Read Ninia Yali 1 KORINTUS 10 Bible Online

1 KORINTUS 10 - Ninia Yali bible

1 KORINTUS 10

¹ Nori, nerekwi nim. Musa en nit nenombasi og-eneplug lauk kwit, debag anyo henapeleg ahep ha no, eberoho hweag-hesa. It mundoho anggulog apma kulug laheg, ik Laut Merah ai obahare baleheg, debag ai fam,

²nit Kristus ele wauk on boukwag ulug ikma belap-nenepuk hag, it Musa wene wauk on enegdeg esowag ulug, debesebag ale hauk kahe.

³ Airoho debagdeg, siburu nauk hag, at Allah en misig on eke nikdoho og-esauk kweleg, enebe abirangge nenggeg,

⁴ ne, ik nauk hag, misig on nikdoho og-esauk kweleg, enebe abirangge nenggeg, duruk katfag ai re, helep Allah en febag on inim mundoho lauk kwit, ilonggoman wilipuk mu nauk katfag ai, helep ai ebe re Kristus at.

⁵ Aireg famen, it foma humdoho anyo Allah ahayeg bebag fug mu, leimu etma warail lauk kwit, enowag solong il lebag anyo.

⁶ Airoho debag ai re, it siag on enambonoroho deheg, ap iron eke enenda duhwi kembu fam dip-debelug, mot-deheg, duruk katfag ai en, debag ai. It airoho duruk katfag ai hag, nit airoho duruk kam no ulug, fureberuk kwit, komo-dauk kamag ulug, wene abirangge airoho debag ai. It airoho duruk katfag, ulug, Allah wene fam diroho baleg wereg: “It ap homi enunggul unuk ai on en siburu mel, anggur ahalue mel, nakoho, huratfagdeg, fobik suni yungguleheg, hambena deheg, duhuk, ulug, melalfag,” ulug lisu baloho febag.

⁸ It foma suni yungguli folug, homi hesangge enebil lebag ma, nukoho misiham enebe humdoho 23.000 warail lebag anyo hag, nit airoho nenebuk no, hambena hesangge enebil lahup ai ousa.

⁹ It foman Allah abut balduk kwit, “Tuhan[12] olok wereg ane?” bolug, siag duruk katfag ma, kisu en senggel-enebil lebag ma, warail lebag anyo hag, nit airoho warail lahe ha no, Allah abut balduk kam fug.

¹⁰ It foman inirik-enerim uruk katfag ma, boholma yonggo noruk on eke malaikat enowatuk on anyo en waroho feseil watfag ma, warail lebag anyo hag, nit airoho nenebuk no, ninirik-nenerim uruk ale de ousa.

¹¹It debag ai, nit enowal-heheg neneluk amag ulug, debag ma, o ahae fotog duhu anyo nit nenobam horog aik waharuk kweleg, nit ketia welahe anyo nenenda furobahat-dauk kamag ulug, wene su lisu bal-nesebag.

¹²Ai halug, ap misig eke, “An mundoho fano unduhuk lahi,” boruk halug, bule wambuk no enda furebelug kahaleg lamag.

¹³Hit henenda kahal-henepuk anyo re, amu angge fam de fug. Di ap homi su ap homi enenda kahal-enepuk on anyo fam neg, hit henenda kahal-henepuk mu hahup famen, at Allah en hit henepuk anyo fu henobaharuk mu, henenda kahal-henepuk kweleg, henomamne eleg ail kuruk mu, siag dehep ha no, Allah en kwe hwaloho henobahaku.

¹⁴Ai halug, nori, nerekwi neg. Hit an nenda hundig on, duhwi kembu ai wire folug enenda dip-debelug mot-duruk ai on, embeselug, ohwaloho wereg lamek.

¹⁵Hit ap henenda wereg on deg ma, wene hweag-hesauk kahi su re, hit neg henenda wal-hauk kamek.

¹⁶ Nit nenenda misig sebereg lit, ahalue hwenanggeg oko at Kristus amep wilipsi anyo fam seberoho nenobahasi mu, Allah dang-dulug nauk kahe anyo eleg a? Ne, siburu kuroho nauk kahe anyo re, nit nenenda sebereg lit, at nenobahet waratsi ebetuk kwit, nauk kahe anyo, eleg a?

¹⁷Nit nenebe humdoho famen, siburu misig on kuroho yohwan-yohwan nauk kahe ma, nenebe misig at seberoho welahe.

¹⁸ It ap Yahudi on duruk ale anyo fam furebeiyug. Iren Allah obahet waroho folug, foma it nauk kwit, foma indok yal-utukmu yal-utuk kwit, Allah inim hundig wereg, bolug, henepeleg?

¹⁹Halug de, nunggwe ik? Duhwi kembu ai ebe along imin a? At owam wat-utuk on lenggareg ai along imin a? Eleg.

²⁰ Wene ai re ebe su fahet ihi. It ai Allah fahet wat-utuk fug, we mungguat obabut siag on fahet wat-utuk. Halug de, hit mungguat obabut siag on ai hinim hundig welamuhup de an nerim.

²¹Tuhan ahaik ahalue hwenanggeg inim, at Iblis ahaik ahalue hwenanggeg inim, inim seberoho folug nauk kamuhup ai mun siag. Ne, Tuhan asiburu osoho nim, Iblis asiburu osoho nim, misigmu folug, nauk kamuhup ai oho siag neg.

²² Ite, nit Tuhan ologap debehuk fano behep? Nit nenomamne humon, ne, at omamne eleg behep? Eleg.

²³ Ap foman uruk kwit, “Di angge su angge duruk ousa fug, hesangge duhup fano,” uruk famen, dil noruk kwit neg de, nit eke fano daul ulug, dil noruk kahe fug. Foma siahap nenebikoho angge fahet we alemaroho dil noruk kahe. “Di angge su angge mundoho duhup ai fano,” uruk famen, abirangge fano dahuk ulug, duruk de fug.

²⁴Hit henonggwareg fahet neg dil lauk kamuhup fug. Ite, henori enahayeg howag ulug inim debeseil noruk kamek.

²⁵ “Di angge su angge kwenangma suma wereg anyo mundoho, at Allah onggwareg neg,” ulug, Allah wene fam lisu baleg wereg ma, hit wam lenggareg angge pasar duruk men hundutlug, indip henapeleg kweleg, hesangge nahup ai fano.

²⁷It ap Yesus omaliki fug on en, “Siburu osoho ninim naul,” ulug, henayonggo foruk em, “Hinim na laul,” ulug, lahupdeg, di angge su angge osoko fohup on og-hesauk halug, henenda anggin am no, “Su an ninggi halereg a, eleg a?” hein og-esa fug angge, hesangge nauk kamuhup.

²⁸Ai nahup famen de, ap amu on eke en, “Su kembu fam osoho on,” ulug, hweag-hesauk halug neg de, hit hesangge nahup fano famen, at hweag-hesauk anyo en, “An ninggi halereg ane?” ulug, at enda anggin boruk kwit, hweag-hesauk mu, at obahet na fug angge embesehup. Embesehup fano famen, hit foman, “Ne, an hesangge ninggi halereg, boruk kweleg, at eke enda anggin boruk fam nunggwelug embesehuk ulug, hweag-nutuk?

³⁰Ne, an namu neg Allah dang-dulug nauk kweleg, it ap homi nunggwelug nabug balduk?” uruk kahep.

³¹Ai halug, henesiburu nenggeg, henahaik nenggeg, di deheg, su deheg, duruk kwit, Allah unuk neg leho foul ulug, duruk kamek.

³²An ap homi enahayeg howag ulug enobahet di deheg, su deheg, duruk kwit, an fano damin ulug, dauk kahi fug. Ite, Allah en it enahap wendare fesoukwag ulug, fanoap debeseil lauk kahi anyo hag, hit airoho it Yahudi on mel, Yunani on mel, jemaat Allah en di o su o kabog-duruk on mel, mundoho debeseil lauk kwit, kwe baloho fesehep ha no, furebelug, debeseil lauk kamek.