Read Ninia Yali 1 KORINTUS 12 Bible Online

1 KORINTUS 12 - Ninia Yali bible

1 KORINTUS 12

¹Nori, nerekwi inim. Allah Aheime en eyabuk duruk kamag ulug, karunia nenemu hundomog og-nesasi ale anyo, hit henapeleg welahep ha no, furoho henoluk amag ulug, hweag-hesa.

²Hit atam, Allah henapeleg wereg lit, kembu leberuruk eleg on fahet, “Airoho hweag-nesauk,” ulug, mutlug lauk katuhup anyo heneluk.

³Hit Allah Aheime henendama henepuk kweleg, “Hat Yesus su mungguat soroho hobahaki,” uk fug alereg. Ne, ai hagdoho, Allah Aheime en henendama henepuk eleg kweleg, “At Yesus de Tuhan at,” ulug, fag-duk fug alereg neg.

⁴ Allah Aheime en karunia nenemu hundomog og-nesauk anyo re, humdoho wereg famen de, at ebe neg de misig en neg yohwan-nesauk.

⁵Ne, Allah eyabuk wutuk kahe ale ai re, amu amu wereg famen, Tuhan misig on obahet duruk kahe.

⁶Ne, dil noruk kahe anyo re, nenemu hundomog duruk kahe famen, Allah we misig ai en neg omamne nenepuk kweleg, dil lauk kahe.

⁷Nit seberoho neg fano nenobahaukwag ulug, at Allah Aheime anyo en nit nenendama domog nenobaharuk kwit wereg ma, hauk kahe.

⁸Allah Aheime misig anyo en nit foma nenenda alongdoho wereg lit, hweag-esauk kamag ulug unduhuk nenobahakeg, foma di wene su wene indip eneluk atlug, Allah deg ale furoho hweag-esauk kamag ulug, og-neseheg,

⁹foma mun demdoho bolug Allah obam dip-deberuk kwit duruk kamag ulug nikdoho og-neseheg, foma ap homi oukdeg halug, fano hiling-enebeheg dukwag ulug, og-neseheg,

¹⁰foma duk fug alereg on duruk kamag ulug, og-neseheg, foma Allah en, “Duhuk,” boruk ale hweag-utuk kweleg, hweag-esowag ulug, og-neseheg, foma ap homi en wene il noruk anyo, “Su Allah Aheime en uruk a, seiale ane?” ulug, enegdeg ma furoho howag ulug, og-neseheg, foma ele nik on nikdoho oho folug, hweag-esowag ulug og-neseheg, foma at eke en ele nik on fam uruk kweleg, “Ai diroho eheik,” ulug, ahamdoho hweag-esauk kamag ulug, og-neseheg, duruk.

¹¹Ai nenepuk mundoho, at Allah Aheime ebe amu misig en at enda boruk ale higitdoho karunia nenemu hundomog og-nesauk.

¹² Nenenggik neneyog nenobahasi ai, humdoho wereg famen, nenebe ai misig at wereg ai hag, Kristus ebe misig famen, enggik eyog hag nit humdoho hunduko nenobahasi.

¹³Aireg ma, nit Yahudi on mel, hit dagma on mel, hit enemingming angge on mel, enemingming angge eleg on wundet on mel, Allah Aheime misig anyo famen, nenebe misig ikma belap-nenepuk hag kwelabe nenobahasi mu, ahalue misig nauk kahe anyo hag at Allah Aheime nit mundoho nenendama kwelap-nenepsi.

¹⁴Aireg ma, nenebe amu neg wereg fug. Nenenggik neneyog mundoho nenebe misig fam hundig wereg.

¹⁵Ai halug, wene wal-heheg eke hweag-hesa. Ap eke eyog en uruk kwit, “An ap enggik on fug deg ma, at ebe fam hundig eleg hag welahi,” uruk halug, at ebe fam hundig eleg demdoho behep?

¹⁶Ne, esanggo en uruk kwit, “An il on fug deg ma, at ebe fam hundig eleg hag welahi,” uruk halug, at ebe fam hundig eleg ai demdoho behep? Eleg.

¹⁷Nenebe mundoho ai ninil neg wal-delep man, nanggoho nenesanggo holduk kala behep? Nenebe mundoho ai nenesanggo neg buhun-delep man, nanggoho amben balduk kala behep? Airoho welahe ha fug alereg.

¹⁸At Allah enda wenggele febagdeg, nenenggik neneyog nenebe fam angge mundoho amu amu nenenggulmen mundoho bekit hun-nenebil, neneyogmu wambik wambebag.

¹⁹Nenenggik neneyog nenebe fam wereg angge neg welalep man, nunggwangge fam hundig lalep behep?

²⁰Eleg. Nenenggik neneyog nenebe fam wereg angge mundoho ai, humdoho wereg famen, nenebe re misig neg.

²¹Ai halug, nenenggik anyo en ninil hweag-utuk kwit, “Haren eke nabuhun fug mu, nerim. An haron fug,” eheg, ne, nenenggul en neneyog hweag-utuk kwit, “Haren eke nabuhun fug mu, nerim,” ulug, eheg, hweag-om ale re fano behep? Airoho uk fug alereg, nori, nerekwi.

²²Nit nenebe along, ne, nenenggik neneyog ai maben boruk famen, wereg eleg halug, nenebe amu en neg duruk kam fug alereg ma, mun along neg wereg.

²³Nit nenenggik neneyog mundoho foma orohole fano fureberuk eleg famen, foma orohole siag halug, hwaloho feheg, foma nenenggali am no ulug, mapnu deheg, duruk kahe. Nenenggik neneyog eke en eke elaheg beheg, eke en eke elaheg beheg, duruk kamag ulug, at Allah en nenebe waldoho nenobaharuk kwit, nenenggik neneyog minggit-manggatdoho welam no, orohole siag halug, hwaloho foruk kamag ulug, wenggeloho nenobahabag.

²⁶Aireg ma, nenebe fam misig angge ouk duruk halug, henebe abirangge ouk atuk. Ne, nenebe fam misig fano halug, ap homi yanderuruk hag, nenebe abirangge nenahayeg boruk kwit, yanderuruk.

²⁷Aireg ma, hit henemu hundomog Kristus enggik eyog deg ma, at ebe hinim hundig at welahep.

²⁸ Allah en at omaliki kabogdeg on jemaat henenggelegman atam mon-enepuk on rasul eneko feseheg, ai en, it enapma Allah en wene nigon hweag-esauk kweleg hweag-esauk on nabi eneko feseheg, ne, enapma Allah wene biling-esauk on guru eneko feseheg, ai en, enapma duk fug on deheg, ap homi oukdeg esalug fano hiling-enebeheg, let-enebeheg, wene melale feseheg, ele nenapeleg famen, nikaleroho hweag-eseheg, dil noruk kamag ulug, karunia og-nesalug, unduhuk nenobahasi.

²⁹Nit mundoho rasul welamag ulug, nenepsi behep? Nit mundoho nabi welamag ulug, nenepsi behep? Ne, nit mundoho duk fug on duruk kamag ulug, nenepsi behep?

³⁰Nit mundoho ap homi oukdeg esalug fano hiling-enepuk kamag ulug, og-nesasi behep? Nit mundoho ele nenapeleg famen nikaleroho hweag-nesauk kamag ulug, unduhuk nenobahasi behep? Nit mundoho ele nenapeleg famen hweag-nesauk anyo, “Diroho eheik,” ulug, ahamdoho hweag-nesauk kamag ulug, og-nesasi behep?

³¹Mun eleg, nori, nerekwi. Allah en karunia nenemu hundomog og-nesasi. Ai halug, karunia sebeleg hag on eleg, ite, leho hag on ai og-hesowag ulug duruk nu. Ai famen de, eke mun along on dil lauk kamuhup on hweag-hesa.