Read Ninia Yali ROMA 5 Bible Online

ROMA 5 - Ninia Yali bible

ROMA 5

¹Ketia nenenda demdoho bolug, Allah obam dip-deberuk kahe fam, aren at il hanim fanoapdoho nenobahasi mu, Tuhan Yesus Kristus disi fam nenenda seroho Allah ninim hundig nenoluk welahe.[4]

²Allah enda hundig en onggoleg we og-nesauk ai, nit nenenda demdoho boruk fam hwelowag ulug, nenenda wenggeloho nenobahasi mu, Allah leho wereg hag, nit higitdoho leho nenobahaku ulug, nenenda ebereg lit, nenahayeg hauk kamul.[5]

³Ai fam neg nenahayeg boruk kamul fug. Ite, siahap-biahapdoho nenobaharuk ai fam, nenenda hambukdoho welamag ulug nenepuk nenelukdeg ma, airoho nenepuk kweleg, nenahayeg boruk kamul.[6]

⁴Ne, nenenda hambukdeg lit, wauk kahe ai fam, at Allah en, “Ap su abut balihi famen, enda sakoreg lit wauk mu, fano hihi,” boruk kweleg, at ap anyo en, “Ai uruk fam Allah en og-nabuhu demdoho hihi,” bolug, enda mun ebereg wereg.

⁵Ne, nenenda ebereg airoho welahe halug ai, Allah enda hundig en nenelaheg bolug Allah Aheime og-nesasi ai fam nenenda ebereg welahe anyo higitdoho nenebuhu mu, nenenda firig welamuhuk fug.

⁶Niren dehe ha fug alereg kweleg, Allah en, “Yesus ai salim wararuhu,” ulug, wenggeloho febag anyo salim higit atsi mu, nit Allah fureberuk kahe fug on nenobahet waratsi.

⁷Ap eke ap homi enelaheg bouk fug angge, we wene melaleg halug neg furoho duruk on warukoho duruk halug neg de, ili uk fug ale hag deg kweleg, ap eke ap homi enelaheg en fano neg debeseil lauk anyo, waruk ale duruk halug, at are eke en ili uruk kwit, “At waruk no, an nowariek!” ulug, waratuk ale fahet akol boruk eleg, airoho uk ale fano ane?

⁸Airoho famen, at Allah en neg de, nit siag duruk kahe kweleg, Kristus nenobahet waratsi ai fam, Allah en nenelaheg humon boruk ale hauk kahe.

⁹Ne, ketia at Kristus waratuk kwit amep wilipsi ai fam Allah il hanim fanoapdoho nenobahasi mu, “Fobik Allah en nenahap wendat-nenebuhu fug, olok nenebuhu,” ulug, uruk kahep? Eleg. Nenahap wendat-nenebuhu boruk kamul.

¹⁰Ne, nit Allah ninim minggirig welahe halug, at amloho nenobahet waratsi famen, Allah ninim seberoho nenobahasi mu, ketia ninim hundig welahe anyo, Kristus ebe oluk atsi fam, nenahap wendat-nenebuhu fug ulug, uruk kahep? Eleg. Ninim hundig welahe ma, nenahap wendat-nenebuhu.

¹¹Ai disi fam neg nenahayeg boruk kamul fug. Ite, eke niren Tuhan Yesus Kristus disi anyo fam Allah ninim seberoho nenobahasi mu, “Allah Nenakni,” dang-dulug, nenahayeg boruk kamul.

¹² At ap misig siag debag fam siag duruk ale nit ap homi abirangge nenobam saha ebag. Ne, at siag debag ai fam waratuk ale indip enam atfag ma, nit abirangge siag duruk kahe ai fam, waratuk indip nenobam saha isi mu, waratuk kahe.

¹³Allah en wene Musa owan hweag-utuk eleg kweleg, ap homi en siag duruk katfag famen, wene melaleg owan hweag-om fug angge welatfag ma, it siag duruk anyo, Allah en wenahauk fug angge welatfag.

¹⁴Wenahauk fug angge welatfag famen, at Adam welatfag hwili en bekit Musa welatfag hwili fam, it ap homi mundoho Adam en Allah wene sahaloho folug, siag debag higitdoho, iren airoho debag fug famen, deg kweleg, it inim waratuk indip enobam saha ebag ma, warail lauk katfag. At Adam debag ai, at fobik dil waruhu ale wal-heheg debag.

¹⁵At Adam en Allah ele sahalfag ai, Allah en onggoleg og-nesasi anyo, inim higitdoho fug. At Adam neg en siag debag fam, nit ap homi mundoho waratuk kahe famen, Yesus Kristus amu nenelaheg en nenobahet disi fam, Allah enda hundig en nit di ap homi su ap homi mundoho onggoleg il hanim fanoe nenobaharuk ai neg de mun along!

¹⁶At Allah en onggoleg og-nesasi fam il hanim fanoe nenobahasi inim, ne, Adam en debag fam nenobam saha ebag anyo inim, ai higitdeg fug. Mun amu amu. At Adam anyo nukoho misiham neg siag debag fam Allah en eneko siag onggo debebag famen, nit neg de, hundig-hundig siag duruk kahe ma, eneko siag onggo nenobahalep famen, nenelaheg en onggoleg og-nesasi anyo fam, “Hit fano hisihi,” ulug, hweag-nesauk.

¹⁷Ap misig siag debag fam waratuk indip nit mundoho nenobam saha ebag ma, waratuk kahe ai, demdoho famen, ap misig Yesus Kristus en disi anyo neg de, mun along disi mu, at disi fam Allah enda hundig en nenelaheg boruk kwit, il hanim fanoapdoho nenobahaikoho, onggoleg og-nesasi anyo wauk nesalug, waramuhuk behep? Mun eleg! Nit mundoho neneluk wereg lit, nenomamneroho welamuhuk.

¹⁸Ai halug, at Adam en Allah ele sahalfag fam, nit ap homi mundoho siahapdoho nenobahabag ai hag, at Yesus en Allah ele hole folug higitdoho disi fam, nit ap homi mundoho neneluk welamag ulug, Allah il hanim fanoapdoho nenobahasi.

¹⁹At Adam anyo Allah en hweag-etfag ale higitdoho debag fug, siag debag fam, nit ap homi mundoho siag duruk katuhuk ai hag, ketia oho airoho at Yesus en Allah ele furoho disi fam, nit ap homi mundoho Allah il hanim fanoapdoho nenobahaikoho disi mu, hauk kahe.

²⁰At Allah en, “Diroho diyug, airoho diyug,” ulug, melaloho hweag-esebag anyo, hole folug enolok en, “Nenerim,” ulug, sahaloho feil lebag ma, siag humon dil lauk kweleg famen, Allah en enelaheg humon bebagdeg enda hundig en fanoap enebil lauk katfag.

²¹Siag dil lauk katfag fam, waratuk indip nenobam saha ebag anyo hag, ketia Tuhan Yesus Kristus en disi fam Allah il hanim fanoapdoho nenobahalug, mundoho nenoluk welamuhuk ulug, Allah enda hundig en nenepuk wene anyo nenobam saha isireg wereg.