Read Ninia Yali 2 KORINTUS 2 Bible Online

2 KORINTUS 2 - Ninia Yali bible

2 KORINTUS 2

¹Aireg halug, an hesa waruhuk en nenda wenggeldihik anyo, hit duruhup fam an henenda wat-dehep ha no, ulug, waruhuk fug berihik. Ite, henenda henahayegdeg halug neg de, hesa waruhuk berihik.

²An den, hit henendama siahap henobahaki ha ma re, hit henenda wat-dauk kweleg, an nendama fobik san aho ware nobahauk alereg? Mun eleg.

³Ai fam an den lisu atag baldihik anyo re, an nenda nahayeg wereg halug, hit oho henenda henahayeg wereg ma demdoho boruk mu, hesa waruhukdeg, hit fano duruk fam nenda nahayeg bouk on famen, siag duruk fam nenda wat-dihi ha no ulug, bok atuk kwit lisu neg atam bal-hesauihik ai.

⁴Henelaheg en nenda anggin sikno il kuruk kwit, nenda wat-deheg, oba humdoho yag-henebeheg, duruk kwit, hit henobahet lisu baldihik ai, hit henenda hesiluhup ulug, bal-hesauihik fug. Ite, an ap homi enelaheg boruk kahi famen, hit neg de henelaheg mun humon boruk kahi ale heneluk amuhup ulug, bal-hesauihik.

⁵At ap siag disi fam nit nenenda wat-dauk kahe anyo, an namu neg de fug. Nit abirangge, ite, nit foma humdoho siahap nenobahasi mu, nenenda wat-dauk kahe. “Nit abirangge siahap nenobahasi mu,” ulug, nenele hape on ekenim bet-duruk kamul fug behi. Ite, hit atam henebe humdoho en siag onggo deberuhup ai neg welamagdoho embeseiyek.

⁷Ne, ketia ap anyo enda humdoho wat-dauk kwit, enda mun firuk no ulug, disi ale anyo henepeleg apdoho fohupdeg, enda aho ware foruk kamuhup fano.

⁸At elaheg neg boruk kwit, henenda hundig duruk kahep ale hesauk kamag ulug, wauk kamek, ulug, komo-henebihi.

⁹An lisu bal-hesauihik anyo ai, di duhup su duhup hweag-hesauk kahi halug, “Yu o,” ulug, “Duruk mu esahuk ane, embeseruk mu esahuk a?” ulug, henebut balmin ulug lisu bal-hesauihik.

¹⁰It ap homi siahap henobaharuk anyo hiren enesiag henepeleg apdoho feseruk halug, an oho enesiag napeleg apdoho feseruk karuhuk. At Iblis duhuk boruk ale nenelukdeg ma, niren ap eke asiag fahet ebereg wereg ma, Iblis en, “Iyale aha,” ulug, sebele nenobahaik wam no, siahap napsi halug, napeleg apdoho fouk on, “Eke wereg ane, eleg a?” ai, furoho an napeleg famen, “Wereg hag,” bolug, henobahet Kristus il hanim fagdoho folug, napeleg apdoho feserihik.

¹² An Kristus duruk katsi ale Fano Wene hweag-hesahuk ulug, o Troas waharihikdeg, Fano Wene hweag-esauk karuhuk ulug, “Allah en kwe hwaloho nobahasi hihi,” ulug, berihik famen,

¹³nenare Titus nea waharuk eleg en, nenda firig wereg lit, it ap homi o Troas on dang-debeselug, o Makedonia suma waharihik.

¹⁴Ai famen de, it ap weim yabe folug, yande-enebukwag ulug, ap sehen anggen on autsi inim erat-erat lohwaleg angge lauk hag, nit Kristus ninim higitdoho erat-erat noruk kwit, mun leho welahe ma, nenakni Allah mot-duruk kamul. Amben fano on saharil lauk hag, Kristus duruk katsi wene fano wene nit foman di o su o saharil lauk kamag ulug, Allah en nenepuk.

¹⁵It ap homi enahap wendareg on inim, enahap wendareg eleg ma elehapdoho fesehu on inim, enenggelegma wereg lit, amben fano Kristus en Allah obahet yalduk on hag, nit neg.

¹⁶Aireg ma, it ap enahap wendareg eleg on en amben su sang-hauk kwit, “Su nenowatuk on,” fureberuk kweleg, enowareheg duruk famen, it ap enahap wendareg on en sang-hauk kwit, “Nenelugap nenepuk on,” ulug, fureberuk mu, enelugap enebeheg duruk. Airoho duruk mu, wene su san walug lauk kam alereg behep?

¹⁷It foman di angge su angge onggo fahet walug lauk hag, Allah wene onggo fahet hweag-isil lauk famen, nit neg de airoho re fug. Allah en at awene walug lowag ulug nenayonggo fesi mu, Kristus amingming angge wereg lit, at il nesauk kweleg, nenenda demdoho fam hweag-hesauk kahe.