Read Ninia Yali 2 KORINTUS 13 Bible Online

2 KORINTUS 13 - Ninia Yali bible

2 KORINTUS 13

¹ Ketia henahaneg on henesa waruhuk en duruk kahi. “Wene eke enobam dopno hauk halug, ap biren ane, henahan a, Airoho duruk mu, ninil hehe, uruk halug neg de, demdoho on bouk alereg,” ulug, Allah wene fam lisu baleg wereg anyo ebetuk kamek.

²Bireneg on henesa waharihikdeg, it atam siag duswa on hinim mundoho wene hweag-hesauihik anyo hagdoho, ketia an nebe yatma wereg lit, “Hit siag eke duruhup on ai, henesa waruhukdeg, henobahakuk fug. Henewene bilinggoho en-henebuhuk,” ulug, ai hweag-hisihi.

³Hiren de, “Paulus ai re Kristus endama wereg lit, uruk ane, eleg a?” ulug, nabut balukoho uruhup ai re, nebe waharuk mu, enegdoho fu nobahakup. At Kristus hit duruk kahep ale ai fahet ebe maben deg lit, wongdoho bok atuk de fug. At hit hinim wereg lit, omamne humon wereg.

⁴At ap maben deg ma ulug, demdoho e salib fam waroho fousa famen, Allah omamne fam oluk unduhuk fesi mu, wereg anyo hag, nit oho nenebe maben deg famen, Kristus ninim hundig mu henenggelegma wereg lit, omamne fam dil waharuk mu, nesahup.

⁵Hit demdoho bolug, wauhup anyo demdoho mutlug lauk kahep ane, eleg a, anyo henemu hundomog furebahat-dalug, henebut bal-dauk kamek. Henebut bal-dahupdeg, “Fano mutlug lauk kahe,” ulug, hauk kahep halug, “Su Kristus Yesus nenendama wereg lit duruk kahe hehe,” bohup. Ne, mutlug lauk kahep eleg ma halug neg de, “Su Kristus nenendama eleg hehe,” bohup.

⁶Airoho bohup famen de, nit neg nenebut balduk kwit, fano mutlug lauk mu, enegdeg ma nesauk kahep boruk kahi.

⁷Hit siag duruk kam no ulug henobahet Allah hweag-utuk kahe ai, hit siag duruk eleg ma halug, “Paulus ori inim en along duswa,” ulug, nenebut bale folug, nenebug fano neg ukwag ulug, henobahet somban uruk kahe fug. Ite, nit nenebug siag uruk kweleg famen, hit Allah enda boruk ale neg dil noruk kamuhup ulug henobahet somban uruk kahe.

⁸Niren Allah wene ebe wene sahalehe ha fug alereg. Ite, leho foruk kamag ulug welahe.

⁹Nit maben deg kweleg, hit henomamneroho welalep ulug, nenahayeg boruk kahe. Hit henenda wirik-ap henebukwag ulug henobahet somban uruk kahe.

¹⁰Ai fahet de, nebe yatma wereg lit, lisu su bal-hisihi. Nebe fobik waharuk halug de, ninim wereg lit, nele haperoho bet-henebihi ha no ulug, lisu airoho baloho fehi ai. Tuhan en omamne og-nitsi mu hwalduk kahi ai, hit henebe siahap-henebukwag ulug fug. Ite, we henenda wirik-ap henebukwag ulug hwalduk kahi.

¹¹Ne, nori nerekwi. Wene fotogdoho eke hweag-hesa. Henenda wirik amag ulug duruk kwit, an wene komo-henepuk kahi su furoho weheg, henenda misig atlug seberoho welaheg, duruk kamek. Airoho duruk mu, at Allah ap homi enda hundig enebeheg, enenda seroho feseheg, duruk on anyo fahat-henesug laruhu.

¹²Hit Yesus omaliki neg welahep ma, mako bugdoho dang-dang atuk kamek. Ne, it Kristus demdoho boruk on Allah omaliki suman oho dang-henobahakesa.

¹³Tuhan Yesus Kristus enda hundig en fanoap henebeheg, Allah en henelaheg beheg, ne, Allah Aheime hinim hundig wereg lit, hit mundoho fahat-henesug laheg, duruk kamag, nori nerekwi. An Paulus en bal-hisihi.