Read Ninia Yali 1 KORINTUS 15 Bible Online

1 KORINTUS 15 - Ninia Yali bible

1 KORINTUS 15

¹Nori, nerekwi inim. Ketia an Fano Wene atag hweag-hesauihik mu, wauhupdeg, henenda Kristus obam dip-debelug welahep wene anyo eberoho hweag-hesa.

²Hweag-hesauihik anyo, hiren mun hambukdoho foroho lamuhup halug, wene ai fam henahap wendaruhu famen, demdoho bouk fug angge we alemaroho wauhup ane?

³ Aireg ma, an wene wauihik anyo hit mun alongdeg bohup ulug, hweag-hesauihik anyo ebe su. Allah wene ebag on lisu baleg higitdoho, nit siag duruk ale en Kristus nenobahet waratsi.

⁴ Waratsi mu, at ebe oko owikmu kwelabe fousa. Kwelabe fousa ma, Allah en lisu baleg higitdoho, noho biren noholug, oluk apdoho unduhuk fesi.

⁵ Unduhuk fesi mu, at Yesus en Petrus il neowag ulug, unug-itsireg, ai en, fobik ap nesanggoen inil neowag ulug, unug-esasi.

⁶Anyo unug-esasireg, nenori enebe humdoho 500 misigmu kabogdeg ma inil howag ulug, unug-esasi. It ap homi unug-esasi on anyo foma mun waratswa famen, foma humdoho ai waram fug angge eneluk wereg.

⁷Airoho unug-esasireg, Yakobus unug-ereheg, ori rasul nesanggoen on anyo mundoho unug-eseheg, disi.

⁸ Ai disireg, an anyo omalik[14] endag-aikoho lit owandeg ulug, ebereg eleg man, endag-atuk anyo hag, an airoho ebereg eleg man, nil howag ulug, ahae fotogdoho an unug-nitsi.

⁹ An o endam en Yesus omaliki jemaat Allah anyo lal-faldoho enebil noruk katihik men, “Rasul,” hweag-nutuk kalep fug famen, an anyo it ap rasul mun enapma hag welamag ulug, eneko unduhuk nobahasi abi!

¹⁰Aireg ma, at Allah en nelaheg bolug napsi fam, ketia nobabut amuroho hag dil noruk kahi ai neauk kahep. Allah nelaheg bolug napsi anyo re we alemaroho napsi fug. It rasul foma anyo re, we alongdoho hag dil lauk katswa famen, an neg de yabuk mun alongdoho duruk katihik. Ai duruk katihik ai re, an den de fug. Ite. Allah en nelaheg bolug napuk kweleg, nenda ahanhan furoho duruk katihik mu, ulug, hweag-hisihi.

¹¹Hit Fano Wene wauhupdeg, demdoho boruhup anyo it duruk katswa fam ane? An duruk katihik fam a? Ai along eleg. Ite, nit mundoho en hit Fano Wene wauhupdeg demdoho boruhup anyo hweag-hesauhuk mu, hit demdoho boruhup ai neg de alongdeg boruk kahi.

¹²At Kristus anyo waratlug lauk men, oluk apdoho unduhuk fesi wene, niren hweag-hesauk kweleg, demdoho boruhup mu, ketia nunggwelug hit foman uruk kwit, “Ap homi waratuk on anyo eneluk apdoho unduhuk fesehu fug,” ulug, uruk kahep?

¹³“Ap homi fobik waratlug eneluk amuhup fug,” ulug, uruk kahep ai demdoho halug, at Yesus waratlug, oluk atsi fug, boruk kalep.

¹⁴Ne, at Kristus waratsireg, ai oluk alep fug men, nit wene hweag-hesauk kahe anyo de, indip elegdeg ma, we alemaroho hesangge-besangge hagdoho hweag-hesauk kala man, hit oho henenda we alemaroho demdoho boruhuk belep.

¹⁵Ne, ai neg fug. It ap homi waratuk on anyo fahet eneluk apdoho unduhuk fesehu demdoho deg lalep fug men, Allah en Kristus unduhuk fesi anyo fahet, “Eleg. Oluk apdoho unduhuk fesi,” ulug, hweag-hesauk katuhuk mu, nit mel seiale uruk katswa boruk kalep.

¹⁶Ai, it ap homi waratswa anyo eneluk apdoho unduhuk fesehu eleg halug, at Kristus waratsireg, oluk atsi anyo, oluk atsi fug, mundoho waratsi boruk kalep.

¹⁷Ne, at Kristus oluk apdoho unduhuk felep fug men, hit henenda demdoho boruk kahep anyo we alemaroho boruk kalep, henesiag mun henobam sahalireg lalep.

¹⁸Ne, at Kristus oluk alep fug men, it Kristus inim hundig lit, waratswa on anyo mel fobik oluk apdoho unduhuk fesouk fug angge mondabi waralep.

¹⁹Nit airoho kwenangma dia neg Kristus fano nenebuhu, bolug, nenenda ebereg wereg lahe halug,[15] “Hit demdoho boruk eleg on henelaheg,” ulug, hweag-esauk kahe famen, iren, “Hit neg de henelaheg e,” ulug, hweag-nesauk kalep.

²⁰Ai famen de, at Kristus oluk apdoho fesi eleg de fug. Unduhuk fesi mu siburu keram unggul seralduk hag, it waratuk men, atam oluk apdoho unduhuk fesi anyo re at.

²¹Ap Adam en siag debag anyo fam, nit mundoho waratuk katuhuk famen, fobik Yesus disi anyo famen, nit mundoho waratuk men, neneluk apdoho unduhuk nenobahaku.

²²Nit mundoho Adam ninim hundig lit, waratuk kahe famen, ketia nit ap homi Kristus ninim hundig lit, waratuk halug, mun neneluk welamuhuk, ulug, unduhuk nenobahaku.

²³Ai duruk kwit, mun higit-higit unduhuk nenobahaku. At Kristus ai siburu atam unggul seraleg hag, atam oluk apdoho unduhuk fesi mu, at fobik waruhureg, at omaliki ninim hundig welahe anyo mundoho oluk apdoho unduhuk nenobahaku.

²⁴ Ai nenebikoho waruhu anyo re, o ahae fotog fam waruhu mu, at Allah en, “It ninim minggirig on wereg anyo sebeloho feseruk eleg kweleg, Kristus neg leho welamag,” ulug, wenggelfag ma, di mungguat su mungguat inim, ap humon ap homi fahat-enesug on inim, enalong wereg on inim, it Allah inim minggirig wereg on mundoho sebeloho fesehureg, nit at Allah apma welamag ulug, at omalikiap nenepsi anyo neg, og-neneplug, Allah apma nenobahaik lahu.

²⁵

²⁶Allah inim weimdeg on anyo elehapdoho fesehureg, ambiangma re waratuk on indip anyo mun elehapdoho fohu.

²⁷ Allah en, “Di angge su angge mundoho sebeloho at Kristus apma fesi,” ulug, Allah wene fam lisu baleg anyo re, at Allah en, “An nebe inim, at Kristus apma sebe ulug welaruhuk,” ebag, bohup fug.

²⁸Ite, di angge su angge, di ap homi su ap homi inim, mundoho Allah en sebeloho Kristus apma fesehureg, ai en, Allah amu neg leho wereg lit, di o su o at ele neg mun sahareg laruhu, ulug, amloho en uruk kwit, “Hat Nakni, di angge su angge napma nobaharihin anyo, ketia an hamloho hapma sebe ulug, hweag-hitmin,” bolug, ebag.

²⁹It ap waratuk on enobalma, ikma belap-enepuk anyo re, nunggwelug belap-enepuk behep? It wareg on eneluk apdoho unduhuk fesehu fug halug, nunggwelug it enowe enaut waratuk mu, it enobalma ikma belap-nenebukwag ulug, uruk behep?

³⁰Ne, nit nanggoho behep? Allah en neneluk apdoho unduhuk nenobahaku fug halug, nit hupmu hubet nenowarukoho duruk kweleg, nenembong seroho bok welamuhuk behep?

³¹Eleg. An waramag ulug, hundig-hundig nowarukoho duruk kweleg, esauk kahi mu, hit Yesus Kristus Tuhan fam hundig welahep halug, an ai fam leho fahat-dauk kahi mu, su demdoho bohup ulug, fagdoho hweag-hisihi, nori, nerekwi.

³² Ap homi wareg on eneluk apdoho unduhuk fesehu fug halug, an o Efesus suma wereg lit, olomene ap homi senggel-enepuk on hag, ap homi ninim yeik yapihik ai fam, an nunggwangge hwelahuk ulug, dirihik behep? Eleg ma, enele unggutdoho uruk kwit, “Nit sono waramuhuk mu, yoho elamna nenahayegdoho nauk kamul,” ulug uruk anyo hag, boruk kala.

³³“Hit henebut fano wereg on en ap homi siag duruk on hinim noruk halug, hinim siag dahup,” ulug, uruk kahe anyo demdoho uruk mu, ap homi en wene amu on hweag-hesauk kwit, lal-henebuk no henenda furebeiyek.

³⁴Siag duruk kahep on ai, embeselug de, ketia henepe hebel-amek. Hit eke Allah ebe henapeleg welahep ai en, henenggali waroho hweag-hisihi ai.

³⁵Hit foman uruk kwit, “Nit waratuk kahe anyo, nanggoho enoluk am alereg behep? Nenahap nunggwangge hagdoho nenobahaku,” ulug, uruk mu hesauihik mu, yaho!

³⁶Hit ap morue on en hag uruk kam fug. Sowabuk a yatuk anyo ahap filik atlug fehelduk halug, ebe wilipuk anyo henapeleg a?

³⁷Hit di angge su angge a yatuk kahep anyo, a yatuk kwit, ebe fobik wilibuhu on ai yatuk kahep fug. Ite, sowabuk a, di a su a amu on ane, a ai neg yatuk kahep.

³⁸Ne, Allah en wilip-amag boruk on higitdoho neg wilip-atuk. Anggen hundomog wereg on omano ebe oho hundomog Allah en neg og-esauk.

³⁹Di angge su angge amep wereg on waldeg ai, ahap orohole misig on wereg fug. Ap enahap amu, wam enahap amu, suwe enahap amu, ikan enahap amu neg wereg.

⁴⁰Ai hagdoho, boholma wal-debag on anyo orohole amu amu heheg, ne, kwenangma di angge su angge wal-debag anyo enorohole amu amu heheg, wereg.

⁴¹Mo ambogbag amu, bigalem ambogbag amu, sohwalanggen ambogbag amu, ne, sohwalanggen foma ambogbag amu on neg wereg anyo.

⁴²Ai hag, Allah en it waratuk on eneluk apdoho unduhuk fesehu ai, airoho. Ap homi en a yatuk hag, nit nenahap filik am on su hogdoho embeselug, obalma mun welaruhu on wan-nenobahakeg,

⁴³waratuk mu nenahap siag on anyo hogdoho embeselug, obalma fano on ket buhundeg on wan-nenobahakeg, maben on anyo mun embeselug, obalma mun omamne on og-neseheg,

⁴⁴ne, kwenangma on anyo embeselug, obalma keron Allah Aheime hag on buhundoho nenobahakeg, duhu. Nit kwenangma suma welamag ulug, nenahap kwenangma on wan-nenobahasi anyo hagdoho, fobik boholma welamag ulug, nenahap boholma on wan-nenobahaku lit deg.

⁴⁵ Allah wene lisu baleg de diroho. “At Adam atam on ai ebe oluk welamag ulug wal-debag,” ulug, ebag ale lisu balfag famen, at Adam fobik on ai, Aheime en enelugap enepuk on wahasi.

⁴⁶Ai halug, kwenangma on atam watfag. Boholma on de fug. Ite, boholma on fobik mondorik wahasi.

⁴⁷Adam atag wal-debag anyo de, kwenangma on wal-debag. Ne, Adam fobik wahasi anyo re, at indip boholman wahasi.

⁴⁸Adam atag kwenangma on wal-debag ma, nit at omaliki kwenangma on welahe. Ne, at boholman wahasi anyo en omalikiap nenepsi anyo re, boholma on neg wereg.

⁴⁹Ne, nit ap kwenangma on wal-debag orohole welahe anyo hag, fobik at boholma wahasi on orohole anyo hagdoho[16] nenobahaku.

⁵⁰Nori, nerekwi. An wene hweag-hesauk kahi su, hit furobahat-dahup ulug, hweag-hesa. Nenahap kwenangma on su hogdoho eleg atuk eleg kweleg, Allah apma feserukmu nenobahaku fug. Ne, nenahap filik aruhu on hogdoho embeseruk eleg kweleg, nenahap keron mun welaruhu on wan-nenobahaku fug neg.

⁵¹ Nori, nerekwi inim. Wene ling-long heraho ale eke hweag-hesa. Nit mundoho waramuhuk fug famen, nit wongdeg ma ninil lambog uruk hag, o ahae fotogdoho bohweap trompet ele uruk kweleg, nit mundoho nenahap amuroho nenobahaku. Bohweap trompet ele uhu mu, it ap homi waratswa on anyo mundoho enebelal wowag ulug, eneluk apdoho unduhuk fesehureg, nit mundoho nenebe muninoho nenobahaku.

⁵²

⁵³Nenahap filik atuk on su hogdoho embeselug, mundoho welaruhu on wan-nenobaharuk kwit, waratuk on anyo re embeselug, nabelal-habelaldoho nenobahaku.

⁵⁴ Nenebe filik atuk on su, filik aruhu fug on wan-dahukdeg, waratuk kahe on su, waratuk eleg on wan-deheg, duhuk. Airoho duhuk ai fam, wene diroho ulug lisu baloho febag on ai ebe demdoho aruhu. “Di angge su angge homdoho nauk hag Allah omamne atlug waratuk indip ai elehap debehu.”

⁵⁵ Airoho elehap duhureg, hein og-hauk kwit, “Ap homi waratuk on indip su, yei. Homamne ke abi? Haeg en senggel-enepuk kahen anyo, haeg olok ke abi?” ulug, ebag ma, lisu baloho febag ai, demdoho aruhu.

⁵⁶Waratuk on indip aeg en senggel-nenepuk ai, ebe re nit siag duruk kahe ai fam aeg en senggel-nenepuk mu waratuk kahe ai. Ne, siag duruk kahe on omamne atfag ai, ebe re Allah en melal-nenepfag wene ai fam omamne atfag.

⁵⁷Famen de, at Tuhan Yesus Kristus disi fam, nit siag duk ale nenepuk anyo sebeloho folug, fano neg welamag ulug, omamne og-nesauk mu, nenakni Allah dang-duruk kwit, at neg mot-duruk kamul.

⁵⁸Ai halug, nori, nerekwi. Hit an nenda hundig deg ma, henenda mun hambuk lele wareg lit, Tuhan eyabuk wutuk halug de, we alemaroho duruk eleg, eke hwelag lahuk en duruk kahe henelukdeg ma, hindik-hundig fuk-dil fak-dil duruk kamek.