Read Ninia Yali 1 KORINTUS 1 Bible Online

1 KORINTUS 1 - Ninia Yali bible

1 KORINTUS 1

¹ Nori, nerekwi. Hit ap homi jemaat Allah o Korintus kabog-duruk kahep on, hit Allah omaliki seberoho welamuhup en, henayonggo henobahalug, Kristus Yesus ebe fam hundi henobahasireg, eneko henobahasi inim, it di obam su obam, “Tuhan Yesus Kristus,” ulug, mot-duruk on hinim, Allah enda bebag fam an Paulus Yesus Kristus ayonggo mon-enepuk on rasul nobahasi mu, nenere Sostenes nim en hweag-hesauk kahe. Yesus Kristus ai, nit mel it mel mundoho Nenowe Tuhan at deg ma, at Nenakni Allah inim enda hundig en og-heseheg, henenda seroho fano welamuhup ulug, henebeheg, duruk kamag.

⁴Kristus Yesus disi fam Allah enda hundig en fanoap henepsi mu, an hundig-hundig Allah mot-duruk kahi.

⁵Hit Kristus hinim hundig welahep ma, Allah en henebe dungap henepsi mu, wereg lit, di wene su wene uk ale nim, di duruk su duruk duk ale nim, heneluk atuhupdeg, mundoho hweag-esauk kahep.

⁶Tuhan Yesus Kristus waharuk mu, ap homi humdoho en inil hahup on anyo, nangno-hauk kwit wereg ma, Allah en fano neg henobaharuk ai fam, Kristus wene anyo mundoho enendama kwisi ulug noluk atuk mu, Allah mot-duruk kahi.

⁸At Tuhan Yesus Kristus ap homi en-enebukwag ulug waharuk kwit, hit siag duruk mu wam no, ketia en bekit waruhu huli, henenda mun hambukdoho welamuhup ulug, henepuk karuhu.

⁹At amloho nit Tuhan Yesus Kristus ninim sebereg welamuhuk ulug, yonggo nenobahasi Allah on anyo en, at duhuk boruk anyo, amu oko duruk eleg, mun furoho duruk mu, nenenda at obam dip-debelug, mun hambukdoho welahe halereg.

¹⁰Nori, nerekwi. Hit minggit-manggat dauk kahep ai embeselug, henenda henele misig debelug sebereg lit, dil noruk kamuhup ulug, at Tuhan Yesus Kristus unuk fam komo-henebik.

¹¹At hwele Kloe omalikisi etlema on en, “It enenda minggit-manggat dauk,” ulug, hweag-nirik wahausa ma, hweag-hisihi.

¹² Iren uruk kwit, “It foman, An nakni Paulus, eheg, ne foman, An nakni Apolos eheg, ne, An nakni Petrus, eheg, An nakni Kristus, eheg, uruk” ulug, hweag-nirik wahausa ma, henemu hundomog minggit-manggat dauk kahep ale holdihikdeg, hweag-hesauk kahi.

¹³Hit airoho uruk kahep ai, at Kristus ebe minggiroho wereg ma,[1] ulug, uruk kahep a? An Paulus henobahet e salib fam nowatswa behep? Hit an nomaliki amuhup ulug, an nunuk yiko ikma belap-henepswa behep? Mun eleg!

¹⁴ Hit foman uruk kwit, “Nit Paulus unuk fam ikma belap-nenepswa,” ehep ha no ulug, iyale an den hit mundoho ikma belap-henepihik fug. Ite, it ap Krispus mel, Gayus mel eta neg de ikma belap-enepihik mu, Allah dang-duruk kahi. (

¹⁶ Ne, eke at Stefanus ahainelekwe nim ai, an den demdoho ikma belap-enepihik famen, it foman uruk on ai re an napeleg.)

¹⁷At Kristus en ap homi ikma belap-enepuk kamag ulug mon-nabik wahasi fug. Ite, Wene Fano wene hweag-isil noruk karuhuk ulug mon-nabik wahasi mu, Kristus e salib fam waratsi anyo, we alemaroho waratsi bouk no, it ap, “Nenenda wereg on,” ulug, enele ahalue dep-dep uruk hag, an airoho hweag-hesa waharihik fug, nori, nerekwi.

¹⁸It ap homi waratuk on anyo en, Yesus e salib fam waratsi wene anyo hole folug, “Su morue enele hag il noruk,” ulug, unda yatuk famen, nit nenahap wendat-nenepuk on anyo en neg de, wene ai wauk fam, Allah nenahap wendat-nenepuk mu, “Wene ai Allah omamne at hehe,” ulug, boruk kahe.

¹⁹ At Allah en uruk kwit, “It ap homi, An mun noluk, bolug, wenggelduk anyo an den it wenggelduk ale anyo elehapdoho feheg, ne, it ap enenda enggatdeg ma, folo-folo enegdeg ma ha no, an den enenda enapelehapdoho feseheg, duhuk,” ebag ale Allah wene fam lisu baleg wereg ma,

²⁰ it ap homi enenda wereg anyo sa mel behep? It buku baleg kumu hauk kwit fureberuk on sa mel esauk kahep? Kwenangma suma wene wenggele folug lebegdoho uruk on eke wereg ulug, uruk kahep? Mun eleg! It kwenangma on en, “Nenenda wereg lit, wenggelehe,” ulug, uruk anyo, at Allah en, “It morue wenggele folug uruk,” boruk kweleg, uruk.

²¹At Allah enda wereg on en uruk kwit de, “It ap homi kwenangma on en enenda wenggeldil lauk fam, an enegdeg ma neauhup fug. Ite, it an nele hweag-esauk kahi anyo ap homi en, Su morue enele il noruk, boruk kweleg famen, wene ai demdoho boruk halug, enahap wendaruhuk,” ulug, wenggelfag ma, ai halug, enenda wenggelduk fam Allah furebehup fug. Ite, demdoho boruk fam neg furebehup ai fano.

²²It ap Yahudi on en, “Furebahat-daul en nenakol wereg on eke din,” ulug, eheg, ne, it Yunani on en, “Ap homi enenda wereg on enele holdul,” ulug, eheg, duruk famen,

²³nit neg de, Kristus e salib fam waratsi wene anyo neg fagdoho hweag-hesauk kahe. Wene ai, it Yahudi en hol-halug, “Kristus waratsi uruk wene wahuk nenerim,” ulug, eheg, ne, it dagma holduk eleg on en hol-halug, “Ai morue wene hag hehe,” ulug, eheg, duruk.

²⁴Ai famen, nit Allah yonggo nenobahasi on Yahudi on mel, Yunani on mel anyo en wene ai hole folug, “Allah omamne inim, Allah enda wereg ale inim, ai Kristus fam neg wereg,” ulug, fureberuk kahe.

²⁵At Allah en enda wereg lit, uruk ale ai, ap homi en morue boruk kweleg famen, it ap homi enenda wereg lit, uruk ale morue hag wereg kweleg, at Allah enda wereg lit uruk ai alongdeg. Ne, at Allah en omamne fam duruk ale ai, ap homi en omamne eleg boruk kweleg famen, it ap homi enomamne fam duruk ale maben hag kweleg, at Allah en omamne fam duruk ai alongdeg.

²⁶Nori, nerekwi. Allah en yonggo henobaharuk eleg kweleg, atam welatuhup anyo henenda eberiyug. It ap enenda wereg on mel, enalong wereg on mel, ap enenggainon enunuk bogdeg on mel, it ap kwenangma on en along boruk anyo mundoho hit ap ai deg on halug henayonggo fesi fug.

²⁷It ap, “An noluk,” boruk anyo enenggali amag ulug, ap homi en, “Su morue on,” boruk ai, at Allah en endan bolug, momal-enebeheg, ne, it ap enalong leho wereg anyo enenggali amag ulug, ap homi en, “Su maben on,” ulug, boruk ai, Allah en momal-enebeheg, disi.

²⁸It o kwenangma suma mun along boruk anyo, elehapdoho foukwag ulug, ap homi en enunuk eleg boruk on mel, enelitno enepuk on mel, alemaroho boruk on mel, mundoho ai Allah en momal-enepsi.

²⁹Aireg ma, nit ap homi en nenonggwareg en Allah il hanim leho fahat-dehe ha fug alereg.

³⁰Ite, at Allah en Kristus Yesus fam hunduko nenobahasi mu, ninim hundig lit, at Kristus disi fam nenenda werehap nenepuk. Allah il hanim fanoapdoho nenobahakeg, at Allah omaliki at obahet welamag ulug, eneko nenobahakeg, ne, sabu hetdoho welatuhuk anyo wundetdoho nenobahakeg, disi ai re Kristus neg.

³¹ Aireg ma, “At eke en, Leho fahat-damin, boruk halug de, Tuhan en disi ai fahet neg, leho fouk alereg,” ulug, ebag ale Allah wene fam lisu baleg wereg.