Read Ninia Yali 1 KORINTUS 16 Bible Online

1 KORINTUS 16 - Ninia Yali bible

1 KORINTUS 16

¹ An den, it Yesus omaliki di jemaat su jemaat o Galatia on wene melaloho hweag-esauihik hagdoho ketia hiren it Yesus omaliki di o su o wereg on enobahet uang andog-duruk kamuhup en, wene eke su hweag-hesa.

²An waruhukdeg, “Uang kabog-diek,” ulug, hweag-hesahuk ale re nerim deg ma, hit wauk kahep ale higitdoho, somban uruk salim, it enobahet misig dopno-heheg andogdoho foruk kamek.

³An waruhukdeg, hit uang kabog-debehup on ai, o Yerusalem walug lowag ulug, ap enebut fano on neg eneko unduhuk fesehup mu, walug og-esa lauk mu, Yesus omaliki o Yerusalem on eneluk amag ulug, an lisu baloho inim mon-enebuhuk.

⁴Ne, an inim la alereg halug, it ninim lahuk ai re fano.

⁵ An Makedonia lahuk berihik mu re, lahukdeg, henesa waruhuk.

⁶Henesa waruhukdeg, o sanimdeg halug, hit ninim, etma dorangge welatlug o sanim anyo eleg atuk halug, lahuk ane? An den neg nenda wenggele folug lauk nealug, monde nobahaik lahup ai re fano.

⁷An we elamna kumu hesalug waruhuk ai nerim. Ite, we lohon welatlug hag waruhuk boruk kahi famen, Tuhan en enda boruk halug neg duhuk.

⁸ It nenele sahalduk on humdoho wereg famen, an den Allah wene hweag-esauk men, it wa on humdoho suma wereg au en, “Iyale aha,” ulug, hweag-esauk karuhuk berihik mu, soni Pentakosta eseruhup ale owan nangno-hauk kwit, an o Efesus suma welaruhuk behi.

¹⁰ An den Tuhan eyabuk wutuk kahi hag, at Timotius airoho duruk mu, akol beil henakit waharuk mu, at ebe furoho wakiyug.

¹¹At hesa waharuk halug, “Nimi su nong-hongdeg omalik mondorik wahasi,” bouk fug. Ite, nori foma nea wamuhup on nangno-enepuk kahi anyo waharuk kwit, at nim enda ahayeg fam nea wamag ulug, mondorik manu.

¹²Ne, at nenare Apolos anyo at ori foma nim hit henesa wamag ulug, an den nele abiroho hweag-utuk kahi famen, “Etma waruhuk,” ulug, demdoho boruk fug mu,[17] hesa wam ale duruk halug, hesa waruhu.

¹³Hit henakol eleg angge henembong seroho wereg lit, Yesus demdoho boruk kahep anyo fam, henepe hibil-hebeloho henenda hambukdeg welamek.

¹⁴Hit duruk kahep ale ai, mundoho ap homi henenda hundig en dil noruk kamek.

¹⁵ Ne, at Stefanus omaliki nim o Akhaya en atam Yesus omaliki atswareg, “It Allah omaliki demdoho boruk on nit let-enepuk kamul,” ulug, duruk katswa ale henelukdeg. It ap ai duruk ale inim, enapma wereg lit, it inim yabuk duruk anyo, hinim seberoho dil noruk kamuhup ulug, hweag-hesauk kahi, nori, nerekwi.

¹⁷Ai halug, hit waharuk eleg kweleg, henobalma ap Stefanus mel, Fortunatus mel, Akhaikus mel, nea wahausareg, hit henenda henahayeg henepswa anyo hag, an airoho nenda nahayeg apdoho nobahausa ma, an ketia nahayeg humon welahi. It ap airoho on hesa waharuk halug, leho feseruk kamek.

¹⁹ It Yesus omaliki di jemaat su jemaat o Asia on en dang-henepuk. Ap Akwila ohwe Priskila nim, it Yesus omaliki enobam kabog-duruk on mel, ai, it hinim henenda hundig neg deg ma, “Ninim Yesus omaliki,” ulug, humdoho dang-henebehesa.

²⁰Ne, it nenori Yesus omaliki suma mundoho en dang-henebehesa. Hit hit dang-dang atuk kwit, mako bug-bug atuk kamuhup.

²¹An Paulus nonggwareg nenggik en ahae fotog fam lisu bal-hesauk kwit, dang-henebihi.

²²Ap misig eke Tuhan enda boruk eleg halug, hururungdeg welamag. “Maranatha!” Ai, nit nenele fam, “Tuhan folo-folo wamag,” uk hag.

²³Tuhan Yesus Kristus henelaheg boruk mu, fahat-henesug laruhu.

²⁴Kristus Yesus ninim, nenda hundig welahi mu, hit mundoho ninim nenda hundig neg welahi, ulug, an Paulus en lisu su bal-hisihi.