauk kamuhuk,” boruk kahep ai, Allah dang-dulug nauk kahep ma, Tuhan mot-duruk kwit nauk kahep. Ne, hit foman, “Hesangge nauk kamuhuk fug, ite, we siburu yerumingga neg nauk kamuhuk,” boruk kahep ai oho, Allah dang-dulug nauk kahep ma, Tuhan mot-duruk kwit nauk kahep.

⁷Ai duruk kahe ai, nenebe abirangge neneluk inim, waratuk kahe inim ai, nit nenonggwareg fahet neg duruk kahe fug.

⁸Neneluk welamuhuk halug ai, Tuhan obahet neg welamuhuk. Ne, waramuhuk halug ai, at obahet neg waramuhuk mu, waratuk halug, neneluk wereg halug, Tuhan obahet neg.

⁹At Kristus anyo waratsireg oluk atlug inatsi ai, it waratswa inim, nit nenoluk welahe on inim, nenobahet Tuhan welaikoho disi.

¹⁰ Aireg ma, nori nerekwi. Nit nenebe hundomog fobik Allah il hanim en nenewene bilingguhu famen, hit henori henerekwi hinim henenda Allah fam dipdeg lahep on ai nunggwelug siahap debeseheg, henendaman seramap debeseheg, duruk kahep?

¹¹ Eleg. Allah en hweag-utuk kweleg, ap eke en uruk kwit, “An noluk neitog welahi mu, di ap homi su ap homi mundoho napma sebe ulug, mot-napuk kwit, Allah hat neg, ulug, fagdoho hweag-numuhup, ulug, an henakni Allah en hweag-hisihi,” ebag ale Allah wene fam lisu balfag ma,

¹²nit mundoho nenemu hundomog en, “Diroho duruk katuhuk,” ulug, Allah fagdoho hweag-umuhuk.

¹³Airoho duhuk mu, hiren henori henerekwi Allah obam dip-deberuk on siahap debeseruk kamuhup fug. Ite, hit duruk fam, yoma debeseheg, kwe bale feseheg, debesehep ha no, “Furebahat-dauk kamul,” ulug, henenda wenggelduk kamek.

¹⁴Di angge su angge nauk on ai re, ebe ousa fug, ulug, an Tuhan Yesus inim hundig lit, noluk. Fureberihik famen de, at eke endaman, “Ai on ousa. Ninggi ha fug alereg,” boruk halug de, at fahet na fug alereg.

¹⁵Henori henerekwi en na fug alereg boruk kweleg, hit nauk fam enenda wat-dauk halug, “Enori enerekwi enelaheg bouk fug angge wereg lit, nauk mu, esehe,” bohup. Aireg ma, Kristus mundoho enobahet waratsi mu, hit nauk fam henori henerekwi siahapdoho fesouk fug.

¹⁶Ap eke Allah apma wereg lit, di angge su angge nenggeg, embeseheg, duruk ai, ebe along fug. Ebe along de, Allah Aheime endama wereg lit, Allah enda boruk ale higitdoho deheg, enda seroho welaheg, ahayeg beheg, duruk ai en de, hat hendaman de, “An fano duruk kahi,” boruk kahen famen, it ap homi eke en habug siag uk no ulug, airoho duruk kam fug.

¹⁸Wene su higitdoho Kristus obahet dil lauk kwit, furoho duruk halug, Allah en ahayeg beheg, it ap homi en airoho, “Fano duruk,” ulug, beheg, duruk kamuhup.

¹⁹Ai halug, ap homi enenda misig seberoho feseil laheg, ap homi enenda aho wat-wat aheg, duhup wene ai on halug neg[17] furoho duruk kamuhuk.

²⁰Di angge su angge nauk anyo fam at Allah en enebil lauk anyo sebeloho fouk fug. Di angge su angge nahup ai, siag fug, nahup fano neg famen, nauk kahep fam henori kwe baloho feseruk halug, siag duruk kahep ai.

²¹Henori henerekwi enenda owan wirik atuk eleg on siahapdoho fesehep ha no, hit wam lenggareg nauk kahep inim, e anggur anggen ahalue nauk kahep inim, di angge su angge duruk kahep mundoho duk fug angge bok welamuhup fano.

²²Hit henenda mun wirik atuhup on anyo en, “Duruk kamuhuk fano,” boruk kahep ai, henendaman, “Nit Allah il hanim neg duruk kahe,” bolug, duruk kamuhup fano. Ne, “Duruk kamuhuk fano,” bolug, duruk kwit, henenda firig wereg lit, duk fug. Ite, henenda henahayeg wereg lit, duruk kamuhup fano.

²³Airoho famen, hit nauk kahep ai, “Su nauk fano,” ulug, henendaman demdoho bouk fug angge, ite, “Nauk fano a, siag ane?” ulug, henenda yeik balduk kwit, nauk kahep halug, Allah en “Hit siag,” ulug, wene henobam foruk. Ne, henendama demdoho bouk fug angge duruk kahep ai, Allah il hanim siag duruk kahep.