Read Ninia Yali 2 KORINTUS 7 Bible Online

2 KORINTUS 7 - Ninia Yali bible

2 KORINTUS 7

¹Aireg ma, nori nerekwi! Hit an nenda hundig deg ma, Allah en wene ebag ai, nit nenobahet at hweag-nesasi mu, nenendama siag wenggeleheg, ebe deheg, duruk kahe fam nenenda siahapdoho fahat-dauk kahe anyo mundoho embeseruk kwit, nenenda ho-dauk kamuhukdeg, Allah nenakol boruk kwit, siag duk fug angge fano neg duruk kwit, at obahet neg eneko wereg ma nesowag ulug, duruk kamul.

²Nit mel, nenebe og-nenebuhup ulug, hweag-hesehe. Indip eleg kweleg, nenele henobam hekip heseheg, siahap henobahakeg, lal-henebeheg, nit airoho henebuk fug angge welahe.

³An den airoho hweag-hisihi ai, “Hit ninim nenenda hundigdeg ma, ninim waramuhuk oho, ninim neneluk wereg lit, dil lauk kamuhuk oho, fano neg,” ulug, endam hweag-hesauhuk mu, wene hweag-hesauk kahe ai nenebe og-nenepuk eleg ma halug, hweag-hesauk kahe fug. Ite, we hweag-hesehe.

⁴Hit ninim hundig mu demdoho og-nenebuhup bolug, mot-henepuk kahi. Airoho wereg lit, anggin-fanggin nenobam atuk kweleg, nenda hambukdoho neg welaheg, nahayeg humdoho heheg, duruk kahi.

⁵ Nit o Makedonia suma kwik waharuhukdeg, anggin nenobam atuk on eleg am fug angge en, nenenda se am fug alereg latsi. Hupmu hubet anggin-fanggin nenobahakeg, it eke ninim suahal eheg, nenendaman nenekol nenebeheg, nenepuk katsi famen,

⁶it ap homi enenda wat-dauk halug, enenda aho ware feseruk on Allah anyo en, nit nenenda aho ware nenobahaukwag ulug, ap Titus nenekit mondorik wahasi.

⁷At ebe nesa wahasi ai fam neg de, fug. Ite, at wahasireg, hiren at enda aho ware foruhup ale bilinggoho hweag-nesauk kwit, hit, Nea wala e! boruk kahep anyo mel, duruhup ale fam henenda wat-dauk kahep anyo mel, ne, an nabug balduk halug henele omamne fam nalong bal-napuk kahep anyo mel, mundoho bilinggoho hweag-nesasi fam nenenda aho ware nenobahasi mu, ketia nenda nahayeg humon boruk kahi.

⁸An lisu baloho monde henobahaik waharihik anyo kumu hauhupdeg, “Yehei,” ulug, henenda wat-dauhup anyo holdihikdeg, “Baloho mon-enebuk fug on famen dirihik e!” ulug, an oho nenda wat-dauihik famen, ai en, “Mundoho ai re fug o. We nukoho misiham neg enenda wat-dauk,” hole folug, an oho, “Ai halug, fano baloho mon-enepihik hihi,” ulug, boruk kahi.

⁹Ai famen, ketia neg de nahayeg humdoho hauk kahi. Hit henenda wat-dowag ulug dirihik bolug nahayeg hauk kahi fug. Ite, an lisu baldihik anyo kumu hauhupdeg, “Demdoho hweag-neseheik hehe,” ulug, henenda wat-dauk kwit, siag embeseruhup ai fam, an nahayeg humdoho boruk kahi. At Allah en, “Enenda demdoho wat-dauk halug, an den enesiag elehapdoho fohuk,” boruk hagdoho, hit demdoho henenda wat-dauk mu, lisu balduhuk anyo fam, nit siahap henobaharuhuk fug behe, nori nerekwi.

¹⁰It enenda demdoho boruk eleg on en enengge eke eleg atuk halug, enenda wat-dil lalug, ambiangma waratuk famen, nit neg de, Allah en nenenda wat-dowag bolug, nenobaharuk anyo, nit siag duruk kahe anyo nenenda wenggele folug embeseruk halug, Allah en nenahap wendaroho neneluk welamag ulug nenepuk mu, “Enenda wat-dowag ulug embeserihik fug e!” ulug, boruk fug.

¹¹Hit henenda wat-dauhup mu, Allah en henepsi anyo ebetuk kamek. Hit duruhup anyo, henenda wat-dauk kwit, siag henenggelegma wereg anyo folo-folo wenggeleheg, “Siag dopno dausa,” bouk no ulug folo-folo along bal-deheg, “Allah en nenowaruk no, nenekol,” boruk kwit, at siag disi anyo mun henerim beheg, “Wene su atsi anyo nenakni Paulus nim wenggela e!” beheg, siagdeg anyo folo-folo ngetdoho enereheg, duruhup anyo bilingguruk kwit, hit siag eke duruhup fug fano neg bilingguruhup hesehe.

¹²Aireg ma, an lisu baloho mondorik waharihik anyo re, at siag disi anyo mel, it siahap debesesi omano mel, it enobahet neg de, lisu baldihik fug. Ite, hiren, henenda hundig nenepuk kwit, hweag-hesauk kahe anyo folo-folo furebelug duruk ale Allah en hesowag ulug, lisu ai baloho monde henobahaik waharihik.

¹³Lisu balduhuk anyo, “Kumu hausareg, folo-folo wenggelswa,” ulug, nenesanggo holduhukdeg, nenenda nenahayeg humon hauk kahe. Ai owan boruk kweleg, Titus enda aho ware foruhup mu, ahayeg humon boruk kwit, nit hweag-nesa wahasi mu, nit oho nenahayeg humon boruhuk.

¹⁴An den atam Titus hweag-utuk kwit de, “It fobik fano duhup,” ulug, mot-henepihik hag duruhup mu re, an nenggali atihik fug. Niren di wene su wene demdoho neg hweag-hesauhuk hag, at Titus hweag-utuk kwit, hit mot-henepuhuk ai re demdoho.

¹⁵At Titus atam henelaheg boruk katsi famen, hesa wahasi mu, henakol en henowag elek-elek angge duruk kwit, dangdoho ebe wauhupdeg, wenggeluhup en hweag-hesasi anyo, “Yu o,” ulug, folo-folo wenggelduk mu hesasi anyo ebereg lit, ketia ebenaheg enda hundig boruk kwit wereg.

¹⁶Hit dil noruk ale mundoho fano neg dil noruk kamuhup ulug boruk kwit, an nenda nahayeg boruk kahi.