Read Ninia Yali ROMA 15 Bible Online

ROMA 15 - Ninia Yali bible

ROMA 15

¹ Nit atam nenenda wirik atuhuk anyo en, “Nit neg fano daul ulug noruk kamuhuk,” ulug, boruk kamul fug. Ite, nenori nenerekwi it enenda owan wirik atuk eleg on anyo enenda anggin boruk mu, enenda wirik amag ulug, aho ware feseruk kamul. Allah wene baleg fam uruk kwit, “It ap homi hat siahap-biahapdoho henggali ware hobaharuk kwit, an oho nenggali ware nobahausa,” ulug, lisu baleg anyo higitdeg, Kristus kwenangma suma wereg lit, at onggwareg fahet neg dil lauk katsi fug. Ite, ap homi enenda enahayeg boukwag ulug, debeseil lauk katsi mu, nit oho ninim welahe anyo, enenda wirik amag ulug, higitdoho debeseruk kamul.

⁴Allah wene baleg abirangge ai fam de, nenenda hambukdoho welaheg, nenenda fano aheg, atuk kwit, Allah fam ebereg welamag ulug, nit komoroho Allah wene fam lisu baloho febag ai.

⁵Hit demdoho boruhup anyo henenda hambukdeg lit, foroho welamuhup ulug henebeheg, henenda aho ware henobahakeg, duruk ale indip onggwareg Allah en, Kristus duruk katsi anyo higitdoho, hit airoho henenda misig atlug, seberoho welamuhup ulug henebukwag.

⁶Henenda misig atlug, seberoho wereg lit, hit mundoho henele seberoho Tuhan Yesus Kristus akni Allah leho foruk kamuhup, ulug, hweag-hisihi.

⁷Ai halug, nit Allah leho foruk kamag ulug, Kristus nenelaheg en og-nenepsi anyo hag, hit hit og-og atuk kamek.

⁸At Allah en nenombasi Yahudi on abug hweag-esebag anyo higit atuk boukwag ulug, at Kristus anyo, it Yahudi enobahet duruk kamag ulug, enenggelegma endag-atsi.

⁹ Ne, it neg enobahet ulug fug. Ite, it dagma holduk eleg on en, “Nit oho Allah nenelaheg boruk mu hehe,” ulug, Allah unuk leho foruk kamag ulug, inim enobahet duruk kamag ulug, endag-atsi mu hehe. Allah en hweag-utuk kweleg, Daud en uruk kwit, “An den it ap homi dagma holduk eleg on enenggelegman hat leho hobahakeg hat duruk kahen ale suni wilipuk kwit, mot-habeheg, duhuk,” ulug, ebag ale lisu baleheg,

¹⁰ ai en, eke salim fam at eke en uruk kwit, “Hit ap homi dagma holduk eleg on su, Allah omaliki momal-enepfag on hinim henahayeg boruk kamek” ulug, lisu baleheg,

¹¹ ai en, at eke en uruk kwit, “Hit dagma holduk eleg on inim, hit di ap homi su ap homi inim, mundoho at unuk neg leho foruk kamek,” ulug, lisu baleheg,

¹² ne, fobik at Yesaya en hweag-esauk kwit, “Ap Isai ombasi saha uhup fam endag-atuk halug, Allah en it dagma holduk eleg on apma fesoukwag ulug, unduhuk fohu. Di ap homi su ap homi mundoho enenda at obam ebereg welamuhup,” ulug, lisu baleheg, debag ai fam, ap homi dagma on inim enobahet duruk kamag ulug endag-atsi mu hauk kahe.

¹³Allah Aheime omamne fam henendama henepuk kweleg, henenda ebet-ebet welamag ulug, henepuk indip Allah anyo en hit at obam dipdeg lahep ai fam, henahayeg henebeheg, henenda seroho henobahakeg, duruk kamag.

¹⁴Nori, nerekwi. Hit henenda mun fano di ale su ale mundoho henelukdeg lit, “Hit hit en, at eke hweag-ereheg, duruk kahep halereg,” ulug, demdoho boruk kahi.

¹⁵Ai famen de, an Kristus Yesus amingming angge atihik anyo en it ap homi dagma holduk eleg on Fano Wene hweag-esa lowag ulug, Allah en nelaheg bolug unduhuk nobahasi mu, wene foma hweag-hisihi anyo, hit ebetuk kamuhup ulug, nakol eleg angge wereg lit, lisu bal-hisihi, nori, nerekwi. Endam ap imam anyo en fano on halug eneko Allah fahet waroho og-utuk halug, wauk katfag hag, an airoho it ap homi dagma holduk eleg on Fano Wene hweag-esauk nealug, Allah Aheime en eneko feseruk halug, Allah en og-enebukwag ulug, hweag-esauk ale fahet unduhuk nobahasi.

¹⁷Airoho deg ma, Kristus Yesus ninim hundig lit, Allah obahet dil lauk kahi mu, nawonog ahi halereg.

¹⁸Nenda seroho uruk kahi ai, it ap dagma on Allah wene demdoho bolug wowag ulug, an den Allah wene hweag-esauk kweleg, at Kristus en, wene anyo fam inim, duruk katihik ale fam inim, Allah Aheime omamneap napuk kweleg, enenggelegma enakol wereg on deheg, duk fug ale on deheg, duruk katihik anyo fam inim, Kristus en neg debeseruk katsi mu, uruk kahi. Ai dil lauk kwit, o Yerusalem alukwe fil ambol fil etman o Ilirikum hwili Fano Wene Kristus duruk katsi wene, di o su o furoho hweag-isil lauk katihik.

²⁰ An dil lauk katihik ai, Allah wene fam uruk kwit, “It Allah wene enepeleg wongdoho welatswa anyo inil heheg, it holuk fug angge welatswa anyo enenda furebeheg, duhup” ulug, lisu baleg anyo higitdoho, ap eke en o anduli belapuk mu, ap eke amu on o ebe wutuk anyo hag, an Kristus wene it ap amu on en hweag-esausa on holswama etma, ekenim hweag-esa lahuk berihik fug. Ite, Kristus unuk mun enapeleg weregma etma hweag-esa lahuk berihik.

²² An ap owan holduk eleg on neg hweag-isil lahuk berihik mu, hweag-isil lauk kweleg, hesa wam fug ale atuk en,

²³o suma hweag-isil lahuk berihikmu etano mun hweag-isil laheg, esa lahuk boruk kweleg, tahun humdoho deheg, duruk katihik mu, ketia neg de

²⁴o Spanyol lahuk berihik mu, lauk kwit, kumu hisil waharuk nealug, etma ninim nenenda nenahayegdoho welamuhukdeg mon-nabuhup en hesa waruhuk.

²⁵ Ai famen, it ap homi Yesus omaliki o Makedonia on mel Akhaya on mel enenda wenggele folug, enengge andogdoho, it ap Yesus omaliki enenggik eleg on foma o Yerusalem wereg on etma enobahet feseswa angge wereg ai en, ketia an den walug o Yerusalem og-esa lauk kahi.

²⁷ Og-esa lauk kahi ai, it ap homi Yahudi Yesus omaliki atswa on en it dagma holduk eleg on fanoap enebukwag ulug, Allah wene og-esausa ma, iren fobik hebeloho di angge su angge enebe fahet let-esa alereg ma, higitdoho airoho enendama wenggele fousareg feseswa.

²⁸Ne, it andogdoho feseswa anyo walug abirangge og-esa lahukdeg, etman o Spanyol lauk kwit, hit kumu hisil waruhuk.

²⁹Hesa waruhuk ai fam de, at Kristus ahayeg humdoho henobam henobahaik waruhuk demdoho boruk kahi.

³⁰Nori, nerekwi. Tuhan Yesus Kristus ai at ulug, nit nit nenda-henda hundig welamag ulug, Allah Aheime en nenepuk anyo fam, an nobahet de ninim somban nenebiroho uruk kamuhuk en, heng-henebihi.

³¹Somban uruk kwit, it ap homi o Yudea on enenda Yesus obam dip-deberuk eleg on en, nebe sen-nabuk no ulug, Allah en del-napuk kamag ulug inim, ap homi Allah omaliki o Yerusalem on fahet andogdoho feseswa on ai walug og-esa lauk men, fano hwelowag ulug inim, nobahet somban uruk nu.

³²Airoho duruk kweleg, o Yerusalem lalug en, at Allah endama fano boruk halug de, an nahayegdoho henekit waruhuk. Waruhukdeg, hit hinim wereg lit, kel wat-dauk kwit, nenda yuwag aruhu.

³³Ne, wene ai mundoho hweag-hisihi mu, at nenenda hambugap nenepuk on Allah anyo en hit mundoho fahat-henesug lamag. Amin.