Read Ninia Yali 1 KORINTUS 2 Bible Online

1 KORINTUS 2 - Ninia Yali bible

1 KORINTUS 2

¹Nori, nerekwi. Endam Allah wene ap homi kwenangma on enepeleg ma heraho welatfag wene[2] anyo, hweag-hesamin ulug, henekit waharihikdeg, hit henahayeg boukwag ulug, “An nenda wereg,” boruk kwit, nele ahalue fam hweag-hesauihik fug.

²An henenggelegma wereg lit, di wene su wene hesangge hweag-hesahuk berihik fug. Ite, Yesus Kristus disi wene neg hweag-hesauk kwit, at e salib fam watswa ale anyo neg ebereg lit, hweag-hesauk karuhuk berihik.

³ An nebe nomamne eleg ma, nakol en nowag elek duruk kwit, hinim welatihik.

⁴Hit henenda demdoho boruk anyo, ap homi enenda wereg lit il noruk fam dip-debelug welam no ulug, hweag-hesauk katihik fug. Ite, Allah omamne fam henebil lauk anyo neg dip-debelug, welamuhup ulug, an henenggelegma ninim wene baleheg, Allah wene hweag-heseheg, duruk kwit, nenda wereg on hag, nele ahalue dep-dep hweag-hesauk katihik fug. Ite, hit demdoho bohup ulug, Allah Aheime omamne henepuk ale enegdeg kweleg, hweag-hesauk katihik anyo.

⁶Aireg famen, it ap demdoho bolug enenda wirik atswa on halug, wene nenenda wereg on anyo hweag-esauk kahe famen, wene nenenda wereg lit, hweag-esauk kahe ai, kwenangma wene on fug. Ne, it ap enalong wereg on kwenangma suma wereg on ketia eleg ail lauk anyo enenda wereg lit, wene hweag-esauk anyo hag fug neg.

⁷Ite, nenenda wereg lit uruk kahe ai, wene o endam bohol kwenang wal-duk fug li, ap homi kwenangma on enapeleg kweleg, Allah en nit leho nenobahakuk ulug, enda wereg lit herako wenggelfag wene anyo neg, il noruk kahe.

⁸At Allah enda wereg lit wenggelfag ai, it ap ketia kwenangma suma wereg on enalong wereg on anyo en, furebousa fug. Iren furebelep man, at Tuhan mun leho wereg on e salib fam watswa ai watlep fug.

⁹ Wene hweag-hesauk katuhuk ai, “At Allah en ap homi inil hauk eleg on mel, enesanggo holduk eleg on mel, Airoho duhuk, ulug, enenda wenggelduk eleg on mel, ai on mundoho, it ap at inim enenda hundig boruk anyo enobahet fik-foukdoho fesebag ma, wereg,” ulug, ebag ale Allah wene fam lisu baleg anyo higitdoho il noruk kahe.

¹⁰Airoho fesebag famen,[3] Allah en wene ling-long heraho welatfag anyo, it dagma on eleg, ite, nit neg Allah Aheime en unug-nesasi. At Allah Aheime anyo en di wene su wene indip mundoho fureberuk mu, fureberuk kwit, Allah endama “Duhuk,” ulug, heraho ale ai inim furebelug, unug-nesauk.

¹¹Ap eke enda wenggelduk anyo, it foma enapeleg kweleg, at endama amu olukdeg fug behep? At onggwareg amu olukdeg ai hag, Allah endama boruk ale anyo at Allah Aheime amu neg olukdeg.

¹²Allah en nit we onggoleg og-nesasi anyo, neneluk amuhuk ulug, ap homi kwenangma on enenda boruk on anyo hwelauhuk fug. Ite, Allah en at Aheime mon-nesa wahasi anyo neg hwelauhuk.

¹³Ai halug, niren ap homi Allah Aheime enendama wereg on Allah Aheime en unug-nesauk wene furoho hweag-esauk kahe ai, ap homi en, “Nenenda wereg,” bolug, hweag-esauk hagdoho hweag-esauk kahe fug. Ite, Allah Aheime en, “Diroho uruk kamek,” ulug, hweag-nesauk kweleg neg, hweag-esauk kahe.

¹⁴Allah Aheime en wenggeloho hweag-nesauk ai re, Allah Aheime enendama wereg halug[4] neg furoho hauk mu, it ap homi kwenangma on anyo Allah Aheime enendama eleg ma, wene ai hole folug, we hesangge wongdeg lit, “Morue wene hag hehe,” ulug, embeseruk.

¹⁵Ai famen, at Allah Aheime nenendama wereg halug neg de, di angge su angge duruk indip furebelug duk alereg ma, dil noruk kweleg, ap homi en, “Siag dil noruk mu hesehe,” ulug, hweag-nesa fug alereg.

¹⁶ Wene ai fahet de, “Allah boruk ale ap sa olukdeg? Ap sa hag angge en at komoruk alereg? Mun eleg!” ulug, Allah wene fam lisu baleg wereg famen, Kristus enda wenggelduk ale higitdoho wenggelduk kahe on nit neg.