Read Ninia Yali 1 KORINTUS 13 Bible Online

1 KORINTUS 13 - Ninia Yali bible

1 KORINTUS 13

¹An den di ap homi su ap homi enele fam eheg, boholma yonggo noruk on malaikat enele fam eheg, uruk kahi ha famen, ap homi nenda hundig en enelaheg boruk eleg lit, uruk kahi halug, an ikwag hwenanggeg eleg ma ele doleleng-foleleng uruk hag uruk kahi.

² An Allah en wene nigon hweag-nutuk kweleg hweag-esauk karuhuk ulug, og-nereheg, di wene su wene mundoho indip noluk atlug, furoho hweag-eseheg, wene heraho on mun furoho heheg, nenda mun demdoho bolug Allah obam dip-deberuk kwit, “Dom su hihil aik lag,” hweag-utuk halug, hihil aik lauk on deheg, duruk kahi ha famen, ap homi nenda hundig en enelaheg boruk eleg lit, duruk kahi halug, we alemaroho duruk mu, we welahi.

³An den namunangge-manangge ap homi enengge eleg on fam mun yohwan-enebeheg, ne, “Nebe inim nowaroho indok yal-nabiek,”[13] ulug, og-eseheg, duruk kahi ha famen, ap homi nenda hundig en enelaheg boruk eleg lit, duruk kahi halug, we alemaroho duruk kahi.

⁴It ap homi enenda hundig en enelaheg boruk kwit, duruk anyo re su. Wene onggo folo-folo hweag-esa fug angge bok welaheg, enobabut sakoreg lit, deheg, duruk. Ai duruk kwit, nerim-herim eheg, enenda winik-wonog eheg, an along beheg,

⁵enenggali eleg angge dil laheg, ap amu on en an nenda behi on ai neg dukwag ulug beil laheg, olok folo-folo wilibeheg, ap homi en siahap debeseruk men anyo ebetil laheg, dil noruk ai, it ap homi enenda hundig en enelaheg boruk on en airoho dil noruk fug.

⁶It ap homi enenda hundig en enelaheg boruk kwit, dil noruk ai, siahap debeseruk ale enenda boruk fug. Ite, Allah demdoho uruk ale dil lauk ale neg enenda boruk.

⁷Enenda hundig boruk kwit, di wene su wene enobam atuk mu, enenda bik bok welaheg, enenda Allah obam dip-debelug welaheg, “Fobik Allah en fano duhu,” ulug, enahayegdoho welaheg, embesouk fug angge duruk.

⁸Allah en enenda wenggeloho hweag-esauk kweleg, hweag-eseheg, ele nenapeleg famen oho folug hweag-eseheg, di wene su wene indip furoho eneluk aheg, duruk ai, eleg aruhu famen, ap homi enenda hundig en enelaheg bolug debeseil noruk anyo neg de eleg aruhu mun eleg.

⁹Ketia Allah en nit di wene su wene indip furoho neneluk amag ulug og-neseheg, wene nigon hweag-nesauk kweleg hweag-esowag ulug og-neseheg, duruk mu, dorangge foma neg furoho halug, hweag-esauk kahe famen,

¹⁰fobik nenebuhu ale horog aik waharuk kweleg, ketia dorangge furoho halug hweag-esauk kahe anyo on eleg atuk kwit, mundoho neneluk amuhuk.

¹¹An omalik fouon wereg lit, it enomaliki fouon enele uruk hag nele eheg, it duk ale enenda boruk anyo an airoho beheg, enenda wenggelduk anyo hag an nenda wenggeleheg, duruk katihik famen, an nenda wereg atihikdeg neg de it fouon enobabut hag wereg lit, duruk katihik anyo embeserihik.

¹²Nit ketia enapumag mumdeg kweleg, ninil fu hauk hag, apumag neg fu hauk kahe famen, fobik ebe on furoho fu hahuk. Ketia re, wene foma neg nenoluk welahe famen, fobik at Allah en an nebe furoho olukdeg ai hag, an den at ebe furoho noluk aruhuk.

¹³Ai halug, nenenda demdoho bolug dip-deberuk kahe ale mel, nenenda ebereg welahe anyo mel, ap homi nenenda hundig en enelaheg boruk ale mel, wene indip henahan ai wereg famen, nenenda hundig en enelaheg boruk ale ai neg de, mun leho wereg.