Read Ninia Yali 2 KORINTUS 1 Bible Online

2 KORINTUS 1 - Ninia Yali bible

2 KORINTUS 1

¹ Nori nerekwi. an Paulus Allah enda bebag fam Kristus Yesus en ayonggo rasul unduhuk nobahasi nim nenare Timotius nim en, hit Yesus Omaliki kabogdeg jemaat Allah o Korintus kabog-duruk kahep on mel, Allah omaliki o propinsi Akhaya wereg on mundoho mel, wene su eke hweag-hesa.

²Nenakni Allah, Tuhan Yesus Kristus inim enenda hundig en og-heseheg, henenda hambukdoho fano welamuhup ulug henobahakeg, duruk kamag.

³Tuhan Yesus Kristus akni Allah en nenelaheg bolug fanoap nenobahakeg, nenenda aho ware nenobahakeg, duruk on onggwareg at deg ma, nit mundoho mot-duruk kamul.

⁴Nit anggin-fanggin nenobam atuk halug, Allah en nenenda aho ware nenobaharuk anyo hag, it ap homi airoho anggin enobam atuk halug, enenda aho ware feseruk kamag ulug, Allah en nit dam nenenda aho ware nenobaharuk.

⁵Kristus anggin-fanggindoho foruk halug, Allah en enda aho ware foruk katsi anyo hag, ketia ap homi en anggin-fanggin alongdoho nenobam nenobaharuk halug, Kristus ninim hundig mu, nenelaheg humon boruk kwit, nenenda aho ware nenobaharuk.

⁶Anggin-fanggin nenobam atuk anyo re, niren henenda aho ware henobahakeg, ne, fanoap henobahakeg, dukwag ulug nenepuk mu fano neg. Nit anggin nenobam foruk kweleg, nenenda hwerieg lit wauk kahe anyo, hit higitdoho henobaharuk halug, hit oho henenda hwerieg lit wauk kamuhup ulug, niren henenda aho ware henobahaukwag ulug, atam Allah en nit dam nenenda aho ware nenobaharuk.

⁷Anggin nit nenobam atuk anyo hit henobam atuk halug, Allah en nenenda aho ware nenobaharuk kwit, hit oho higitdoho henenda aho ware henobaharuk ai nenolukdeg ma, hit Allah momal-dauhup anyo embesouk fug angge, henobaharuk kweleg, henenda hambukdoho wereg lit, mundoho mutlug lauk kamuhup boruk kahe.

⁸ Nit o Asia wereg lit, anggin nenobam atsi anyo hit henoluk amluhup en hweag-hesa, nori nerekwi. Nit o Asia wereg ma, anggin-fanggin humdoho nenobam atsi mu, eleg am fug alereg ma, “Nenepuk su fam waramuhuk ane?” boruhuk.

⁹Nit waramag ulug Allah en demdoho nenobam loukdoho nenobaharuk boruhuk famen, ai nenobam atsi ai, nit nenomamne fam wene hweag-isil lahuk fug. Ite, it waratlug laukmen, eneluk apdoho unduhuk feseruk on Allah anyo fam nenenda obam dip-debelug, at omamne fam hweag-isil noruk kamul boukwag ulug, airoho nenobam atsi.

¹⁰Aireg ma, mun waram hag[1] welatuhuk famen, nenahap wendat-nenepsi mu, fobik oho nenahap wendaruhu lit deg nenelukdeg ma, ketia airoho nenepuk mu, hiren nenobahet somban uruk kahep ai fam let-nenepuk kweleg, “At nenahap wendat-nenebuhu demdoho,” ulug, boruk kahe. Ai halug, ap homi en enele abiroho nenobahet somban uruk mu, Allah en esanggo hole folug fanoapdoho nenobaharuk mu hauk kwit, it humdoho en nenakni Allah dang-duruk kamuhup.

¹²Nit dil noruk kwit, furebelug dil noruk kahe famen, hit henenggelegma wereg lit neg de, mun alongdoho duruk katuhuk anyo ebetuk kwit, it ap homi kwenangma on enenda wenggele folug il noruk hag il laheg, henangge hwelela bolug, wene foma hwenaroho hweag-heseheg, ai duruk katuhuk fug. Ite, Allah nenelaheg en omamne nenepuk kweleg, mun demdoho halug neg[2] fagdoho hweag-hesauk katuhuk anyo neg ebet-atuk halug, “Fano duruhuk,” ulug, nenenda nenahayeg en, “Yehei u,” neg boruk kahe.

¹³Hiren lisu baleg halug hehep ha on neg bal-hesauk kahe. Tuhan Yesus waruhu li em niren hit fam nenewonog amuhuk boruk kahe anyo higitdoho hit oho, “Paulus ori nim anyo fam nit nenewonog amuhuk,” ulug, nit dil noruk kahe ale fu nenobaharuhupdeg, “Paulus ori nim ai fahet dil noruk mu, fano,” boruk kahep hag, nit lisu bal-hesauk kahe su re, “At Paulus ai fahet bal-nesasi,” ulug, furoho hahupdeg, “Nenebe og-neneplep,” ulug, yehei boruk kwit, hweag-hesauk kahi.

¹⁵ Airoho fureboukwag ulug, berihik ai re, hit henendama re birenam henahayeg howag ulug, an atam en o Makedonia en suma waharuk kwit, hit dim hisil waruhukdeg, fobik nambol somban lauk kwit, dim hisil o Yudea, lamin ulug lauk mu, hiren let-nabuhup, ulug, berihik.

¹⁷Airoho waruhuk ulug berihik famen, fobik bok atihik ai re, “Seiale isi,” behep? An nendaman, “Diroho duhuk,” ulug, wenggelduk kwit, nonggwareg boruk ale en nendaman bolug, “Yu o,” ulug en, fobik “Eleg o,” uruk kahi behep?

¹⁸Eleg. At Allah ele demdoho hweag-nesauk ai hag, niren, “Yu o,” ulug en, “Eleg,” hweag-hesauk kahe fug.

¹⁹ An mel, Silas mel, Timotius mel, nit henenggelegma wereg lit, Allah amloho Kristus Yesus duruk katsi wene hweag-hesauk katuhuk ai, “Yu o,” ulug en, “Eleg,” ulug, uruk eleg. Allah en, “Yu o, og-hesahuk,” ulug, abug hweag-nesa hag, Yesus ebe og-nesasi mu, wereg ai.

²⁰Ne, Allah en di ale su ale mundoho hweag-nesasi ai mundoho re, “Yu o, og-hesahuk,” uk hag, Yesus ebe og-nesasi mu, wereg ai en nit at ninim hundig wereg lit, Allah unuk leg amag ulug, “Demdoho amag,” ulug, “Amin,” uruk kahe ma, nit demdoho duhuk ulug, hweag-hesauk kahe.

²¹Kristus mel, hit mel, ninim mun hambukdoho hundi nenobahakeg, ne, nit mel, Allah obahet eneko nenobahakeg, disi ai, Allah en neg.

²²Nit Allah omaliki enegdeg ma nesauk kamag ulug, eneg aleroho nenobahakeg, ne, fobik og-esahuk ulug, atam akdoho feseruk hag, Allah en fobik og-nesahu en, atam Aheime nenendama kwelabe nenobahakeg, disi.

²³An hit o Korintus hesa waharihik fug anyo re, bet-henepuk fam henenda wat-dehep ha no ulug, hesa waharihik fug mu, Allah en nenda mundoho olukdeg ma at neg oluk.

²⁴Hit Kristus henenda demdoho boruk kahep ai, mundoho hambukdeg welahep ma, niren neg de, “Wene su fam demdoho bolug, wauk kamek,” ulug, melaloho hweag-hesowag ulug wamuhuk de boruhuk fug. Ite, hit Kristus demdoho bolug, henahayeg dorangge hauk kahep anyo humon hahup en let-henebik wamuhuk boruhuk.