Read Ninia Yali 2 KORINTUS 12 Bible Online

2 KORINTUS 12 - Ninia Yali bible

2 KORINTUS 12

¹Ap enonggwareg en leho fahat-dauk ale alemaroho duruk famen, nonggwareg en leho fahat-dauk kwit, hweag-hesamin ai, a og-hauk hag na fam Tuhan en hweag-nereheg, wene heraho ale fagdoho unug-neeheg, disi ale bilinggoho hweag-hesauk kaik.

²An tahun 14 en endam nil hauihik on it eke fam furoho ik. Ap eke Kristus inim hundig welatsi on Allah en bohol hwili biren beselug, hwili eke emberimmu etlema lahabe fesi ai, an noluk. (At ai ebe demdoho on feik lahasi ane, aheime feik lahasi a? An napeleg. Nakni Allah neg oluk.)

³At ap ai, boholma fanoma Firdaus anyo walug lasi mu, wereg lit, wene ap homi en uk fug alereg on uruk mu esasi. (Ap ai ebe demdoho on walug lahasi a, aheime neg walug lahasi ane? An napeleg lit, ihi. Nakni Allah neg oluk.)

⁵At ap ai etma feik lahasi mu wereg lit, esanggo holeheg, il heheg disi ai fahet leho fohuk fano famen, an duruk kahi ale neg de, nebe maben deg lit, duruk kahi ale ai fahet neg leho fahat-dauk kwit, bilinggoho hweag-hesauk kahi.

⁶An nonggwareg en na fam hauihik famen de, ap eke obam furoho ihi on ai on fahet ekenim leho fahat-dihi halug de, nele demdoho imin ai en, ap homi morue on en uruk hag imin fug. Airoho famen de, ap homi eke en, an hauk kahi on ai fahet leho nobahauk no ulug, nebe inil neeheg, nele enesanggo holeheg, duruk ai fam, fu nobahaukwag ulug, eke ai on uk fug angge bok atmin ai.

⁷Ai famen de, amu nigon bolandoho ap homi en hauk eleg on na fam hauihik ai fam, “An along,” ulug, leho fahat-dil la no ulug, Allah en ouk eke nahap fam alok hag damuloho nobahasi ai, at Iblis ayonggo hag watlug, nobam wereg ma, an leho fahat-da no ulug, nowareheg neg duruk.

⁸Ouk ai elehap nabukwag ulug henahanam Allah hweag-itihik famen,

⁹Allah en an hweag-nutuk kwit, “Anggin-fanggin hobam atuk anyo fam an nomamne anyo enam amag ulug duruk mu, anggin hobam atuk halug, Nakni Allah nelaheg en omamne higitdoho nobaharuk karuhu, boruk kamin,” ulug, hweag-nitsi mu, Allah omamne napuk ale hamin ulug ouk napuk ale ai, nenda nahayeg boruk kwit, fano napuk boruk kahi.

¹⁰Aireg ma, an maben napuk halug, Allah omamne humdeg ma, napuk kweleg, nomamne humdeg lit dil lauk kahi mu, Kristus duruk katsi wene saha ukwag ulug duruk kweleg, an nebe ouk-bouk nabeheg, bulip-balapdoho nobahakeg, nenda sahaloho nobahakeg, sig-mug neeheg, anggin-fanggin nobam nobahakeg, nobaharuk kweleg, “Fano neg napuk,” ulug, nenda sereg lit, nahayegdoho welahi.

¹¹An ap morue on uruk hag uruk kahi famen, indip hit duruk fam wene ai hweag-hesauk kahi. An ap humon deg ma ulug, leho nobahakup ulug, uruk kahi fug famen, hiren, it ap amu on ai, “Kristus mon-enebik wahasi mu,” ulug, mun leho feseruk kahep anyo, an ninim higitdoho wal-hauk kwit, “Paulus enapma hag fug. Inim higitdeg,” ulug, ninim leho nenobahauk fano famen, leho nobaharuk kahep fug halug, hweag-hesauk kahi.

¹²Hiren, “Paulus su Yesus en mon-enepuk on rasul welamag ulug eneko fesi demdoho,” boluhup ulug, an nenda hwerieg lit henenggelegman hweag-hesauk kweleg, heneluk am on nim, duk fug on nim, henakol wereg on nim, mundoho Allah en duruk mu hauk katuhup anyo re.

¹³Henenggelegma wereg lit duruk katihik ai, it Yesus omaliki di o su o kabog-duruk on ai enobahet duruk kahi on inim wal-ha ma re, ke on henobahet dirihik fug? We an yabuk duruk katihik ale fahet, “Nenggik onggo eke, og-nemek,” ulug, henobam heng-henebuk fug angge welatihik ai en uruk kahep ane? Airoho henepihik fug on ai fahet henepeleg apdoho embeselug, henenda fano amek.

¹⁴Ketia henahaneg on henesa waruhuk en wenggelduk kahi. An waruhuk ai, anggin eke henobam henobahakuk ulug, waruhuk fug. Omalik doron en enaknisi hwal-enepuk fug. Ite, eneknisi en omalik doron hwal-enepuk mu, an henakni henangge eke hwelahuk en waruhuk fug. Ite, hit henebe neg henelaheg en waruhuk.

¹⁵Aireg ma, hit henobahet duruk kwit, nangge elehe fahat-deheg, nebe waraheg, duruk kahi ha ale ai re, nenda nahayeg boruk kahi mu, an hit henelaheg hum boruk kweleg famen, hiren an nelaheg behep ha fug no ulug, hweag-hisihi.

¹⁶“Paulus en anggin eke nenobam nenobahasi fug ai demdoho,” uruk kahep famen, hit foman uruk kwit, “Ele seiale fam nenengge hwelaroho lit, lal-nenepsi,” uruk kahep.

¹⁷Keroho lal-henepihik mu uruk kahep? An nori mon-enebik waharihik ai en hit henengge eke laloho an og-nirik wahausa ma, uruk kahep a? Mun eleg.

¹⁸Ap Titus henekit wamag ulug, miming-dirihikdeg, are Kristus inim hundig on eke inim monde feserihik ai re, henekit wahausareg at Titus en lal-henepuk kwit hit foruhup angge eke hwelasi mu, ulug, uruk kahep a? Mun eleg. At ninim nenenda misig higitdoho wenggele folug yabuk misig higitdoho duruk katuhuk eleg no?

¹⁹Wene su mundoho hweag-hesauk kweleg, hiren, “Paulus en along bal-dauk,” ulug, boruk kahep famen, an airoho duruk kahi fug, nori nerekwi. Hit neg nenda hundig deg ma, henenda wirik-ap henepmin ulug, Kristus en hweag-nutuk kweleg, Allah il hanim hweag-hesauk kahi.

²⁰An hit duruk kamuhup boruk kahi ale anyo wereg kweleg, amu on duruk mu hesa waheg, ne, hiren, “Airoho dukwag,” boruk kahep on wereg kweleg, amu on dik waheg, dehe ha no, an nakol boruk kahi, nori nerekwi. An hesa waruhukdeg, sahal-belaluk dil laheg, bou kwani-deheg, henehum kwe het-bet eheg, an along hat along beheg, nabug-habug eheg, wene seiale saharil laheg, winik-wonog eheg, minggit-manggat deheg, duruk mu hesa wahi ha no, nakol boruk kahi.

²¹An hesa waruhukdeg, hit siag humdoho duruk kwit, homi hesangge enebil laheg, henenda nauk halug, hesangge deheg, duruk katuhup on anyo henenda wat-dalug henesiag embeseruhup fug mu halug, Allah en hit hinil hanim nenggali ware nobaharuk men, oba yarihi ha no, nakol boruk kahi, nori nerekwi.