Read Ninia Yali ROMA 16 Bible Online

ROMA 16 - Ninia Yali bible

ROMA 16

¹Nit nenerek hwele Febe ai en Yesus omaliki o Kengkrea kabogdeg on enobahet duruk mu, hit henelukdoho hweag-hesa.

²At hwele ai en ap homi humdoho let-enepuk kwit, an oho let-napuk katsi mu, henekit watlug wereg ma, at angge eke eleg ma halug, let-heheg, ne, it Yesus omaliki en enori demdoho boruk on anyo dangdoho og-enepuk ale deg ma, “Hwele ai Tuhan demdoho besi mu, at oho niron,” ulug, weheg, diyug.

³ Akwila ohwe Priskila inim, an ninim higitdoho Kristus Yesus obahet duruk katuhuk on deg ma, “Dang-henepsi,” ulug, hweag-esakiyug.

⁴It ai an del-napul ulug duruk men, waralep ma, “Nendan e!” ulug dang-enepuk kahi. Ne, ai an den neg dang-enepuk kahi fug. Ite, Yesus omaliki dagma on ninim en dang-enepuk kahe.

⁵Ne, it Yesus omaliki it Priskila inim Akwila inim enobam kabog-duruk on inim, “Paulus mel en dang-henepswa,” ulug, hweag-esakiyug. Ne, at Epenetus nenda on ai, “Aren dang-hapsi,” ulug, hweag-umug. O Asia etma at ai dam enda Kristus fam dip-debesi mu, it eke fobik dip-debousa.

⁶Hwele Maria hit henobahet sehet humdoho duruk katsi anyo, “Aren dang-hapsi,” ulug, hweag-umug at.

⁷At Andronikus Yunias[18] inim, “Aren dang-henepsi,” ulug, hweag-esakiyug. It de an ninim nenunggul unuk misig on ninim nenenggik hele wareg welatuhuk. Ap homi humdoho hag Kristus enayonggo folug mon-enebik wahasi famen de, enunuk leho re it. It dag enenda Kristus obam dip-debousa man, an fobik dip-deberihik.

⁸At Ampliatus ninim Tuhan Yesus inim hundig welahe on nenda hundig wereg ma, “Aren dang-hapsi,” ulug, hweag-umug.

⁹Ne, hat Urbanus ninim Kristus hundig lit, ninim higitdoho obahet duruk katuhuk anyo mel, nare, Stakhis nenenda hundig welahe anyo mel, “Aren dang-henepsi,” ulug, hweag-esakiyug.

¹⁰Ne, at Apeles ai Kristus inim hundig lit, duruk mu obabut nolukdeg ai, “Aren dang-hapsi,” ulug, hweag-ereheg, it Aristobolus eyog indip kwe on ai oho, “Dang-henepsi,” ulug, hweag-eseheg, diyug.

¹¹At Herodion nenunggul unuk misig on ai, “Aren dang-hapsi,” ulug, hweag-umug. Ne, at Narkisus eyog indip kwe wereg on inim ai, Tuhan inim hundig on, “Aren dang-henepsi,” ulug, hweag-esakiyug.

¹²Hit hwelani Trifena mel Trifosa mel Tuhan obahet eyabuk enabiroho duruk on, “Aren dang-henepsi,” ulug, hweag-eseheg, hwele Persis keram et angge Tuhan eyabuk abiroho duruk on ai, “Nendan e, ulug, dang-hapsi,” ulug, hweag-ereheg, diyug.

¹³ At Rufus ai, Tuhan ayonggo fesi mu, yanderuruk ai, at isinga ai, an nisinga hag deg ma, amloho inim, “Aren dang-henepsi,” ulug, hweag-esakiyug.

¹⁴At Asinkritus oho, Flegon oho, Hermes oho, Patrobas oho, Hermas oho, nenori nenerekwi Yesus omaliki it inim wereg on abirangge inim, “Aren dang-henepsi,” ulug, hweag-esakiyug.

¹⁵At Filologus inim, hwele Yulia inim, Nereus at erek inim, Olimpas inim, Yesus omaliki it inim wereg on abirangge etmano inim, “Aren dang-henepsi,” ulug, hweag-esakiyug.

¹⁶Eke re, Yesus omaliki welahep ai, henambilik fam dop-enepuk kwit, dang-dang ail lakiyug, Kristus omaliki di kwe su kwe kabog-duruk on en, “Dang-enebiyug,” ulug, hweag-nutswa ma, dang-henebihi.

¹⁷Nori, nerekwi. Hiren furebelug duruk kamuhup en, an wene su hweag-hesa. Hit wene wauhup anyo it ap homi en wauk ale enerim en embeselug, henenda minggiroho henebil laheg, hit demdoho boruhup on anyo henenda sombandoho henebil laheg, duk no, hinil furoho welamek. It ap ai hinim seberuk fug angge welamek.

¹⁸It ap ai, airoho dil noruk on ai, nenowe Kristus amingming angge wereg lit, obahet dil noruk eleg. Ite, enebe fano welamag ulug, enenda nauk on fahet neg heraril noruk kwit, “Diroho dul, airoho dul,” ulug, enele sakoroho ahalue dep-dep fam seiale it ap enenda hesangge on anyo lal-enebil lauk mu, hinim seberuk fug angge welamek.

¹⁹Hit Fano Wene oho folug, mun higitdoho dil lauk kahep ai fam it ap homi mundoho en holduk mu, nahayeg humon napuk famen, hit henenda wereg atlug siag duruk ale wongdoho wereg lit, fano duruk wene halug neg, dil noruk kamuhup, bolug, hweag-hesauk kahi.

²⁰Ai dil lauk fam nit nenenda seroho welamag ulug nenepuk on Allah anyo en Iblis heneyog apma sebeleg welamag ulug, folo-folo mundoho al bereloho fohu. Tuhan Yesus Kristus[19] nenelaheg en fanoap nenepuk mu, fahat-henesug lamag.

²¹ At ninim Allah eyabuk higitdoho duruk kahe on Timotius anyo en dang-henepuk. Ne, an nori nenunggul unuk misig on Lukius ha, Yason ha, Sosipater ha, iren oho dang-henebehesa.

²²At Paulus en, “Airoho balin,” hweag-nutuk kweleg, lisu su bal-hesauk kahi an Tertius anyo en Tuhan ninim nenenda hundig deg ma dang-henebihi.

²³ An ap Gayus ha waharihikdeg, ninim welahe anyo inim, it Yesus omaliki at obam inim kabog-duruk anyo inim mundoho en dang-henebehesa. It ap homi o kota suma wereg on enobahet uang kabogdeg foroho wereg on ap Erastus inim nenare Kwartus inim en dang-henebehesa. [

²⁴Tuhan Yesus Kristus henelaheg en fanoap nenepuk on anyo en fahat-henesug lamag, ulug, Amin.]

²⁵O endam Allah enda bebag ale ap homi enapeleg heraho welatfag on, ename fesi wene anyo, an den Yesus Kristus disi ale Fano Wene hweag-hesauihik anyo higitdeg ma, ai fam henenda dip-debelug demdoho boruhup fam Allah en henenda hambukdoho henobahauk alereg ma, Allah dang-duruk kwit, mot-duruk kamek.

²⁶Endam wene heraho welatfag famen, ketia at waratuk eleg oluk eitog wereg on Allah anyo en melal-nenepuk mu, Allah wene hweag-esauk katfag on nabi omano en lisu baloho febag fam, di ap homi su ap homi mundoho demdoho bolug, wahupdeg, furoho dil noruk kamag ulug, fag atsi mu, hweag-hesauk kahi.[20]

²⁷At Allah amu enda wereg lit di ale su ale mundoho olukdeg ma, Yesus Kristus disi fam, nit at Allah unuk mundoho mundoho leho foruk kamul, ulug, amin.