Read Ninia Yali 2 KORINTUS 10 Bible Online

2 KORINTUS 10 - Ninia Yali bible

2 KORINTUS 10

¹Aben uruk kwit, “At Paulus yatma wereg lit, akol bouk fug angge mun ambong seroho hweag-neseheg, ne, nit ninil hanim halug, akol en, sakoroho hweag-neseheg, duruk,” uruk kahep famen, Kristus nenelaheg en ele sakoroho hweag-nesauk hag, an Paulus oho, nenda, “Yehei,” boruk kwit, wene ebe hweag-hesa.

²It ap homi foman uruk kwit, “It kwenangma on en duruk hag Paulus ori inim higitdoho eke hwelakoho dil noruk,” uruk esalug, an nele omamneroho it hweag-esahuk berihik anyo hag hit hesa waruhukdeg, airoho hweag-hesa no, nele sakoroho hweag-hesauk kahi on ai neg fureberuk kamek.

³Nit kwenangma suma dil noruk kahe ai re demdoho famen, it kwenangma suma wereg on en dog apuk hag duruk kahe fug.

⁴It sebele henobahaul ulug duruk anyo ninim, yapuk kamul ulug, it kwenangma on enesehen anyo on nit foroho lahe fug. Ite, Allah omamne wereg on asehen fam weim elehet mun hambukdoho wirig kweleg, langgoroho enowarik kuk on anyo foroho lit welahe. At Allah asehen foroho lit, it demdoho wene sahaloho folug, enele we hesangge il noruk anyo, enele elehapdoho feheg,

⁵“Allah wene neg, heneluk atlug welamuhup ai siag. Ite, atam di wene su wene mundoho heneluk aruhu neg de, fano,” ulug, winik-wonog il noruk anyo, sebeloho feheg, ne, it enenda bolug dukwag ulug, wenggeldil noruk anyo, sebeloho folug, Kristus ele hole folug neg duruk kamag ulug, Kristus apma feseik waheg, dil noruk kahe.

⁶Aireg ma, niren wene hit hweag-hesauk kweleg, hole folug higitdoho neg duruk mu hesahukdeg, it nenele hole folug, higitdoho duk fug angge amu on duruk mu halug, siag onggo enobam fesehuk en welahe.

⁷An den wene enameg on imin su re furebeiyug. At eke endaman boruk kwit, “An nebe re Kristus omalik welahi,” ulug, fureberuk halug de, onggwareg en abut bal-dauk kwit, “An nebe Kristus omalik welahi hag, it Paulus mel oho airoho wereg,” ulug, fureberuk kamag.

⁸Hit siahapdoho henobahaukwag ulug, at Tuhan en awene hilil-nitsi fug. Ite, fanoap henobahaukwag ulug hilil-nitsi anyo fam hweag-hesauk kahi mu, “At winik-wonog uruk kwit hweag-nesauk,” uruk kahep ma, an nenggali eleg angge welahi.

⁹“At Paulus en lisu fam bal-nesauk kwit, ele omamne mun fagdoho hweag-nesauk famen, kumu nesa watlug neg de, ebe mun mabendeg lit, wene nunggwangge on il lauk hag hweag-nesauk,” ulug, uruk mu hesauihik mu, “Nenakol boukwag ulug lisu baloho mon-nenebik waharuk hehe,” ulug, ai bouk fug.

¹¹It ap wene airoho uruk on anyo en, “Paulus airoho duhu,” ulug, lisu baloho mon-nenebik waharuk anyo ebe nesa waharuk halug, lisu baleg anyo higitdoho hweag-nesa waruhu demdoho boruk kamag.

¹²It ap homi foma winik-wonog il noruk anyo, it alongdeg ma, ninim sebereheg, ninim higitdoho welaheg, duhuk de, siag boruk kahe. It ap airoho boruk ai, “An along, hat along,” uruk kwit, it duruk ale neg wal-heheg bilingguruk mu, it mun morue hag uruk mu esehe.

¹³Nit nenebe en Allah wene hweag-esa lauk eleg halug, “Nit nenomaliki,” ulug, nenewonog amuhuk fug. Ite, Allah en, “Etma hweag-esa lauk kamek,” ulug, hweag-nesasi anyo furoho hweag-esauk kweleg, fano wene wausa anyo halug neg, “Nenomaliki,” ulug, nenewonog amuhuk. Ne, “O Korintus mel, hweag-esa lakiek,” ulug, hweag-nesasi mu, furoho hweag-hesauk kweleg, Fano Wene wauhup mu, hit nenomaliki neg boruk kamuhuk fano.

¹⁴Nit Kristus disi Wene Fano wene hweag-hesa waharuhuk anyo, at Allah boruk eleg kweleg, niren neg hweag-hesa waharuhuk fug. Ite, Allah en, “O etma hweag-esa lakiek,” ulug, hweag-nesasi mu, hit hinim hweag-hesa wamuhuk boruhuk mu, hweag-hesa waharuhuk.

¹⁵Allah en, “O etma hweag-esa lakiek,” hweag-nesauk eleg halug, ap amu on en hweag-esauk kweleg, Fano Wene wauk halug, “Nit nenomaliki,” ulug, nenewonog amuhuk fug. Ite, hit Kristus demdoho boruk kahep anyo ekenim omamne atuk halug, niren henenggelegma wereg lit, wene dopnoroho hweag-hesauk kamag ulug Allah en wenggeloho fesi higitdoho neg hweag-hisil noruk kamuhuk boruk kahe.

¹⁶It ap amu on hweag-hesauk mu kulug, enomaliki del-dalug leho fahat-dahuk ai re, nenerim. Ite, hit Kristus demdoho boruk kahep anyo hum atuk halug, it Allah wene holduk eleg on o amumu atlumu inim hweag-esa lahuk boruk kahe.

¹⁷ “Hit eke en leho fahat-dahuk boruk halug, hit duruk kahep fam eleg. Ite, Tuhan en henepuk kweleg, duruk kahep ma, at neg leho foruk kamek,” ulug, Allah wene fam lisu baleg wereg ma.

¹⁸Ap eke onggwareg en, “An fano,” uruk halug, ap ai demdoho fano bohup ai re eleg. Ite, Tuhan en uruk halug neg de, ap ai demdoho fano bohup.