Read Ninia Yali 1 KORINTUS 3 Bible Online

1 KORINTUS 3 - Ninia Yali bible

1 KORINTUS 3

¹Nori, nerekwi. Ebe an atam henekit waharihikdeg, it ap homi Allah Aheime inim hundig on halug, hweag-esauk kahi hag, an den hit airoho hweag-hesauihik fug. Hit dam Kristus demdoho boruhup famen, ap homi o kwenangma on boruk anyo hag wereg lit, henenda owan wirik am fug angge, omalik fouon hag wereg ma hesauihikdeg, hweag-hesa waharihik anyo.

² Henesiburu omamne on nowag ulug og-hesahuk berihik famen, henenda wirik atuk eleg halug, we ahowe hag neg og-hesahuk berihik anyo re. Henobabut endam on anyo eleg am fug angge wereg lahep ma, ketia oho omamne on og-hesa fug alereg ma hisihi. Henenggelegma en, “An along, hat along,” eheg, suahal eheg, duruk kahep famen, henobabut endam on ap homi kwenangma Allah enapeleg on en duruk hag duruk kahep.

⁴ Ne, hit eke en uruk kwit, “An nakni Paulus,” eheg, ne, hit eke en, “An nakni Apolos,” eheg, uruk kahep ai famen, it ap homi kwenangma on en uruk hag, hit higitdoho il noruk kahep ai eleg a? Uruk kahep.

⁵An Paulus mel, at Apolos mel, eta sa mel, ulug, uruk kahep? Eleg. At ninim ai Allah amingming angge neg deg lahe ma, Tuhan en duruk kamag ulug, nenemu hundomog unduhuk nenobahasi anyo neg higitdoho hweag-hesauk kweleg, hit Yesus demdoho boruhup.

⁶ An den a yareheg, Apolos en ik hilileheg, duruk kweleg, Allah en neg de, a fehelukwag ulug, disi.

⁷Aireg ma, at a yatuk on mel, ik hililduk on mel, ai along fug. Ite, at a fehelukwag ulug duruk on Allah ai neg de alongdeg.

⁸At a yatuk on mel, ik hililduk on mel, eta inim higitdeg ma, hundig-hundig duruk kamuhuk halug, at Allah en nenemu hundomog duruk kahe ale higitdoho onggo og-nesahu.

⁹Nit Allah ninim hundig lit, yabuk wutuk kahe ma, Allah eyabuk wirig nim, obam wirig nim hag ai hit henebe welahep.

¹⁰An dil lauk kamag ulug, Allah enda hundig en unduhuk nobahasi anyo higitdoho dil lauk kwit, ap enggik buhundoho o witil lauk hag, an o anduli furoho belabil lauihik ai fam it ap amu on en ebe wutuk mu, it enemu hundomog ebe wutuk anyo en hesangge wuruk no, an anduli belapihik anyo fam neg, enenda furebelug wutuk kamag.

¹¹At Allah en Yesus Kristus amu neg o anduli belabe fesi mu, amu on eke mel belabuk fug alereg.

¹²O anduli belabeg ai fam wutuk kwit, nit foman bosie emas fam wireheg, foman bosie perak fam wireheg, foman helep siye amumulit on fam wireheg, foman e fam wireheg, foman walengge a, enggelangge ane anyo fam wireheg, dil lauk kamuhup famen,

¹³fobik Kristus waruhu salim neg, eta, nit nenemu domog wutuk kamuhuk anyo, “Fano duruhuk a? Siag duruhuk a?” neneluk amag ulug, indok fam wal-hahu mu, mun enam atuk mu, hahuk.

¹⁴Nit o anduli ai emberimmu wutuk kamuhuk on anyo, indok fam wal-hahu mu, doleleng uruk halug, ai on onggo hwelahuk.

¹⁵Ne, nauk halug de, nenebe indok nahu fug nenahap wendaruhu famen, onggo neg de hwelahuk fug.

¹⁶ Hit Yesus omaliki henebe seberoho ai, Allah obam wirig deg ma, Allah Aheime henilonggoma wereg anyo henapeleg a?

¹⁷Allah obam wirig ai, at obahet neg mun eneko wereg anyo hit henebe deg ma, ap eke en Allah obam wirig anyo siahapdoho foruk halug, onggo Allah en ap ai siahapdoho fohu.

¹⁸Hiren di deheg su deheg duruk kwit, “An mun noluk,” bolug, dil noruk fam lal-dauk kahep ma, airoho duk fug. It ap homi kwenangma on en, “Nit mun nenelukdeg ma, nenenda wereg,” ulug, boruk hag, hit eke airoho boruk halug, Allah en henenda wereg on boukwag ulug, morue hag atlug welamek.

¹⁹ It ap homi kwenangma on en, “Mun nenelukdeg ma, nenenda wereg on welahe,” boruk famen, Allah en it il esauk kwit, “Su morue hag il noruk,” ulug, boruk. Ap eke Allah en hweag-utuk kweleg uruk kwit, “Bak sabu yepdegma luhut-atuk mu watuk hag, it ap homi kwenangma on en wene enenda wereg lit, lal-enepuk ai fam luhut-atuk mu, Allah en siahap enebuhu en wereg,” ulug, ebag ale Allah wene fam lisu baleg wereg.

²⁰ Ne, eke uruk kwit, “It ap homi mundoho nenenda wereg bolug, wenggeldil lauk anyo we alemaroho wenggeldil lauk ai, an nolukdeg lahi,” ulug, ebag ale lisu baleg wereg.

²¹Ai halug, it ap homi enendan wenggele folug dil noruk anyo leho fesouk fug. An Paulus mel, at Apolos mel, at Petrus mel, di angge su angge Allah wal-debag mel, eneluk wereg on mel, waratuk on mel, ketia wereg on mel, fobik welamuhup on mel, munangge manangge mundoho ai re hit henonggwareg neg.

²³Ne, hit henebe ai Kristus angge. Ne, Kristus ebe re Allah angge wereg.