Read Ninia Yali 2 KORINTUS 11 Bible Online

2 KORINTUS 11 - Ninia Yali bible

2 KORINTUS 11

¹An ap dot morue on hag wereg lit, wene hweag-hesauk kahi su famen, deg kweleg holduk kamluhup ulug, hweag-hisihi, nori nerekwi.

²Hit an nomaliki hwele ap abug uk fug angge wereg anyo hag wereg lit, henehun misig Kristus neg hwelahup ulug, abug hweag-hesauk katihik anyo wereg kweleg, ap amu on hwelahuk ulug duruk mu hesauihikdeg, Allah en omaliki at ele embeselug, amu on mutlug lauk halug, enda wat-dauk hag, an higitdoho nenda wat-dauk kahi.

³ Kisu anyo ele ahalue dep-dep hwe Hawa hweag-utuk kwit, at lalfag hag, it ap amu on en enele ahalue dep-dep hweag-hesauk halug, “Nenehun Kristus ele neg holduk kamul,” ulug, demdoho momal-dauhup anyo embeselug, henenda lal-henebuk no ulug, nakol boruk kwit, hweag-hesauk kahi.

⁴It ap homi amu on watlug, hit Kristus wene waluhup ulug, wene atam hweag-hesauk katuhuk anyo wereg kweleg, ap amu on eke en, we seiale, “Su Yesus,” ulug, hweag-hesa waheg, Allah Aheime wauhup anyo wereg kweleg, we, seiale, “Allah Aheime eke su,” ulug, hweag-heseheg, ne, Fano Wene demdoho bolug, wauhup anyo wereg kweleg, “Wene fano wene eke su,” ulug, il waheg, duruk kweleg, henahayegdoho og-enebeheg, enewene weheg, duruk kahep ma, hweag-hesauk kahi.

⁵It ai Yesus ayonggo “rasul,” hag debelug waharuk mu, hiren de it enele leho bolug og-enepuk kahep famen, an nendaman de, “It leho, an sebeleg,” ulug, airoho boruk kahi fug.

⁶Nele siag hag uruk kahi famen, nolukdeg lit uruk kahi heneluk. Nit henenggelegma wereg lit, di ale su ale dil noruk katihik ai fam mundoho heneluk atuhup.

⁷Hit fanoap henobahamin ulug, an nenda sebele fahat-dalug, Allah wene Fano Wene anyo, onggo eleg we hweag-hesauk katihik ai fam, siahap henobaharihik no? Mundoho eleg.

⁸An hit henenggelegma wereg lit, henobahet duruk kamag ulug, Yesus omaliki jemaat o amumu kabogdeg on en, og-nutuk katswa. Og-nutuk mu wauk katihik ai, hit let-henepuk kamag ulug, “It enengge yoholi angge hag wasi,” ulug, hweag-nom alereg.

⁹ An henenggelegma wereg kweleg, nangge eleg halug, nori Makedonia on en, wahausareg, enengge mundoho og-nirik wahausa ma, “Hit eke og-numuhup,” ulug, an mun heng-henepihik fug. An hweag-hesauk fam anggin eke nim henobam am no, an nenggik fam neg furoho dil lauk katihik mu, ketia mel higitdoho dil lauk karuhuk.

¹⁰Airoho duruk karuhuk ulug, nahayeg boruk kwit, nenda leho fahat-dauk kahi ai, ap homi o Akhaya on eke en, nawene maruk fug alereg, ulug, Kristus wene Fano Wene nendama wereg lit, demdoho ihi.

¹¹An ihi ai, nunggwe ulug ihi behep? An nenda hundig henepuk eleg lit ihi behep? Eleg, nori nerekwi. Nenda hundig henepuk kahi ale Allah olukdeg.

¹²An wene hweag-hesauihik anyo indip de su. It ap Yesus en mon-enebik waharuk on rasul hag debelug hweag-hesa waharuk on anyo en, “Paulus inim duruk ale nit higitdoho duruk kahe,” ulug, leho fahat-dil noruk anyo, enele mun elehapdoho fesehuk ulug, an duruk kahi ale ai, mun higitdoho duruk karuhuk.

¹³It ap ai re Kristus en mon-nenebik wahasi on rasul de fug. We seiale uruk kwit, “Kristus en mon-nenebik wahasi mu, hweag-hisil waharuk kahe,” ulug, ap homi lal-enepuk ai.

¹⁴It ai re we hesangge duruk fug. Enakni Iblis onggwareg en seiale on deg ma, it Allah ayonggo noruk on malaikat seleg deg on omano enerohole hag debelug, dil waharuk hag duruk ai.

¹⁵At Iblis amingming angge wereg lit, at fahet duruk kwit en de, at Allah amingming angge wereg lit, higitdoho duruk on hag debelug, waharuk ai, enebut eneitog. Airoho duruk ai en ambiangma Allah en onggo it di fahet su fahet duruk higitdoho enebuhu.

¹⁶“Ap morue on hag uruk bouk fug,” ulug, ekenim hweag-hesauk kahi, nori nerekwi. Ne, morue hag neg boruk halug, an airoho wereg lit, nonggwareg en dot leho fahat-damin en holduk kamek.

¹⁷An den leho fahat-damin ai re, Tuhan en, “Hat airoho in,” ulug hweag-nitsi mu, leho fahat-damin fug. Ite, ap morue on en leho fahat-dauk kwit uruk hag hweag-hesa.

¹⁸It ap homi en di angge su angge kwenangma on fahet leho fahat-dauk hag, an oho dorangge eke leho fahat-dauk kwit, wene eke hweag-hesa.

¹⁹Hiren, “Nenenda mun wereg on,” boruk kwit, it morue on en uruk halug, henahayegdoho wauk kahep.

²⁰It ap homi en, enamingming angge apdoho henebeheg, henangge elehapdoho nil laheg, sabu hetdoho sebele henobahakeg, leho fahat-dauk kwit, siahapdoho henobahakeg, henorohole fam dagdoho henowareheg, duruk kweleg, “Fano,” ulug, wauk mu hesauihik.

²¹Nit neg de, airoho henobaharuk ale nenekol en nenele sakoroho hweag-hesauhuk mu, nenggali napuk. It ap morue on en uruk hag eke hweag-hesa. At eke enggali eleg angge leho fahat-dauk halug de, an oho re nenggali eleg angge leho fahat-dihi halereg.

²²It Ibrani on halug, an oho Ibrani on, it Israel on halug, an oho Israel on, it Abraham ombasi halug, an oho Abraham omba neg, welahi.

²³ Kristus amingming angge wereg lit, obahet duruk kahe boruk mu, an oho Kristus amingming angge mun alongdoho duruk kahi. Wene su ap morue on en uruk hag uruk kahi famen, demdoho deg ma, holduk kamek. Kristus amingming angge wereg lit, obahet mun namurururoho dil laheg, sabu hetdoho kwelap-enepuk mu kwelap-nabeheg, wenahauk fug aleroho lal-fisog nowareheg, waramag ulug, hindik-hundig napuk famen, noluk aheg, it foma seroho hag debeseruk kwit, an neg de mun alongdoho nobaharuk katswa.

²⁴ It ap homi Yahudi on en neg, fetne angge 39 huli enowatuk on anyo foabenam nowatswa.

²⁵ It ap Roma enap en yeik henahanam fuk-nabil nowareheg, misiham helep fam obagdoho nowareheg, kapal fam lauk mu, henahanam siag atlug obuk ik wambeheg, eke salim ikma obukdoho belabe nobahasi mu wereg lit, ik hurug lauk men neg, noho misig nohokeg, napuk katswa.

²⁶ Di o su o lauk mu, ik fu waharuk kwit, og-naplug la ale deheg, ap yoholi angge wauk on en nowarukoho deheg, it Yahudi on inim it ap dagma on inim en siahap nobahakeg, o kota ilonggo fil en nim, dag fil en nim, ik laut famen nim, seiale enele famen neg, “Nit Yesus omaliki,” uruk on enenggelegman nim, it mundoho en siahap nobahaukoho duruk mu, youk hauk katihik famen, dip-uk fug angge dahan atsi.

²⁷Di deheg su deheg, duruk kwit, kwini-kwaniroho deheg, hundig-hundig nohouk fug angge noluk neg welaheg, siburu obok nabeheg, ik obok nabeheg, siburu eleg halug hunik nohokeg, nasum eleg ma, hol nowareheg, duruk katihik.

²⁸Airoho napuk kweleg, Yesus omaliki di o su o kabogdeg etmano mundoho enobahet di salim su salim nenda anggindeg lit, ebetil lauk kahi.

²⁹It ap homi enenda anggin atuk halug, an oho nenda anggin aheg, it siag duruk halug, “Yehe e!” boruk kwit, nenda wat-deheg, duruk kahi.

³⁰Ai famen de, an leho fahat-damin halug de, “An nebe maben deg lahi,” ulug, leho fahat-dihi halereg.

³¹An wene ihi ai re, napenen ihi fug. At Tuhan Yesus akni Allah apne oko mot-duruk kahe on anyo olukdeg.

³² An o Damsyik wereg ma enowe unuk bogdeg Raja Aretas apma wereg on gubernur anyo en, an sen-nabukwag ulug, autsi sehen foroho on hweag-esasi mu, wilibik la no ulug kwema kahaleg wereg kweleg,

³³si elma yohware nobahalug, sabu ililoho helep fak lehet yendeg ele kwe en belabe nobahausa ma, it enenggikmen wilibik waharihik.