Read Ninia Yali 1 KORINTUS 9 Bible Online

1 KORINTUS 9 - Ninia Yali bible

1 KORINTUS 9

¹An anyo ap homi en, “Diroho diyug, airoho diyug,” hweag-nutuk fam duruk kahi behep? Allah en an mon-enepuk on rasul welamag ulug napsi fug behep? Ne, an Tuhan Yesus il hasi fug bolug, uruk kahep? Tuhan eyabuk wutuk kahi anyo, anggen yihig hag hit welahep ai eleg a?

²It ap foman, “Hat mon-enepuk on eleg,” hweag-nutuk kweleg famen, hiren neg de an hweag-hesauk kweleg, Tuhan Yesus omaliki atuhup ai fam fu nobahalug, mon-enepuk on rasul demdoho wereg boruk kahep anyo eleg a?

³It ap homi en an nabug siag uruk kweleg, an den wene onggo diroho hweag-esauk kahi.

⁴“An Allah eyabuk duruk kahi ai fahet nenggik onggo nasiburu nahaik hwelahuk fug behep? Hwelahuk neg.”

⁵It ap rasul foma mel, at Tuhan Yesus autsi ombolim ondoho on mel, Petrus mel, Allah wene walug noruk kwit, enohwesi og-eneplug noruk anyo hag an airoho nohwe, Yesus ahaloho on, hwelalug noruk kahi ha fug alereg behep?

⁶Ne, it ai dil noruk kweleg, an Barnabas ninim nenenggik fam neg nenebe fano welamag ulug, keik-walog dil noruk kamag fano bolug uruk kahep?

⁷It sehen foroho on tentara anyo enowesi en weim yabukwag ulug enayonggo foruk mu, it enonggwareg en enenggik onggo heraroho yapuk kam alereg behep? Eleg. Ne, it ap eke en anggur a yaho folug, anggen yihiruk mu, eke enonggwareg nauk eleg no? Nauk. Ne, it eke enandomba humdoho foroho lit de, ahowe enonggwareg nauk eleg no? Enonggwareg nauk, ulug, hweag-hesauk kahi.

⁸An den wene airoho hweag-hesauk kahi ai, nit ap homi duruk kahe ale anyo neg wal-heheg hweag-hesauk kahi ai fug. Ite, endam Allah en Musa wene melaloho, “Diroho diyug, airoho diyug,” ulug, lisu baleg wereg anyo en hweag-hesauk kahi.

⁹ Wene melaleg anyo fam uruk kwit, “Sapi eneyog en gandum ahap ibildil lauk kweleg, foma na no ulug, enambilik het-duk fug,” ulug, ebag ai, Allah en sapi elaheg bolug ebag ane?

¹⁰Ite, nit nenelaheg bolug, ebag a? Eleg. Nit ap homi nenelaheg bolug ebag ma, it ap yabuk wutuk on mel, anggen ibilig yohwatuk on mel, inim en, “Fobik nit at nauk kamuhuk,” enenda ebereg lit, duruk.

¹¹ Ai higitdoho, niren Allah wene anyo henendama a yaho henobaharuhuk mu, anggen balduk hag, hiren di angge su angge kwenangma on og-nesa ale re anggindeg a? Eleg. Og-nesa alereg.

¹²It atam Allah wene henendama a yaho henobahausa fug on en, “Foma og-nesahup,” ulug, henobam ebereg wereg halug, og-esauk kahep famen, nit atam yaho henobaharuhuk anyo en, “Og-nesakiek,” ulug, heng-henebuk ale siag behep? Heng-henebehe ha fano famen, Fano Wene Kristus hweag-nesasi anyo saharil noruk mu, kwe bale fehe ha no ulug, “Og-nesakiek,” ulug, heng-henebuk fug angge nenenggik fam neg witil lauk kahe.

¹³ Nori, nerekwi. Hit henolukdeg lit deg, it Allah obam wirigmu yabuk wutuk anyo, yabuk wutuk onggo hag siburu Allah fahet foruk on anyo hweleheg, ne, it ap Allah owam waroho og-utuk on anyo foma it nenggeg, duruk ale ai oho henelukdeg.

¹⁴ Ai hag it ap Fano Wene hweag-esauk anyo enebe fano welamag ulug, it wauk on anyo en di angge su angge og-esauk kamag ulug, Tuhan en melaloho fesi.

¹⁵Melaloho fesi on ai wereg famen, an den, “Henangge og-nemek,” ulug, heng-henepihik fug. Ketia mel, “Hit eke nobahayek,” ulug, lisu su fam bal-hesauk kahi fug. “An Allah obahet foruk on wahuk fug,” uruk kahi mu, an wauk nealug, it ap an nori en nabug baluk no, wa fug angge wereg lit, wararuhuk fano.

¹⁶An Fano Wene hweag-isil noruk kahi anyo re, Allah en, “Hweag-isil noruk kamin,” ulug, melal-napuk mu, higitdoho hweag-isil noruk kahi ai fam leho fahat-dahuk mun eleg. An Fano Wene hweag-isil la fug angge bok ahi ha man de, an nonggwareg alemare fahat-dihi halereg.

¹⁷An airoho hweag-isil noruk kahi ai, an nendan bolug, hweag-esauk kalereg en, “Onggo og-nemek,” ele fano famen, Allah en dukwag ulug unduhuk nobahasi mu, we onggoleg hweag-isil noruk kahi.

¹⁸Aireg ma, an onggo hwelahuk ai ke behep? Eleg. An yabuk wutuk kahi anyo we wutuk fam, “Onggo og-nemek,” hweag-esa fano famen, sebeloho folug, Fano Wene onggoleg, we henelugap henebil lauk kahi ai fam an onggo hwela hag de ai.

¹⁹An ap homi enamingming angge welahi fug, we welahi famen, ai duruk fam an den Yesus omaliki enepmin ulug, ap homi mundoho enemingming angge atlug noruk kahi.

²⁰An den it Yahudi on Yesus omaliki enebikoho enenggelegma wereg lit, it Yahudi enebut hag higitdoho deheg, Musa wene melaleg duruk on anyo an airoho duruk kahi fug famen, Yesus omaliki enepmin ulug, enenggelegma wereg lit, Musa wene duruk on hag, higitdoho deheg, duruk kahi.

²¹Ne, it ap dagma on Allah en Musa hweag-etfag ale duruk eleg on anyo Yesus omaliki enebikoho enenggelegma wereg lit, it duruk hag an higitdoho duruk kahi. Ai duruk kahi anyo re, Allah en ebag wene sahaloho folug duruk kahi ai re fug. Ite, Kristus en melal-napsi wene duruk kwit, duruk kahi mu, ulug, hweag-hisihi.

²²Ne, it ap homi enenda owan wirik atuk eleg on omano enenda wirik-ap enepmin ulug, it enenggelegma wereg lit, it duruk ale an higitdoho duruk kahi. Airoho dil noruk kwit, an di ap su ap enenggelegma noruk kwit, it misigdeg Allah en enahap wendarukwag ulug, it duruk ale an higitdoho dopno dobahat-dalug dil noruk kahi.

²³An Fano Wene hweag-isil noruk kahi anyo it ap homi en hole folug, wauk fam it ninim fano angge akni hiling amuhuk ulug duruk kahi.

²⁴Nori, nerekwi, hit henolukdeg. It ap homi onggo hwelaul ulug buroho lauk kwit, enebe abirangge lauk famen, at misig atam busandoho wilibik lauk on halug neg, onggo hwelauk anyo hit henepeleg a? Aireg ma, hit onggo hwelahup ulug, buroho lauk kamek.

²⁵Ap eke it ap homi buroho lauk on anyo inim buroho atag wilibik lahuk boruk kwit, at di ale su ale dimin boruk on anyo sebeloho foruk. At onggo kware-kware henaho we eleg aruhu on wan-deboukwag ulug, airoho duruk famen, nit neg de onggo kware-kware hag mahkota mundoho welaruhu on wan-nenobahaukwag ulug, duruk kahe.

²⁶Ai fam an nenda ebereg lit, an mundoho bekit fotog-fotogma buroho lauk kahi. Aben enenggik yinggilig yapuk kwit, wema enowatuk fug ai hag, an we hesangge duruk kahi fug.

²⁷It ap homi eke fano amag ulug Fano Wene hweag-isil noruk kahi ai famen de, nonggwareg fotog-niil lauk men, nong ahi ha no ulug, nonggwareg en nebe wat-da hag, nenda ningdoho sebele folug, ap homi enapma wereg lit, enele holoho wereg hag, an nebe nele apma welaruhuk ulug, komo-dauk kwit, duruk kahi.