Read Ninia Yali 2 KORINTUS 6 Bible Online

2 KORINTUS 6 - Ninia Yali bible

2 KORINTUS 6

¹ At Allah en uruk kwit, “Ai li em enele hole folug, enahap wendaruhuk, ulug, wenggeldihik anyo higitdoho henele hole folug, henahap wendatihik,” ulug, ebag ale Allah wene fam lisu balfag ma, holduk kamek, nori nerekwi. “Ai li em enahap wendaruhuk,” ulug, wenggelfag anyo, ketia henahap wendaruhuk bolug ebag ma, at henelaheg en fanoap henobaharuk anyo, alemare fehep ha no ulug, Allah ninim yabuk misig witil lauk kwit, nenele abiroho hweag-hesauk kahe.

³Wene ai hweag-hesauk kwit, nit eke duruk fam kwe bal-henepuk halug, hit eke en, “Siag eke ai dehesa,” ulug, nenebug uk no ulug, mun furebelug neg duruk kahe.

⁴Ite, di deheg su deheg duruk kwit, nit Allah amingming angge enegdeg ma nesowag ulug, lal-faldoho nenobahakeg, anggin-fanggin nenobahakeg, siag on nenobam aheg, duruk kweleg, nenenda hambuk debelug, wauk kahe.

⁵ Sabu hetdoho kwelabe nenobahakeg, yeik nenowareheg, ap homi lohwaleg angge kuk saloho belap-nenebeheg, nenepuk. Nenemurururoho wene hweag-isil noruk kwit, nohouk fug ale aheg, siburu obok nenebeheg duruk kahe.

⁶Airoho hauk kwit de, nenebut siag eke duk fug angge hwaloho wereg lit, ebe wene nenelukdoho welaheg, nenenda hambukdoho welaheg, nenebut sakoroho welaheg, duruk kahe ai fam nit Allah amingming angge enegdeg ma nesowag ulug duruk kahe. At Allah Aheime nenendama wereg lit, ap homi enebe demdoho nenenda hundig enepuk kahe.

⁷Airoho duruk kwit, Allah omamne fam wene ebe wene hweag-hisil noruk kahe. Airoho hweag-hisil noruk kwit, ap homi en, “Dog abik laheg, nenebe ninili og-deheg, dukwag ulug, dog angge fit foroho lahe,” ulug, uruk hag, nit Allah enda boruk ale duruk kahe ai, airoho deg lahe.

⁸Ap homi foman leho nenobaharuk famen, it foman enerim en sebele nenobaharuk. Foman nenalong boruk famen, foman bilip-nenepuk. Demdoho halug neg hweag-hesauk kahe famen, seiale uruk on apdoho nenobaharuk.

⁹It foman, “Ap enenuk eleg on,” ulug, boruk famen, foma neg de fu nenobahakeg, nit wareg on hag boruk famen, neneluk welaheg, nenowatuk kwit siahap-biahapdoho nenobahauk famen, waram fug angge welaheg,

¹⁰nenenda hesilduk famen, deg kweleg nenahayeg beheg, nenenggik eleg on hag famen, it abirangge enenggik werehe feseheg, nenangge eleg famen, di angge su angge mundoho hwaloho fahat-deheg, dil noruk kahe.

¹¹Nori nerekwi, hit Korintus on nenda hundig on! Nit nenenda nenepuk ale eke embesouk fug angge fagdoho hweag-hesauk kahe.

¹²Hit ninim nenenda hundig deg ma, nenenda nenepuk ale hesangge fagdoho hweag-hesa ale fano boruk kahe famen, hit neg de henenda henepuk ale anyo fagdoho nit hweag-nesa ale anggin henepuk mu, hesauihik.

¹³Aireg ma, hit nit nenenda hundig henepuk kahe hag, hit higitdoho nenepuk kwit, henenda henepuk ale mundoho fagdoho hweag-nesowag ulug, hit nomaliki deg ma, an henakni hag wereg lit, hweag-hisihi.

¹⁴It ap homi demdoho boruk eleg on nim, seberuruk ale ai higitdeg fug mu, hinim seberuruk kam fug. O seleg nim, mum nim, inim seberuk alereg behep? It fano duruk on mel, it Allah wene sahalduk on mel, inim seberoho wereg lit, duruk kam alereg behep? Duk fug alereg.

¹⁵At Kristus en uruk halug, at Iblis en, “Yu o,” eheg, Iblis en uruk halug, Kristus en, “Yu o,” eheg, uruk behep? Mun eleg. Nit Yesus demdoho boruk kahe on inim, it demdoho bouk fug angge wereg on inim, indip ke fam enenda misig debelug sebereg welamuhup? Indip mun eleg.

¹⁶ Allah obam wirigmu duruk ale nim, kembu obam wirigmu duruk ale inim, ambieg higitdoho duruk mu ulug uruk kahep? At Allah oluk mundoho wereg on obam wirig de nit nenebe su. At Allah en uruk kwit, “An ap homi enenggelegma wereg lit, it ninim noruk karuhuk. Ne, it an nomaliki wereg lit, enakni an at welaruhuk,”

¹⁷ ulug, ebagdeg Nenakni en wene eke uruk kwit, “Aireg halug, it Allah enapeleg on enenggelegman wilibik waheg, it ap ai hinim minggit-dalug, wilibik waheg, diek. Siag duruk on ai hinim hun-da fug. Airoho duruk halug, an den og-henebuhuk.

¹⁸ Og-henebuhukdeg, an henakni wereg lit, hit an nahwelani an nomaliki welamuhup, ulug, an henakni Allah humon di ale su ale dihi ha ale on anyo en hweag-hisihi,” ulug, ebag ma, lisu balfag.