Read Ninia Yali ROMA 6 Bible Online

ROMA 6 - Ninia Yali bible

ROMA 6

¹Ai halug, ke hag ul? Eleg. Allah enda hundig en humdoho fanoap nenepuk mu hahuk en, nenendan siag duhuk neg wenggele folug, siag neg duruk kamuhuk behep?

²Mun eleg. Nit siag duruk katuhuk anyo ekenim duk ale neg nenebuk no, ap homi waratuk hag eleg atsi famen, nangginoho siag neg dil lauk kamuhuk behep?

³Kristus Yesus inim hundig lit, ikma belap-nenepsi ai, at waratsi anyo, “Ninim hundig mu, ninim waratuhuk hihi,” ulug, bouk fug angge wereg lit, uruk kahep? Eleg.

⁴ Kristus waratsi mu, owikmu feik lausa ai, nit ikma belap-nenepsi hag, at ninim hundig lit, ninim waratuhuk mu, owikmu nenobahaik lausa famen, neneluk keron amag ulug, at akni Allah omamne humon anyo fam waratuk men oluk apdoho unduhuk foruk kwit, at ninim hundig lit, unduhuk nenobahasi.

⁵At ninim nenebe misig hundig lit, waratuhuk mu, at oluk apdoho unduhuk fesi anyo hag, nenebe at ninim hundig mu, neneluk apdoho unduhuk nenobahaku eleg behep? Eleg. Unduhuk nenobahaku.

⁶Ap nenowe misig en autsi hweag-esauk halug, duruk hag, nenenda endam on en siag neg duk ale nenepuk anyo, ekenim dil la ale nenebuk no, omamne elehapdoho foukwag ulug, Kristus ninim e salib fam nenowatswa ale nenolukdeg ma, hweag-hesauk kahi. Ap eke olukdeg kweleg, enda endam on en siag dimin ulug wenggelduk famen, waratuk halug neg de, enda airoho wenggelduk fug. At Kristus ap homi waratuk men oluk atsi anyo, fobik wararuhu mun eleg. At waratuk kwit, waratuk indip anyo elehapdoho fesi fam, fobik wararuhu fug, nenelukdeg ma, nit Kristus ninim demdoho waratuhuk boruk kahe halug, fobik at ninim neneluk welamuhuk demdoho boruk kamul.

¹⁰At Yesus waratsi ai, nit siag duk ale neg nenepuk anyo, misiham waratuk kwit, omamne elehapdoho fesi mu, fobik wararuhu fug. Ne, ketia oluk atsi ai, Allah hweag-utuk halug neg, eke duruk karuhuk ulug, oluk atsi.

¹¹Ai disi higitdeg, nit oho siag duk ale neg nenepuk anyo, nenebeheg duk no ulug, waratuhuk mu, Allah hweag-nesauk halug neg, duruk kamuhuk ulug, Kristus inim hundig lit, neneluk atuhuk boruk kamuk.

¹²Ai halug, nenahap eleg aruhu on famen, henenda nauk anyo mutlug lauk kwit, siag duk ale neg henepuk kam no, sebeloho foruk kamek.

¹³“Siag duk ale nenepuk anyo, nenenggik neneyog fam duhuk fano,” ulug, wundetdoho embesouk fug. Ite, ap homi waratuk on eneluk apdoho unduhuk feseruk hag, fano neg dil noruk kamuhup ulug, henebe abirangge Allah neg og-utlug welamek.

¹⁴Allah en Musa hweag-etfag wene anyo ketia hit duruk kahep fug famen, Allah en nenelaheg en nenepuk kweleg, duruk kahe ma, siag duk ale henepuk kweleg at, sebeloho foruk kamek!

¹⁵Airoho deg ma, nangginduk kamul? Nit Allah en Musa hweag-etfag wene duruk kahe fug. Ite, nit Allah nenelaheg en fanoap nenepuk kweleg, duruk kahe ma, nit siag duruk kamuhuk fano behep? Ai mun eleg!

¹⁶Nimi eke en, “Nakni en hweag-nutuk halug, duruk karuhuk,” bolug, ele asugun fanoroho dil lauk fam, “Nimi ai, ap amingming angge hehe,” ulug, uruk anyo henapeleg ma, uruk kahep? Anyo hag, siag duk ale neg nenepuk halug, sebeloho fouk fug angge, “Dimin neg,” bolug, dil noruk kamuhup halug, ambiangma henebe at warail lauk kahep famen, Allah en uruk halug, dimin bolug, dil lauk halug neg de, Allah il hanim fanoapdoho nenobaharuk.

¹⁷Ap eke en amingming angge hweag-utuk halug, duruk hag, hit atam siag duk ale henepuk halug neg duruk katuhup famen, ketia neg de, demdoho wene hweag-hesausa anyo henenda fam mun fik-foukdoho oho folug, dil lauk kahep ma, an den, “Nakni Allah,” ulug, dang-duruk kahi.

¹⁸Siag duk ale henepuk halug, dil lauk katuhup anyo sebeloho folug, wundetdoho henobahasi mu, fano neg duruk kamuhup ulug, Allah amingming angge apdoho henobahasi.

¹⁹An wene hweag-hesauk kahi ai, nit ap homi deg ma, ap en uruk hag hweag-hisihi. Ap eke en amingming angge hweag-utuk halug, duruk hag, Allah wene sahaloho folug, henendan bolug, siag dil lauk ale henepuk halug, henebe ili hwela fug angge, “Dukohon,” boruk katuhup anyo hag, ketia Allah amingming angge wereg lit, siag duk fug angge fano neg duruk kamuhup ulug, henebe abirangge Allah neg og-utlug welamek.

²⁰Hit atam siag duk ale henepuk halug, duruk kwit, fano duk ale ai bouk fug angge, we hesangge henepeleg welatuhup.

²¹Ai famen, nit siag duruk katuhuk mu, “Nenenggali e!” ulug, uruk kahe anyo dil lauk kwit, ambiangma fano dauk katuhuk mu, ulug, uruk kahep? Eleg. Ai duruk kwit, waratuk katuhuk.

²²Ne, ketia neg de, siag duk ale henepuk anyo sebeloho folug, wundetdoho henobahasireg, Allah amingming angge welamuhup ulug, henobahasi mu, at obahet eneko henobahaku mu wereg lit, heneluk mundoho welam on hwelauk kamuhup.

²³Siag duruk onggo ai, waratuk ale famen, at Allah en onggoleg og-nesasi ai fam, Tuhan Kristus Yesus ninim hundig wereg lit, neneluk mundoho welamuhuk.