Read Ninia Yali 1 KORINTUS 5 Bible Online

1 KORINTUS 5 - Ninia Yali bible

1 KORINTUS 5

¹ Nori, nerekwi. Hit henenggelegman homi nikaleroho hesangge enebil lauk, ulug, holdihik mu, eke hweag-hesamin. Ap eke en at akni ohwe famen wasireg wereg, ulug hweag-nutswa ma, holdihik ai re, sin lasi hweag-hesauk kahi. Yaho yei! It ap homi Allah enapeleg on en hit duruhup su on higitdoho duruk eleg famen, duruhup.

²Airoho deg kweleg, hit Yesus omaliki en ap ai siag disi ai fahet henenda wat-dauk kwit, ap ai henenggelegman lisoho wilibi fouk fano famen, “Su alongdoho deheik fug,” ulug, sahaloho folug, winik-wonog il noruk kahep ma hisihi.

³Ne, an anyo nebe re o yatma welahi famen, nenda neg de hinim welahe ma, nebe hinim wereg lit, uk hag, fahat-nenesug on Tuhan Yesus unuk yiko at ap mun siag duk fug alereg on duruk kwit wereg ai, wene obam ferihik mu wereg ma, hit Yesus omaliki kabog-duruk men, an nenda hinim welahe hag ai en, Tuhan Yesus omamne fam diroho diyug.

⁵Ap ai enda Tuhan waruhu li em deluhu en, ketia ebe Iblis en siahap deboukwag ulug, at Iblis enggikmu feiyug.

⁶ Ap homi enele hwenaroho uruk kwit, “Roti firukwag ulug ragi anggelegma belabe foruk on dorangge belabe foruk men, roti ebe humon fituk,” ulug, uruk anyo henapeleg no? Henelukdeg lit en winik-wonog uruk kahep ai, fano fug, mun siag.

⁷ Ap homi Yahudi on soni Paskah nauk kwit, domba waroho ragi roti firukwag ulug belapuk on wilibe feselug fituk eleg on nauk hag, diyug. Nenandomba waruk hag, Kristus nit fahet at watswa ai en de henebe roti ket fituk eleg on atuhupdeg welahep hag, demdoho amuhup en, ragi firukwag ulug belapuk on atam on wilibe feseruk hag siag duruk kahep on ai, horoho embeseiyug.

⁸ Ai halug, soni Paskah nauk kwit, roti firukwag ulug ragi ilonggoma belabuk fug angge nauk hag, nit siag deheg, nenenda wenggeleg eleg angge nong-hong deheg, duruk kamuhuk ousa. We nenenda misig wereg lit, demdoho on neg duruk kamuhuk.

⁹An atag lisu bal-hesauk kwit, “It ap en homi hesangge enebil noruk anyo, hinim seberoho welam fug,” ulug, hweag-hesauihik ai.

¹⁰An den irihik on ai re, “It Allah wene holduk eleg on en homi hesangge enebil noruk on mel, it nambono-nambono boruk on mel, ap homi lal-enepuk kwit enengge del-dauk on mel, kembu wutuk on mel, hinim seberoho welam fug,” ulug, lisu bal-hesauihik de fug. “Ap ai on hinim seberoho welam fug,” ulug, bal-hesele man, o suma ap homi ai on neg wereg ma, hit kema wereg lalep behep?

¹¹An den lisu bal-hesauihik ai re, it foman, “Nit mundoho Yesus omaliki,” ulug, hweag-hesauk kwit en, homi hesangge enebil laheg, nambono-nambono beil laheg, kembu duhwi wireheg, ap homi enebug siagdoho il laheg, ap homi enengge herahakeg, ahalue homoroho nalug wenenebo hag dil laheg, duruk halug ai, “Siburu hinim seberoho huratlug, na fug,” ulug, lisu bal-hesauihik.

¹² It dagma on enewene biling-enebuhuk ai an nonggwareg fug. Allah en neg enewene bilinggoho en-enebuhu mu, hahuk. Aireg famen, “Ap eke siag duruk halug, henenggelegman wilibi feiyug,” ulug, Allah wene lisu baleg higitdoho, it hinim kabog-duruk kahep on en siag duruk halug, hiren eneruhup fug behep? Eleg! Demdoho eneruhup.