Read Ninia Yali 1 KORINTUS 7 Bible Online

1 KORINTUS 7 - Ninia Yali bible

1 KORINTUS 7

¹Hit lisu baloho mon-napuk kwit, wene hein og-neauhup anyo, an wene onggo eke ketia hweag-hesa. Ap en hwe hwela fug angge welam[5] ale ai fano famen,

²aben homi nim hesangge siag duk ale enebuk no, it aben enohwesi hweleheg, it homi en enehunsi hweleheg, duruk kamag.

³Hwelahupdeg, inim nohoruk kwit, dul boruk ale eta duruk kamuhup fano.

⁴Homi enebe re enonggwareg enengge fug, enehunsi enonggwareg. Ne, ap enebe airoho at enonggwareg enengge fug, enohwesi enonggwareg.

⁵Ai halug de, hwe ap hinim nohoruk ale minggirig welam fug. Somban uruk kamuhuk ulug halug, diroho duhup. “Elamna fahet we welamul,” ulug, wene hinim maho folug, somban uhupdeg fobik hinim seberoho wereg nu. Henenda sebeluk fug alereg ma, Iblis en henenda kahaluk no, hinim seberoho welamuhup ai.

⁶An wene hweag-hisihi ai, nele omamne fam melaloho hweag-hesauk kahi fug. Ite, “Airoho duhup fano ane?” ulug, komo ale hweag-hisihi.

⁷An welahi anyo hag, it mundoho airoho welam fano boruk kahi famen, duk fug alereg. Allah en eyabuk duruk ale karunia hundomog og-nesauk kwit, “Eke diroho duhu, eke airoho duhu,” ulug, og-nesasi mu, og-hesasi higitdoho duruk kamuhup.

⁸It homi duhum ap sauwe ahun ohwe hwelauk eleg inim, homi sohwe inim, anyo hweag-esauk kwit, “An welahi hag, hit higitdoho welamuhup ai fano,” ulug, hweag-esauk kahi famen,

⁹hwela fug angge wereg lit, ahanhan en henenda nil kuruk ai siag. Ne, ahun ohwe oho lamuhup ai siag fug deg ma, duk ale henepuk anyo, sebeloho fouk fug ale henepuk halug, ahun ohwe hwelahup fano, ulug, hweag-esauk kahi.

¹⁰ Ne, hit henohwesi wereg on anyo neg de eke hweag-hesa. Hit aben henohwesi embesehup ai ousa. Hit homi mel, henehunsi embeselug longgo uhup ai mel ousa neg. Hit homi en henehunsi embeselug, wilipuk halug ai, we yau welamuhup. Ite, fobik sombandoho hahun akit kwik waruhun fano famen, ap amu on wahup ai neg de mun ousa, ulug, hweag-hesauk kahi ai an den fug. At Tuhan en melaloho hweag-hesauk.

¹¹

¹²Ne, hit foma su hweag-hesauk kahi su, Tuhan en fug. Ite, an den hweag-hesa. Hit ap Yesus omaliki eke en ohwe enda demdoho boruk eleg kweleg hwelauk halug, inim wereg lit, hwe en, “Nahun nim welala,” boruk kweleg, ap anyo en, “Nohwe su nerim,” ulug, embesehu ai mun ousa.

¹³Ne, hit homi Yesus omaliki on eke en ahun demdoho boruk eleg on hwelahureg, inim wereg lit, ap anyo en, “Nohwe ninim welamul fano,” boruk kweleg, hwe anyo en, “Ap su nerim,” ulug, embesehu ai oho ousa neg.

¹⁴Aben enda demdoho besi fug anyo ohwe demdoho besi anyo fam Allah omaliki inim sebe uruk. Ne, hwe enda demdoho boruk eleg anyo oho re, ahun demdoho boruk fam Allah omaliki inim sebe uruk. Airoho delep fug men, enomaliki ondoho on enebe dagma on hag welalep famen, enakni enisinga Allah omaliki inim sebe uruk ai fam it oho Allah omaliki inim sebereg wereg.

¹⁵Ne, ap enda Yesus obam dipdeg eleg on ai en ohwe embesemin boruk halug, embesoukwag. Ne, at hwe Yesus obam dipdeg eleg on ai en ahun embeselug wilipmin boruk halug, wilibukwag. Allah en de nenenda sebereg welamag ulug neneyonggo fesi mu, airoho duruk halug, Allah en wene nenobam fohu fug.

¹⁶Hat hwe su hendaman de, “Fobik nahun ahap wendaruk fug ale aruhu,” bolug, uruk kahen a? Nangginoho holuk? Ne, hat ap su hendaman boruk kwit, “Fobik nohwe ahap wendaruk fug ale aruhu,” ulug, boruk kahen a? Nangginoho holuk deg?[6] Hapeleg.

¹⁷Hit henemu domog Allah en at obam dip-deboukwag ulug, henayonggo henobaharuk kweleg, nangginoho hag wereg latuhup anyo, higitdoho wereg lamek. Ne, airoho wereg lit, Allah en, “Diroho duruk kamuhup,” ulug, melal-henepsi ai higitdoho duruk kamek. It Yesus omaliki mun obam man obam kabog-duruk on anyo wene misig ai neg melaloho hweag-esauk kahi.

¹⁸Ebe diroho fahet ihi. At Allah en henahap baleg kweleg, henayonggo henobahasi halug, henahap baleg wereg lahep ale ai elehapdoho fouk fug angge henahap baleg on welamek. Ne, henahap baleg eleg kweleg, henayonggo henobahasi halug, henahap bal-nenebukwag ulug duhup fug famen, henahap baleg eleg angge welamek.

¹⁹Henahap baleg mel, henahap baleg eleg mel, ai along eleg. Ite, at Allah en wene melaloho hweag-nesasi anyo higitdoho dil lauk neg de along.

²⁰Hit atam henemu domog nangginoho hag wereg kweleg, at Allah en henayonggo henobahasi anyo, airoho neg wereg lamek.

²¹Hit eke ap homi enemingming angge wereg kweleg, henayonggo henobahasi halug, ai wene anggindeg fug mu, airoho wereg lamek. Ne, henaknisi en wilibi henobaharuk halug, “Iyale wilibi nenobahakesa,”[7] ulug, werehap-nenepuk.

²²Ap misig eke ap homi enemingming angge atlug wereg kweleg, Tuhan en ayonggo fesi halug, at Allah omalik wundetdoho fesi on hag wereg. Wundetdoho wereg ma, ayonggo fesi halug, ap ai Kristus amingming angge boruk kamuhuk.

²³Hit henebe at Allah en onggo humon anyo fam mundoho nenonggo balsi mu, ap homi enamingming angge amul ulug, duk fug.

²⁴Ai halug, nori, nerekwi neg. Hit atam nanggoho hag henemu henemu wereg ma, Allah en henayonggo henobahasi anyo, airoho Allah hinim hundig wereg lit, wereg lamek.

²⁵Wene hwelani duhum on fahet de, “Diroho duruk kamuhup,” ulug, at Tuhan en hweag-nesasi fug famen de, wene an nendama boruk kahi ale su hweag-hesa. Nele hweag-hesamin su re, hit henendama en, “Allah en Paulus ebe enda hundig en ayonggo fesi mu, at hweag-neseheik ai demdoho hweag-neseheik,” ulug, henendama beiyug.

²⁶O ketia anggin-fanggin nikdoho nenobam waharuk mu, an nendan hit ketia nanggoho wereg lahep ai, airoho at welamuhup behi.

²⁷Hit foma henohwesi wereg halug, embesehuk bouk fug. Ne, owan wauk kahep fug halug, hwelahuk ulug, henenda wenggeluk fug, ulug, hweag-hesauk kahi famen,

²⁸hit foman homi og-enepuk halug, ai siag eleg. Hit hwelani duhum on en henehunsi hwelauk halug, ai oho siag fug famen, henehunsi a, henohwesi a, hwelahupdeg, hinim wereg lit, anggin-fanggin hauk kamuhup ale ai fahet, henobam am no ulug, hweag-hisihi.

²⁹Nori, nerekwi nim, an den ihi ai diroho. O ketia o kwenangma suma hauk kahe anyo eleg aruhu sali mun horog atsi mu, ketian hit ap henohwesi wereg anyo en henohwesi eleg hag debelug welamek.

³⁰Ne, hit fong watuk kahep anyo re, fong watuk eleg on hag debelug welamek. Hit unda yatuk kahep anyo, ahayeg eleg on hag debelug welamek. Hit henengge hun-dalug welahep anyo, henengge hun-dauhup fug on hag debelug, welamek.

³¹Ne, hit di ale su ale kwenangma on fahet henepe asingsingdoho dil lauk kahep anyo re, o kwenangma suma eleg aikoho duruk mu, ai on fahet henepe asingsingdoho duk fug angge welamek.

³²Ai hweag-hisihi ai, hit henenda firig welahep ha no, ulug, hweag-hisihi. Ap eke ohwe eleg on en, “Tuhan ahayeg boukwag ulug, at obahet ale neg duruk katmin,” ulug, wenggeldil lauk famen,

³³at ap ohwe wereg on anyo en neg de, “Nangginoho nohwe enda ahayeg debemin?” ulug, kwenangma duruk ale neg wenggeldil lauk.

³⁴At ohwe wereg on en airoho duruk kwit, “Eke di debeik ane? Eke su debeik a?” ulug, enda biren-baren uruk fam wenggeldil lauk. Ne, it hwelani enehunsi eleg angge yau wereg halug neg de, “Nenenda nim, nenebe nim, siag duk fug angge, mun Allah obahet eneg wereg lit, Tuhan ahayeg boruk ale neg duruk kamuhuk fano,” ulug, wenggeldil lauk famen, it homi enehunsi wereg anyo en neg de, enehunsi enahayeg boukwag ulug, mun ale man ale kwenangma on anyo neg, enenda wenggeldil lauk.

³⁵An wene airoho hweag-hesauk kahi ai, wam kumbi ililduk hagdoho, “Di duk fug alereg, su duk fug alereg,” ulug, hweag-hisihi fug. Ite, fano welamuhup ulug hweag-hisihi. Hit fano duk ale on higitdoho neg dil lauk kwit, Tuhan obahet eneko fahat-dalug wereg lit, obahet furoho dil lauk kamuhup ulug, hweag-hisihi.

³⁶Ap eke en hwe momale folug, “Folo-folo sebe-nabuhup nerim,” bolug, uruk famen, ai en hwe anyo mun duhum atuk halug, ap anyo enda ahanhan en, “Nohwe ninim sebe-nenebukwag,” fano boruk halug,[8] ai siag fug mu, sebe-enepuk ai neg fano famen,

³⁷ap amu on eke en momale folug,[9] enda mun hambukdoho wereg lit, enda ahanhan duruk ale anyo sebeloho folug, at endan, “Nohwe folo-folo sebe-napuk ale nerim,” ulug, boruk halug, ai mel fano.

³⁸Aireg ma, wene omamneroho re, it ap enohwesi hwelahuk boruk[10] anyo siag fug, fano neg famen, yau welamuhuk[11] boruk halug, ai mun fano.

³⁹It homi enehunsi hwelausa halug, owan eneluk wereg kweleg ai, inim sebereg wereg famen, enehunsi waratuk halug neg de, sohwe feseruk mu wundetdoho wereg ma, homi anyo en, “Ap amu on nenda nauk on ai hwelahuk,” boruk halug, hwelauk fano famen, hwelauk kwit, ap Yesus omalik on halug neg hwelowag.

⁴⁰Ne, ap hwela fug angge welamuhuk boruk halug ai neg de, enenda enahayeg humon welamuhup boruk kahi. An den boruk kwit, hweag-hisihi on ai, Allah Aheime omamne fam en hweag-nutuk kweleg, hweag-hisihi behi.