Read Ninia Yali 1 KORINTUS 11 Bible Online

1 KORINTUS 11 - Ninia Yali bible

1 KORINTUS 11

¹ At Kristus obabut wal-heheg duruk kahi hag, hiren an nobabut wal-heheg, duruk kamek.

²Hiren hundig-hundig nobam ebereg lit, di wene su wene hweag-hesauihik anyo furebelug, dil noruk kahep ma, “Hit fano,” ulug, mot-henebihi.

³Ai famen, wene misig su neg henelukdeg lamuhup en hweag-hesa. At Allah apma ai Kristus, ne, Kristus apma re ap, ne, ap apma re homi, airoho welahe ma, wene ai furebehup ulug, hweag-hisihi.

⁴Aireg ma, nit ap Yesus omaliki kabog-debelug, nenunggul asum sebeleg lit, somban eheg, Allah wene hweag-eseheg, duruk kamuhuk halug ai fam enggali waroho fouk hag duruk.

⁵Ne, homi enebe hundomog anyo en enesum yanggulig eleg lit, ap homi Yesus omaliki kabog-duruk mu somban eheg, Allah wene hweag-eseheg, duruk halug de, enonggwareg en enuhunsi domog enenggali waroho debouk hag duruk ai. Airoho duruk ai re, enoruk felelengdoho baleg ma duk hag duruk ai.

⁶Ne, at hwe eke en asum unggulmu yanggulduk erim halug de, oruk baluk mu re, homi enoruk enunggul felelengdoho baleheg, kiriripdoho baleheg, duruk mu, enenggali halug de, enenggali en enesum enunggulmu yanggul-dauk fano.

⁷ Allah en ap ai homi enobahet wal-debag fug. Homi ai ap enobahet wal-debag ma, ap inindip de homi re fug. Ne, homi inindip de ap deg ma, enesum yanggulig lit, enehunsi enapma sebe ulug, mot-enepuk kamag. Ne, ap neg de Allah en, “An leho nobaharuk kamag,” ulug, at ebe hag wal-debag ma, ap ai Allah apma sebe ulug, enenggul asum sebeleg eleg angge wereg lit, somban uruk kamuhup fano.

¹⁰Ai halug, it boholma yonggo noruk on malaikat omano en hit homi fu henobaharuk mu, henehunsi enapma wereg on hesowag ulug, henesum yanggulig lit, welamek.

¹¹Ai famen, Tuhan ninim hundig lit, homi re ap eleg ma enemu welaheg, ap de homi eleg ma enemu welaheg, welam fug alereg.

¹²Indipmu Allah en homi ap on oko wal-debag ai hag, ap enebe homi en endag-enepuk mu re, nenebe di angge su angge mundoho re indip at Allah.

¹³Aireg ma, wene misig su henenda wenggel-hakiek. Yesus omaliki humdoho kabogdeg on inil hanim, it homi enesum yanggulig eleg angge wereg lit, somban uhup ai fano behep?

¹⁴Ap de enoruk yatdeg wereg ma, enenggali atuk famen, it homi neg de enunggul saleg welamag ulug, Allah en enoruk yaron og-esasi mu, wereg ma re, “Enoruk fano,” ulug, ap homi en mot-enepuk, ulug de, henonggwareg henendaman boruk kahep fug no?

¹⁶Su duruk fam, it ap foma henenggelegman, “Diroho duhup fug,” ulug, enele abiroho uruk halug, nit suma inim, it Yesus omaliki di jemaat su jemaat en kabog-duruk on inim, “Amuroho duruk eleg, ai neg duruk,” ulug, hweag-esakiyug.

¹⁷Nori, nerekwi. Hit Yesus omaliki jemaat ulug kabog-dik lauk kwit, fano duruk eleg, siag duruk mu, hesauihik mu, an wene su hweag-hesahuk berihik anyo re, leho henobaharuk kwit, hweag-hesamin fug.

¹⁸Bet-henepuk hag wereg lit, hweag-hesamin. Wene atam wenggeloho hweag-hesahuk berihik anyo su. Hit Yesus omaliki neg kabog-duruk kahep anyo, hit hit neg minggit-dauk kahep nesanggo holdihik mu, “Su demdoho duruk ane?” berihik.

¹⁹Airoho duruk kahep ai re, hit wene uruk kalep fug men, sa mel en wene fano uruk anyo indip enam alep eleg famen, wene uruk kahep ai fam sa mel Yesus omaliki demdoho on wereg anyo, nenoluk amag ulug indip enam atsi.

²⁰Hit kabog-debelug henesiburu henemu hundomog nauk kwit, it foma obokdoho wereg kweleg, hit foma atame fahat-dauk kwit, nenggeg, ne, ahalue homoroho nalug, wenenebo deheg, duruk mu hesauihik mu, Tuhan asiburu osoho nim, ahalue hwenanggeg nim, demdoho naul ulug, kabog-duruk kahep fug, we hesangge duruk kahep.

²²Yaho yei! Henahaik henasiburu nauk kamag ulug, henobam wirig eleg en, Allah omaliki kabog-duruk mu dik kuruk kahep a? Jemaat Allah kabogdeg on siahapdoho feseruk kwit, it enengge eleg anyo enenggali apdoho feseruk kahe fug ulug, duruk kahep a? Hit airoho duruk kahep ma, an nanggoho hweag-hesa? “Hit fano duruk kahep,” ulug, mot-henepmin behep? Mun eleg. Wene ai fahet mot-henepmin fug.

²³At Tuhan en duruk kamag ulug hweag-nesasi ale wauihikdeg, hweag-hesauihik anyo ebe su. At Tuhan Yesus warukwag ulug owan senetuk eleg kweleg, ai salim o hup anggo siburu roti wasireg,

²⁴Allah dang-dulug kutuk kwit, “Su an nebe deg ma, hit henobahet. An nebe ebet-napuk kwit, nauk kamuhup,” ulug, hweag-esasireg, nausa.

²⁵ Nausareg, ai en fobik soni foma nalug, ahalue hwenanggeg enggikmu wasireg, “Allah en hinim sebe-henebuhu en wene keron wenggeloho febag anyo nawene hilil-hesauk kahi su, hit demdoho bohup ulug, namep henobahet wilibuhu anyo, ahalue hwenanggeg su hag deg ma, hundig-hundig hit ahalue su nauk kwit, henenda nobam ebet-napuk kwit, nauk kamuhup,” ulug, nausa.

²⁶Yesus waruhu nangno-hauk kwit, siburu roti nim, ahalue hwenanggeg nim, eke salim nenggeg, eke salim nenggeg, duruk kwit, “Tuhan demdoho waratsi hihi,” ulug, hummen fag-duruk kahep.

²⁷Ai halug, hiren at Tuhan asiburu osoho nim, ahalue hwenanggeg nim, we uk habihi, hemel habihi nauk halug, at Tuhan ebe nim amep nim nit nenobahet disi anyo siahapdoho foruk kwit, nauk kahep.

²⁸Aireg ma, hit atam henenda furobahat-dalug, siburu nim, ahalue nim, nauk kamuhup de fano.

²⁹Hit henendaman Yesus ebe furebouk fug angge siag henendama sebeleg lit, siburu nim, ahalue nim, nauk halug neg de, Allah olok henobam henobahaukwag, bolug, nauk kahep.

³⁰Hit su duruk kahep fam, henenggelegma etma foma humdoho ouk enebeheg, omamne eleg aheg, ne, foma waraheg, duruk kahep ai.

³¹Nit atam nenenda furobahat-dalug, siag fag-dela man, fobik Allah en nit duruk ale fu nenobahalug, siag onggo nenobam nenobahalep fug famen,

³²fobik it ap homi kwenangma on mundoho eneko siag onggo hweag-esauk kwit, nit nim nenobam nenobahauk no, Tuhan en nit duruk kahe ale fu nenobahalug, nenenda wenggeloho nenobaharuk.

³³Aireg ma, nori, nerekwi inim, siburu ahalue nakoho lit, kabog-dik waharuk kwit, ambine naul ulug, nangno-enepuk kamek.

³⁴Ne, siburu ahalue nakoho lit, kabog-duruk kwit, siburu obok en homoroho nauk halug, Allah en siahap henebuk no, henesiburu we on henobam en homoroho nalug, waharuk kamek. Hit wene su on furebehup halug, Allah en siaho henobahaku mun eleg. Ne, wene foma ai, an henekit waruhukdeg, hinim wereg lit, furoho hweag-hesahuk.