Read Ninia Yali 1 KORINTUS 14 Bible Online

1 KORINTUS 14 - Ninia Yali bible

1 KORINTUS 14

¹Ai halug, nenenda hundig en enelaheg boruk ale ai henelohotma folug, duruk kamek. “Karunia og-nesowag,” ulug, boruk kwit, Allah en, “Duhuk,” boruk ale henendama hweag-hesauk kweleg, wene hweag-esauk on nim, og-hesowag ulug, henenda ningdoho duruk kamek.

²It foman ele enapeleg on oho folug uruk ai, ap homi holduk eleg kweleg, uruk mu, ap homi enesanggo holukwag ulug uruk fug. Ite, Allah Aheime en enendama enepuk halug, wene heraho on uruk mu, at Allah esanggo holukwag ulug uruk famen de,

³it ap Allah en enendama hweag-esauk kweleg, hweag-esauk on anyo en neg de, ap homi enenda wirik apdoho feseheg, enahayeg-ap debeseheg, enenda aho ware feseheg, duruk.

⁴It foman ele enapeleg on oho folug uruk ai, it enemu enonggwareg enenda aho ware fahat-dakoho lit uruk famen, it ap Allah en enendama hweag-esauk kweleg, hweag-esauk on anyo neg de Yesus omaliki kabogdeg on mundoho enenda wirik apdoho fesoukwag ulug, hweag-esauk.

⁵Hit mundoho ele enapeleg on oho folug, hweag-esahup ai, an den fano boruk kahi famen, an den, “Yehei,” boruk kahi ale ai, hit mundoho en Allah henendama hweag-hesauk kweleg, hweag-esauk kalep e, boruk kahi. Ne, ele enapeleg on oho folug uruk ai, it Yesus omaliki kabogdeg on enenda wirik amag ulug, “Airoho eheik,” ulug, hweag-esa on eke eleg kweleg, uruk ai, maben hag famen, it Allah wene holduk kweleg, hweag-esauk ai neg de alongdeg.

⁶Aireg ma, nori, nerekwi. An henekit waruhukdeg, Allah en wene fagdoho hweag-nutuk kweleg, hweag-heseheg, wene eke furoho heneluk apdoho henobahakeg, Allah Aheime in napuk kweleg, wene hweag-heseheg, Allah wene biling-heseheg, duruk eleg lit en, we ele enapeleg on oho folug, hweag-hesaroho lit neg henekit waharuk nealug, “Su nanggine nenobahaikoho wahasi,” bohup fug a?

⁷Ai higitdeg, di binggong su binggong ele ebe eleg famen, ngu neg duruk halug, ap homi en, “Ai suni diroho uruk,” ulug, furebehup behep?

⁸It ap homi weim yabukoho hum duruk hag, bohweap trompet ele ebe humon uruk eleg kweleg, nangginoho it ap weim yapuk on enautsi domog kabog-duhup behep?

⁹Ai hag, hit en ele enapeleg on oho folug uruk kahep anyo, furoho hweag-esauk eleg halug, hit uruk ale anyo, sa mel en, “Airoho eheik,” ulug, furoho holuhup behep? Hit uruk kahep ai, hit henapeleg kweleg, we alemaroho il noruk kahep hisihi.

¹⁰Ne, o kwenangma suma, it ap homi enele amu amu humdoho uruk famen, wene uruk on anyo holuk eleg angge we alemaroho uruk on suma eke wereg fug.

¹¹It wene uruk kweleg, an holduk kahi fug halug, iren, “Ap bohon ai,” beheg, ne, anyo hag, an den mel, “Ap bohon en uruk,” beheg, duhuk.

¹²Hiren, “Allah Aheime en karunia og-nesowag,” ulug, boruk kahep halug de, Yesus omaliki kabog-duruk mu enenda wirik-ap enebukwag ulug uruk on ai, og-hesowag ulug, henenda ningdoho duruk kamek.

¹³An den ele enapeleg on fam somban uruk kahi halug, nendaman demdoho duruk kahi famen, “Ke fahet ihi?” an napeleg lit, uruk kahi mu, ap misig eke ele enapeleg on oho folug uruk on anyo en, uhureg, ap homi wongdoho welam no, “Airoho fahet ihi,” ulug, hweag-esauk kamag ulug, somban uruk kamag.

¹⁴

¹⁵Aireg halug, an somban nangginoho uruk kaik? An somban uruk halug, nenda napeleg lit, ele enapeleg on oho folug, uhuk fug. Nenda ebere folug, ap homi nenele fam uruk karuhuk. Ne, suni uruk halug, ele enapeleg on oho folug, nenda napeleg lit, uruk karuhuk fug neg. An nenda wenggele folug, ap homi nenele fam neg uruk karuhuk.

¹⁶Allah mot-duruk kwit, henenda wenggel-atuk eleg kweleg, ele enapeleg on fam somban uruk halug, it ap homi foma hinim kabog-debelug, somban uruk kahep anyo, hit uruk ale hole folug it wongdoho welamuhup mu, nangginoho, “At demdoho eheik,” ulug, “Amin,” uhup behep?

¹⁷Hiren Allah mun alongdoho foruk kahep famen, it foma ele enapeleg on fam uruk kahep ma, hiren it holduk on fanoap debesehup fug behi.

¹⁸Allah leho foruk kwit, hit foman ele enapeleg on oho folug, uruk kahep famen, an neg de, alongdoho hag uruk kahi mu, Allah dang-duruk kahi ai famen,

¹⁹Yesus omaliki kabogdeg enenggelegma wereg lit, an den ele enapeleg on fam wene yatdoho uruk men, holuk fug alereg ma, an den ele enapeleg on fam hweag-esauk ale nerim. Ite, it fureboukwag ulug, it enele fam wene horogdoho hweag-esahuk ai neg de, fano boruk kahi.

²⁰Nori, nerekwi inim. Hit henenda wenggelduk kahep anyo re, it omalik doron wenggelduk hag, hit henenda airoho wenggelduk kam fug. Ite, it ap enenda wereg on en enenda wenggelduk hag, wenggelduk nu. Ne, siag duk ale henepuk halug, omalik fouon siag enapeleg anyo hag, hit airoho welamek.

²¹ Nit Nenakni Allah en uruk kwit, “An den ap homi suma on enele amu on fam nikdoho hweag-eseheg, it eke ap bohon enambilik fam hweag-eseheg, duhuk. Airoho hweag-esahuk men de, enesanggo holuhup fug,” ulug, ebag ale Allah wene fam lisu balfag wereg.

²²Ai halug, it foman ele enapeleg on oho folug uruk anyo, it ap homi demdoho boruk on enobahet de fug. It enenda demdoho boruk eleg on en furebelug demdoho boukwag ulug, uruk. Ne, anyo hag, it Allah en wene hweag-esauk kweleg, hweag-esauk kamag ulug og-esasi ai, it demdoho boruk eleg on enobahet de fug. Ite, Yesus omaliki demdoho boruk on furobahat-dowag ulug, og-esasi.

²³Ai halug, it Yesus omaliki demdoho boruk on anyo mundoho misigmu kabog-debelug, it mundoho en enele enapeleg on oho folug, nikaleroho neg uruk mu, it ap homi hesangge on Allah wene demdoho boruk eleg on omano wamuhupdeg, iren, “Ap su wenenebo on en hag il noruk su ahi,” hweag-hesahup fug behep?

²⁴Hweag-hesahup famen de, hit mundoho Allah en wene hweag-hesauk kweleg, uruk kahep halug, ap homi hesangge on demdoho boruk eleg on wamuhup esalug neg de, hit Allah wene uruk kwit, wene it enendama heraho wereg on mun fagdoho uruk mu, holuhupdeg, “Wene ai nit nenobahet ehesa,” ulug, enenda wat-dauk kwit, Allah leho foruk kwit, “Yehei. Allah inim demdoho wereg ma, esehe,” ulug, uhup fug behep? Uhup lit deg.

²⁵

²⁶Ai halug, nit nangginuk, nori, nerekwi? Hit kabog-debelug, ap eke en suni wilipmin boruk halug, wilibeheg, eke en wene biling-esamin boruk halug, biling-eseheg, eke Allah fagdoho hweag-utuk kweleg hweag-esamin boruk halug hweag-eseheg, eke en ele enapeleg oho folug, hweag-esamin boruk halug, hweag-eseheg, eke en, “Airoho eheik,” ulug, ahamdoho hweag-esamin boruk halug, hweag-eseheg, di duruk su duruk ai mundoho duruk kwit, at Yesus omaliki enenda wirik apdoho fesoul ulug, boruk kwit neg duruk kamek.

²⁷Ai halug, hiren ele enapeleg on oho folug, hweag-esauk kahep anyo re, hit henebe humdoho en uhup fug. Henebe biren henahan en uruk kwit, fobik atam uruk kweleg, at eke en wene uruk halug, at eke en, “Airoho eheik,” ulug, ahamdoho hweag-heseheg, duruk kamag.

²⁸It Yesus omaliki kabog-debelug, ele enapeleg on fam hweag-esauk anyo, “Airoho eheik,” ulug, ahamdoho hweag-esauk on wereg eleg halug ai, henele eleg angge bok wereg lit, henendaman neg yig-deheg, Allah hweag-ereheg, duruk kamek.

²⁹It ap Allah en wene hweag-esauk kweleg, hweag-esauk anyo, enebe biren henahan en wene hweag-hesauk kamag. Ne, wene hweag-hesauk kweleg, it foman wene hweag-hesauk anyo, “Wene ai Allah wene hweag-nesauk a? Amu wene hweag-nesauk a?” ulug, fureberuk kamag.

³⁰It hweag-hesauk mu, ap amu on eke hwerieg kweleg, Allah Aheime endama kuruk kwit, fagdoho hweag-utuk kweleg, hweag-esamin boruk halug, atam uhureg bok atuk kweleg, uhu ai fano.

³¹Hit mundoho hol-deheg, henenda aho wat-wat eheg, dahup ulug, Allah wene fobikdeg atamdeg biling-biling uruk kamuhup ai fano.

³²At Allah en nit demdoho boruk on Yesus omaliki anyo kabog-debelug, wene naleg-haleg uruk kamuhup ai, boruk eleg. Ite, enenda seberoho enahayeg wereg lit, Allah wene at eke en uruk on hol-hol dauk kamag, boruk mu, it ap Allah en wene hweag-esauk kweleg, hweag-esa ale enepuk famen, sebele folug welatlug, at atam hweag-esauk on anyo hweag-esalug, bok atuk kweleg, fobik hweag-esauk ale re fano. It Yesus omaliki di o su o kabog-debelug duruk hag,

³³

³⁴hit Yesus omaliki kabog-duruk li, it homi ai enele eleg angge welamag, it enele uhup hayog. Ne, iren melal-enebuhup fug. Wene ai, nit Yahudi on nenewene melaleg higitdoho.

³⁵Yesus omaliki kabogdeg enenggelegman, homi en hweag-esauk halug, enenggali am no, wene eke it enapeleg atuk halug, hummen hein og-esahup fug. Ite, enobam lalug, enehunsi boruk ale hein og-esauk halug, hweag-esahup fano.

³⁶Aireg ma, Allah wene hwalduk on nit deg ma ulug, uruk kahep a? Hit neg henobahet hweag-hesasi mu ulug, uruk kahep?

³⁷Ai fug. Hit eke en, “An Allah wene hweag-esauk karuhuk en karunia nobahasi hihi,” ulug, eheg, ne, eke en, “An duruk karuhuk ulug, Allah Aheime en karunia diroho og-nitsi hihi,” ulug, eheg, uruk anyo en, “Wene su re, Tuhan ele Paulus hweag-utuk kweleg, bal-nesasi hehe,” ulug, henenda furebeiyek.

³⁸Ap misig en, an wene yoho bal-hisihi su, “An wahuk nerim,” ulug, sahaloho embeseruk halug, hiren airoho at ele sahaloho embeseiyek.

³⁹Ai halug, nori, nerekwi. Hiren, “Allah en wene hweag-nesauk kweleg, hweag-esauk kamuhuk ulug, og-nesowag e,” ulug, henenda ningdoho duhup famen, duruk kwit, it foman ele enapeleg on oho folug hweag-esauk anyo, “Duk fug,” ulug, hweag-esa fug.

⁴⁰Hit di ale su ale duruk kwit, mun fano hwaloho neg duruk kamek.