Read Ninia Yali 1 KORINTUS 8 Bible Online

1 KORINTUS 8 - Ninia Yali bible

1 KORINTUS 8

¹Ketia re, wam kembu duhwi angge waroho foruk on anyo fahet wene eke hweag-hesa. Aben uruk hagdoho, “Nit nenelukdeg,” uruk mu, hisihi ai fano famen, “Mun nenolukdeg,” boruk kwit duruk ai fam leho fahat-dauk famen, ap homi enenda hundig wereg lit, duruk ai neg de, enenda wirik-ap debeseruk.

²Ap eke en, “An mundoho noluk,” uruk halug, at mun furoho oluk am on apelegdeg lit, uruk famen,

³ap eke Allah nim enenda hundig halug, Allah en ap ai ebe olukdeg hehe.

⁴Ne, duhwi kembu owam wat-utuk on ai re duhwi kembu kwenangma on ebe eleg famen, ulug, nenoluk. Nenakni Allah ebe we misig neg. Eke eleg.

⁵Boholma inim kwenangma inim, “Nenenggembu humdoho wereg,” ulug, uruk ai, iren, “Nenenggembu nenomba, nenombalo,” ulug, humdoho hombuk baldil lauk mu, esauk kahe famen,

⁶nit neg de nenakni Allah misig neg wereg. Aren neg de di angge su angge wal-debag ma, nit at fahet neg neneluk welahe. Ne, Tuhan mel misig neg ai Yesus Kristus. Di angge su angge nim, nit ap homi nim, at fam wal-debag, ne, at disi fam neneluk welahe nenelukdeg.

⁷Wene ai, nit neneluk famen, hit foma neg de, furebouk fug angge welahep hisihi. Hiren endam kembu wutuk kwit, owam wareg nauk katuhup mu, ketia henendama henapeleg atlug, wam ai hesangge na fano famen, hit foma henenda wirik atuk eleg ma, “Enenggembu owam warehesa,” ulug, ebetuk kwit, nalug, “Siahap dobahat-dehe hehe,” ulug, boruk kahep hisihi.

⁸At Allah en nit nauk kahe angge ai fam Allah ninim hundig welahe ha fug alereg ma, niren nauk angge ai nauk kahe ai fam Allah inim hun aheg, ne, nauk eleg halug nong aheg, dehe ha fug alereg. Nauk kamuhuk halug oho eke saburangge sabut-dahuk fug.

⁹Ai famen de, hiren hesangge-besangge dil lauk fam neg de, henori eke demdoho boruk on enenda owan wirik atuk eleg on anyo yoma-enebehep ha no, fureberuk kamek.

¹⁰An den ai diroho fahet hweag-hisihi. Hiren, “Nenenda wirik atsi mu,” ulug, kembu obam wirigmu omano kulug kembu owam nauk mu hil lauk kwit, it henori henerekwi ai enenda owan wirik atuk eleg ma, hit duruk kahep ai fam, hare herek anyo ambong seroho na fug alereg behep? Nahu litdeg.

¹¹At hare herek anyo mundoho obahet Yesus waratsi famen, hit indip mun henelukdeg lit, kembu owam wareg nahup anyo fam hare herek enda owan wirik atuk eleg on anyo, siahap debehup angge re, furebelug duruk nu.

¹²Ne, hiren, “Indip nenolukdeg ma,” ulug, hesangge duhup fam henori henerekwi foma Yesus omaliki on enenda owan wirik atuk eleg on siahap debeseruk kwit, Kristus inim siahapdoho fohup litdeg.

¹³Ai halug, an nauk fam nori nerekwi eke yoma-enebihi ha no, an duhwi kembu owam ai mun na fug angge welaruhuk.