Read Ninia Yali ROMA 9 Bible Online

ROMA 9 - Ninia Yali bible

ROMA 9

¹An nori nerekwi nenunggul unuk misig on famen, siagdoho wereg ai en, nenda siag aheg, nahummu kwani-heheg, hauk kahi ai fam de, “Allah en an Kristus ninim hundig welahi on ai kobogdoho nobahalug, it enobalma an hururungdoho nobahalep ahi!” boruk kahi ai fam, “It og-eneplep e!” ulug, Kristus ninim hundig wereg lit ihi ai re, demdoho ihi. Seiale ihi fug. Allah Aheime en nendama wereg lit, “Wene ai re demdoho,” ulug, hweag-nereheg, nonggwareg nendaman oho re, “Demdoho ihi,” ulug, beheg, duruk kahi.

⁴ It Israel on anyo, at Allah en momal-enepfagdeg, at omaliki ap enebeheg, at leho wereg ale yanderuhup ulug unug-eseheg, “Abraham fene en duhuk,” ulug, sali wat-eseheg,[11] wene “Diroho diyug, airoho diyug,” ulug, melal-eseheg, Allah mot-duruk kwit, duruk kamuhup wene hweag-eseheg, “Fobik diroho henebuk,” ulug, sali wat-eseheg, debag.

⁵Ne, it enombasi Abraham nim, Ishak nim, Yakub nim, enomba Kristus anyo ap homi higitdeg endag-atsi. Di angge su angge Allah apma neg wereg kweleg, at mundoho leho wereg ma, Allah dang-dulug, mot-deheg neg duruk kamul![12] Amin.

⁶At Allah en it ap homi Israel on mundoho momal-enepfag fug mu, ulug, Abraham abug hweag-etfag anyo, “Dahan atsi,” ulug, hweag-hesauk kahi fug.

⁷ At Allah en Abraham wene hweag-utuk kwit, “Haren ondoho on saha uhup, ulug, hweag-hitihik anyo, hamloho Ishak su en ondoho on en saha uhup on fahet neg hweag-hitihik,” ulug, hweag-etfag ai fam Abraham en ondoho on abirangge Allah omaliki uk fug alereg.

⁸Airoho hweag-etfag ai, ebe en ondoho on ai re Allah omaliki uk fug alereg ma, ulug, ebag. We Allah en abug hweag-esebag on halug neg de, at omaliki uk fug alereg.[13]

⁹ At Allah en Abraham fam sali wat-utuk kwit, “An fobik hakit waruhuk li eta[14] waruhuk men, hwe Sara omalik ap angge endag-dahu,” ulug, hweag-etfag.

¹⁰At Abraham hweag-etfag anyo neg fug. Ite, hwe Ribka inim hweag-etfag. Hwe Ribka omaliki biren omalik endag-enepfag on etano enakni Ishak ai nit nenomba deg ma,

¹¹ it enomaliki etano owan endag-atuk eleg kweleg, siag duruk ale, fano duruk ale owan enapeleg kweleg, Allah en omalik misig neg momalfag ai, at endan neg wenggele folug, momalfag boukwag ulug, hwe Ribka hweag-utuk kwit, “Homaliki endag-enebuhun anyo owe on aut apma welaruhu,” ulug, hweag-etfag. Ai halug, Allah en momalfag ai, it inim en eke debag famen, momalfag fug. Ite, at enda bolug neg aut anyo neg momalfag.

¹³ “Yakub nenda hundig wereg famen, Esau neg nerim deg lahi,” ulug, ebag ale Allah wene fam lisu baleg anyo higitdoho debag ma, hauk kahe.

¹⁴Ai debag halug, nit nangginoho hag ul behep? Allah enda furebouk fug angge hesangge duruk mu, ulug, uruk kahe? Ai mun eleg.

¹⁵ At Allah en Musa hweag-utuk kwit, “Ap homi an den enelaheg boruk kahi halug, enelaheg bohuk neg. Ne, an den fanoap debesehuk boruk kahi halug, fanoap debesehuk neg,” ulug, hweag-etfag ma,

¹⁶nit ap homi en nenenda boruk kahe fam inim, nit nenonggwareg en dauk kahe fam inim, Allah en fu nenobahalug, fanoe nenobaharuk fug. Ite, Allah enda bolug en neg nenelaheg en fanoap nenepuk mu, hauk kahi.

¹⁷ Ai halug, Allah en at ap homi Mesir on enowe unuk bogdeg anyo hweag-utuk kwit, “An nomamne inim, an nunuk inim eneluk atlug, di obam su obam saharil lauk kamag ulug, hat unduhuk hobaharihik,” ulug, ebag ale Allah wene fam lisu baleg wereg.

¹⁸Aireg ma, at Allah endan neg eke elaheg bemin boruk halug, elaheg beheg, ne, eke enda omamneroho femin boruk halug, enda omamneroho feheg, duruk, ulug, hweag-hesauk kahi.

¹⁹Allah en neg enda wenggele folug duruk mu, hiren, “Allah enda boruk kweleg, amu on dehe ha fug alereg hehe. Ai halug, nunggwelug Allah en, Hit siag, ulug, wene nenobam foruk?” ulug, hweag-nom ale duruk kahep ma,

²⁰ yaho! Hit sa bolug uruk kahep? Wene onggo Allah hweag-om ale fano bolug uruk kahep a? Di angge su angge waldeg on anyo en wal-duruk ahun anyo hweag-utuk kwit, “Hat nangginoho wal-napihin abi?” uk ale re fano behep? Eleg!

²¹Waruk kwenang dangge on wal-duruk on en enda bolug wal-duruk kwit, dangge foma oko waruk eke along on hag dukwag ulug, wal-deheg, ne, eke we hesangge duruk on ulug, wal-deheg, duruk eleg ma bolug uruk kahep?

²²Enda bolug en neg duruk ai hag, Allah ai higitdoho neg duruk mu, at olok debeseruk ale inim, at omamne inim, “Neowag,” ulug, it at olok debeseruk kwit, enebe elehapdoho fesemin boruk famen, enda hwerie folug, mun furoho debeseruk.

²³Ai debeseruk ai, at nenelaheg boruk kwit, Allah ninim leho welamuhuk ulug, eneko nenobahasi anyo at mun fano leho lit, angge dindikdeg kweleg, fanoapdoho nenobahakeg neg duruk ale neneluk amag ulug, enda mundoho furebelug duruk.

²⁴ Ninim leho welamuhuk ulug, eneko nenobahasi ai, nit neg famen, nit Yahudi on neg fug. Ite, at Hosea en buku balfag fam Allah en uruk kwit, “It ap homi amu on famen, Nowe naut hag hit, hweag-eseheg, Ne, it an nenda hundig eleg on famen, Nenda hundig on, eheg, Hit ap henemu on, ulug, hweag-esauk katihik mu, anyo man, Allah eneluk enepuk on nomaliki hit, ulug, hweag-eseheg, duruk karuhuk,” ulug, lisu balfag anyo higitdoho, it dagma holduk eleg on ninim eneko nenobahasi mu, ulug, ebag ma, hauk kahe.

²⁷ It ap homi Israel on saha il watfag anyo enewene Yesaya en uruk kwit, “It Israel on anyo ik laut inggi hag enebe humdoho saha uhup famen, foma dorangge neg enahap wendat-enebuhu.

²⁸Di ap homi su ap homi mundoho siag duruk esalug, at Allah en it wongdoho wereg ma, mundoho fuk heheg enowatil waharuk kwit, misigdeg enahap wendat-enebuhu” ulug, ebag.

²⁹ Ne, at Yesaya en wene eke atam uruk kwit, “At Allah alongdeg ahun deg ma, niren ondoho on abirangge enelaheg en fesouk fug angge enowatlep man, ap homi o Sodom, o Gomora on inim, eleg atfag hag ala,” ulug, ebag.

³⁰Ai halug, wene diroho fahet hweag-hesauk kahi. It dagma holduk eleg on anyo at Allah en fanoapdoho fesoukwag ulug dauk katfag fug famen, demdoho bousa fam Allah il hanim fanoapdoho fesesi.

³¹Airoho debesesi famen, nit Allah momal-nenepfag on Yahudi nenap neg de fano dil noruk fam nenebukwag boruhuk famen, nenepsi eleg ma, nunggwelug nenepsi fug behep?

³² Eleg. Demdoho boruk fam fanoap nenebuk alereg kweleg, nit dauk kahe fam nenebuhu ulug, duruhuk famen, nenepsi eleg ma, nenenggali atsi. At Allah en uruk kwit, “Helep eke eneyog unggum dungdoho enowatuk kwit, fuk lauk kamag ulug, duk Sion fam ferihik ai hakiyug! Ap eke en enda helep ai fam dip-debelug, demdoho boruk halug, enggali aruhu fug” ulug, ebag ale Allah wene fam lisu baleg ai, niren neneyog unggum dungdoho wat-dauk kwit, fuk lauhukdeg welahe.