Read Ninia Yali 1 KORINTUS 4 Bible Online

1 KORINTUS 4 - Ninia Yali bible

1 KORINTUS 4

¹Aireg ma, Allah wene heraho kwenangma suma enapeleg anyo fag-duruk on nenobahasi mu, nit Kristus amingming angge demdoho wereg boruk kamek.

²Enaknisi en enamingming angge yabuk dukwag ulug unduhuk feselug, dil lauk kweleg, iren along boruk on de, “An hweag-isihi on anyo furoho duruk mu esamin ane, eleg a?” ulug, inil en og-enepuk kwit wereg.

³Aireg ma, hiren oho, it ap homi enewene bilinggoho hweag-esauk on en oho, an duruk kahi ale fu nobahalug, hweag-nutuk halug, an holuhuk fug. Ne, an duruk kahi ale mel, furebahat-dauk kahi fug neg.

⁴An dil neg lauk kwit, siag dirihik eke nenda ebereg welahi fug famen, eke wereg kweleg, fano neg duruk kahi ihi ha no, nakol en bok welahi mu, at Tuhan en neg siag fano ulug hweag-nom alereg.

⁵Ai halug, it ap homi eneko enewene baluhu sali owan aik waharuk eleg kweleg, hiren ap homi siag hesangge enobam louk debesouk fug. Ite, Tuhan waruhureg neg de, wene heraho wereg anyo enamegma feheg, nenendama wenggelduk kahe anyo fagdoho hweag-neseheg, duruk halug, ai salim Allah en nenemu hundomog duruk kamuhuk anyo higitdoho ahayeg nenobam fohu mu, waharuk eleg kweleg, ap homi hesangge siag enobam feseruk kam fug.

⁶Aireg ma, nori, nerekwi. An wene hweag-hisihi ai, hiren, at eke, “Along,” ulug, leho feheg, at eke, “Mabendeg,” ulug, henerim beheg, duruk kwit, “Wene melaleg wereg on ai furoho duruk kamek,” ulug, uruk ale sahaloho fehep ha no, an Apolos nim, duruk kahe ale hit hwelakiyug ulug, nit nenebe fam wal-heheg, hweag-hesehe.

⁷Henori sebeleg kweleg, san leho henobahasi mu, uruk kahep? Allah en og-hesasi fug mu, hiren hwelauhup angge ke foroho lahep? Eleg. Allah en neg og-hesasi famen, nunggwelug henemu en hwelauhupdeg hagdoho along balong uruk kahep?

⁸Hit di angge su angge mundoho hwelauhup behi. Mundoho henenggik wereg on atuhup behi. Nit morue hag wereg kweleg, hit neg de henunuk bogdeg atuhup behi. Hit airoho henunuk bogdeg alep man, nit ninim nenunuk bogdeg welala e, famen de, eleg.

⁹It Allah ayonggo boholma noruk on malaikat mel, kwenangma enap en enamitmit duruk on mel, mundoho inil hanim nenepuk mu, ap waramag ulug, enowarukoho lit, enunuk sebeleg on fotog-fotogma enenggaliroho erare feselug, enowatuk hag, nit Allah en di o su o rasul mon-nenepsi anyo mun fotog-fotogma airoho nenenggaliroho erare nenobaharuk behi.

¹⁰Hit ai, Kristus hinim hundigmu henenda wereg on welahep. Ne, nit neg de Kristus wene hweag-isil noruk kahe fam morue on hag boruk. Hit henomamne humdeg famen, nit neg de nenomamne eleg mabendeg on. Hit leho welahep famen de, nit de siag sebeleg on boruk.

¹¹O atam en ketia huli o kwenangma dia wereg lit, nenahaik nenesiburu obok nenebeheg, nenesum dilip-dilip lauk kweleg, yeik nenowareheg, nenobam wirig eleg ma hesangge ekema nohokeg, dil noruk kahe.

¹² Ai dil noruk kwit, nenenggik fam neg asingsing fululukdoho witil noruk kahe. Hururung nenepuk kweleg, nenahayeg enobam feheg, siahap biahapdoho nenobaharuk kweleg, nenenda hambukdoho bok aheg,

¹³bilip-nenepuk kweleg, niren nenele sako fam neg onggo hweag-eseheg, duruk kweleg, ap homi kwenangma on en ahap angge siag on mel horoho hwik-esauk on hag, o atam en angge ketia huli aireg on neg boruk kwit, nenepuk.

¹⁴An wene lisu bal-hisihi su re henenggali apdoho henobahamin ulug, bal-hisihi fug. Ite, hit an nomaliki nenda hundigdeg ma, komo-henepuk kahi.

¹⁵Fahat-henesug lit, Kristus duruk katsi wene hweag-hesowag ulug anyo, enebe 10.000 en hag wereg famen, mundoho henaknisi eleg. Kristus Yesus en mon-napsi mu henenggalegma wereg lit, Fano Wene hweag-hesauk katihik mu, henakni an namu neg welahi.

¹⁶ Aireg ma, an duruk kahi ale nowal-heheg duruk kamuhup ulug, heng-henepuk kahi.

¹⁷Ai halug, an namloho endetihik on hag, nenda hundig nenowe Yesus Kristus wene furebelug mutlug lauk on, Timotius anyo, henakit mondorik waharihik mu, henenggelegma wereg lit, an Kristus ninim hundig lit, duruk kahi ale, Yesus omaliki di obam su obam kabogdeg wereg anyo hweag-isil laheg, duruk kahi wene hweag-hesauk karuhu.

¹⁸It foman, “At Paulus nenesa waruhu fug,” bolug, winik-wonog uruk.

¹⁹Airoho uruk famen, Tuhan en, “Fano lowag,” boruk halug, an folo-folo henesa waruhuk boruk kahi. Henesa waruhuk deg, it ap homi en, “An airoho dirihik,” ulug, winik-wonog uruk ai, “It demdoho duruk kwit, uruk ane? We enele fam il noruk a?” ulug, furebeseik waruhuk.

²⁰Ai re, “Allah apma welahe,” ulug, enele fam uhup halug neg, uruk fug. We, enomamneroho duruk kamuhup halug neg, uruk.

²¹Aireg ma, an hesa waharuk kwit, yeik walug hesa waruhuk ane? Nenda sakoreg fam henelaheg boruk kwit, henesa waruhuk a? Hit henenda boruk kahep aleroho neg wenggelduk kamek.