Read Ninia Yali 2 KORINTUS 5 Bible Online

2 KORINTUS 5 - Ninia Yali bible

2 KORINTUS 5

¹O sabo wirig hag nenahap su meiyal-heg wamburuk halug de, obalma eke boholma wirig wereg neneluk. Boholma wirig ai re, ap homi en wiroho nenobahausa on fug. Ite, Allah en neg wiroho nenobahasi mu mundoho-mundoho welaruhu.

²Nenahap boholma on anyo owan wan-nenobaharuk eleg kweleg, nenabulukwe kohouk hag deg ma nesa no ulug, o sabo wirig hag nenahap endam on su, elehapdoho obalma boholma on, “Folo-folo wan-nenobahalep ahi!” boruk kahe.

⁴Nit nenahap endam on su fam wereg lit, “Nenerim,” ulug, embeselug, we nenabulukwe kohouk hag welamuhuk boruk kahe fug. Ite, nabelal-habelal nenepuk kwit, “Keron folo-folo wan-nenobahalep e!” beil noruk kwit, o sabo endam wirig su fam anggindeg kweleg, noruk kahe.

⁵Nabelal-habelal og-nesaroho nenenda fik-foukdoho nenobaharuk on ai, Allah neg. Ne, nit nabelal-habelal nenebuhu ai, demdoho nenebuhu boukwag ulug, Allah Aheime at og-nesasi mu, nenendama wereg.

⁶Nenahap su fam wereg kweleg, Tuhan obam oluluk kwik lahe ha fug alereg neneluk famen, Allah en, “Henebuhuk,” ebag anyo ninil halug duruk kahe fug. Ite, ninil ha fug angge we Kristus demdoho bolug dil noruk kahe ma, nenenda seroho welahe.

⁸Ai fam nenahap su hogdoho embeselug, “Tuhan weregma mundoho kwik lelareg welala e!” ulug, boruk kwit, welahe.

⁹ Aireg ma, nenahap su hog-duruk eleg kweleg, siag fano duruk katuhuk anyo Kristus en eneko onggo higitdoho og-nesowag ulug, nit abirangge at akit nenobahaik lahu mu, nenahap su hogdeg kweleg, hogdeg eleg kweleg, Allah ahayeg howag ulug neg, dil noruk kamuhuk boruk kahe.

¹¹Nit mundoho at akit nenobahaik lahu nenelukdeg ma, nenakol boruk kwit, di ap homi su ap homi nenele ahanhan futdoho hweag-esauk kahe famen, indip ai fahet hweag-esauk kahe anyo re Allah olukdeg. Ne, hit oho henendaman henelukdeg boruk kahi.

¹²Nit wene hweag-hesauk kahe ai re, “Nit alongdeg ma, hiren og-nenebiek,” ulug, hweag-hesauk kahe fug. Ite, it enobabut furebesouk fug angge wereg lit, enorohole furebeselug neg along boruk anyo en nenebug balduk halug, hit de bok am fug. Ite, “Nenaknisi oma,” ulug, along bal-nenepuk kamuhup ulug hweag-hesauk kahe.

¹³Nit hweag-esauk fam, “Wenenebo,” ulug, hweag-nesauk kweleg famen, Allah leho foukwag ulug il noruk kahe ma, hweag-nesauk mu, fano. Ne, “Ap enenda wereg lit hweag-nesauk,” ulug, uruk halug de, ai hit fahet hweag-nesauk mu, fano neg.

¹⁴Ap misig Kristus anyo nit ap homi mundoho nenenggulmu waratsi anyo fam nit mundoho ninim hundig mu, waratuk kwit, ninim at waratuhuk anyo eleg a? Ne, “Nit nenobalma waratsi anyo ai, nit nenonggwareg neg dil noruk kamag ulug waratsi fug. Ite, at nenobahet waratsi mu, oluk apdoho unduhuk fesi anyo obahet neg dil noruk kamag ulug, nenobalma at waratsi mu, hehe,” ulug, Kristus nenelaheg en nenepsi mu, disi wene ai, nit bok am fug angge hweag-esa ale neg nenepuk.

¹⁶Aireg ma, ap homi en enahap neg fu debeselug enabut balduk hag, nit ketia airoho ap homi enabut balduk kahe fug. Atam de, Kristus abut airoho balduhuk hag, fobik airoho balduk kahe fug neg.

¹⁷Ap eke Kristus inim hundig wereg halug, at enda keron waldoho fesi mu, abut atam on eleg atuk kwit, obalma keron atsi.

¹⁸Wene humdoho ehe ai, Allah en neg nenepuk. Allah ninim minggirig welatuhuk famen, ninim sebe-nenepsi mu, nit Allah ninim sebe-nenepuk wene su, hweag-esauk kamuhuk ulug, unduhuk nenobahasi mu, hweag-hesauk kahe.

¹⁹At Allah en, “An anyo di ap homi su ap homi an nele sahalduk kweleg, enesiag wenahauk fug angge wereg lit, Kristus disi fam ninim sebe atuhuk,”[4] ulug, hweag-esauk kamuhuk ulug, wene hwalduk on unduhuk nenobahasi ai.

²⁰Aireg halug, nit Kristus obalma wene yonggo hweag-isil noruk kamuhuk ulug, unduhuk nenobahasi mu wereg lit, Kristus disi ai fam, “Allah hinim minggirig welamuhup fug. Hinim seberiek!” ulug, Allah en ele abiroho hweag-hesa hag, niren hweag-hesauk kahe.

²¹At Allah en nit Kristus ninim hundig mu nesahureg, “An nil hanim hit fano hisihi,” ulug, hweag-nesowag ulug, Kristus siag duruk eleg on nit nenesiag anyo at obam sahali debesi.