Read Ninia Yali 2 KORINTUS 8 Bible Online

2 KORINTUS 8 - Ninia Yali bible

2 KORINTUS 8

¹ Nori nerekwi. It Yesus omaliki di jemaat su jemaat o Makedonia kabog-duruk on mundoho en Allah enda hundig en debeseruk kweleg, duswa ale anyo hweag-hesak.

²Anggin-fanggin mun alongdoho enobam atuk kweleg, “Su nenebut balikoho nenepuk mu,” ulug, enahayeg humon boruk kwit, enenggik mun eleg famen, ap homi enelaheg boruk kwit, enangge mun alongdoho kabog-duswa.

³It, “Su fano kabog-duhuk,” bousa anyo neg kabog-duswa fug. Ite, “Ai huli kabog-duk fug alereg,” bousa anyo famen, alongdoho kabog-duswa ma, nesanggo holdihikdeg, hweag-hisihi. “It dorangge let-esahup fano,” berihik anyo deg kweleg, it enemu en enenda wenggele folug, “Nit mel, it Allah omaliki Yesus demdoho boruk on o Yudea kabog-duruk on enelaheg boruk kahe ma, enobahet kabog-duruk kamul,” ulug, enele abiroho hweag-nutswareg, humdoho kabog-duswa. It enangge atam kabog-duswa fug. Ite, atam enebe Allah og-utswareg, at Allah en, “An den unduhuk feseruk kahi anyo enele holduk kamag,” boruk mu, nit nenele furoho holswareg andog-duswa.

⁶Aireg ma, at Titus anyo Allah omaliki enelaheg en enobahet foruk on anyo andog-dil lauk mu, hit foma foruk kahep fug owan on anyo folo-folo fohup mu, wil wamag ulug komo-duruhuk.

⁷Hit henenda Yesus fam dip-debeheg, henenda henahayeg boruk kweleg hweag-eseheg, Allah uruk wene heneluk aheg, henenda ebe fam let-isil laheg, henenda hundig nenebeheg, duruk kahep[5] anyo humon saha uruk mu, ap homi enelaheg en enobahet kabog-duruk ale nim higitdoho humdoho duruk kamuhup ulug, hweag-hisihi.

⁸An wene hweag-hesauk kahi su re, hit mundoho duruk kamuhup ulug, nele omamne fam melal-henepuk kahi fug. Ite, it foman an nele hole folug enenda ahanhandoho duswa anyo hagdoho, hit an nele hole folug, “Enenda hundig en higitdoho duruk mu hesamin ane,” ulug, hweag-hisihi.

⁹Tuhan Yesus Kristus en nenelaheg boruk kwit, nenepsi anyo henolukdeg. Aren, “An nangge humdoho dindikdeg foroho lahi famen, it ninim higitdoho enengge wereg on amuhup en, an nangge elehe fahat-dahuk,” ulug, at kwenangma wambik waharuk kwit, angge elehe fahat-dasi.

¹⁰Yesus omaliki enobahet kabog-duruk kamuhup ale an boruk kahi on eke hweag-hesa. Tahun atam anyo fam, hit atag Yesus omaliki enobahet andog-esahuk bolug, andog-duruhup famen, hit foma foruhup fug on anyo, ketia fotogdoho fohup ai fano boruk kahi. Henenda ahanhandoho kabog-duhuk ulug, wenggele folug, it foma kabog-duswa anyo hag, ketia henangge eke wereg halug, ai at andog-esauk kamek.

¹²Hit henengge eleg on fug. Ite, wereg on henenda fano en, it eke feseruk halug, at Allah en, “Fano fehesa,” bohu.

¹³Hit duhup hweag-hesauk kahi anyo re, it foma foruk eleg kweleg, hit Korintus on neg fohup ulug, hweag-hesauk kahi fug. Ite, it amu on hinim higitdoho foruk kwit, let-let duruk kamuhup ulug, hweag-hesauk kahi.

¹⁴ Fobik hit henobam anggin atuk halug, it Yesus omaliki o Yudea wereg on anyo en, hit let-hesowag ulug, ketia hit henengge dot hum atsi mu, hiren it let-esahup fano boruk kahi. “At eke en siburu manna humdoho kabog-disi anyo dindikdoho atuk mu hasi fug. Ne, at eke en siburu manna dorangge kabog-disi anyo eleg ma hasi fug,” ulug, Allah wene fam lisu balfag anyo higitdoho hit airoho let-let duruk halug, henebe fano higitdoho welamuhup.

¹⁶Niren henobam ebereg lahe ma, let-hesahuk boruk kahe anyo hag, at Titus airoho let-hesauk kamag ulug, Allah en enda wenggel-itsi mu, Allah dang-duruk kahe.

¹⁷At Titus en, “An let-esele ahi,” boruk mu, “Hat o Korintus fano lahun ane eleg a?” owan hweag-utuk kweleg, endaman, “An at lahuk,” ulug, isireg, hesa waharuk ai.

¹⁸Henesa waharuk mu, nenere Yesus omalik eke Fano Wene hweag-isil lauk mu, di jemaat su jemaat mundoho unuk mun eneluk atlug leho foruk on anyo nim mon-enebik wahe ai.

¹⁹Niren Tuhan leho feheg, ne, ap homi enelaheg en let-eseheg duruk mu nesowag ulug, dil noruk kahe anyo at ninim, dil noruk kamag ulug, Yesus omaliki en eneko nenobahausa ma, hesa waharuk ai.

²⁰Ap homi enenda fano en enengge andog-duruk on anyo og-esauk kwit, dahandoho dehe ha ma ap homi en nenenggali ware nenobahauk no ulug, furebelug duruk kahe.

²¹ Nit Tuhan il hanim ulug neg duruk kahe fug. Ite, ap homi mel inil hanim duruk kahe ma, og-esa lauk eleg kweleg, nangginoho debelug, og-esa lahuk ulug, wenggeloho foruk kahe.

²²At Titus mel at nenere eke mel hesa waharuk mu, henere eke inim monde feik wahe. At ninim dil noruk kwit, hundig-hundig abut bale foruk katuhukdeg, mun furebelug dil noruk kwit, “An mel, furoho let-esauk karuhuk,” boruk mu, hauhuk. Aren nenele hole folug mun demdoho kabog-duhup besireg, ekenim, “Let-esele,” boruk kwit, hesa waharuk ai.

²³At Titus anyo neg de, an nare deg ma nambieg let-hesahuk ulug neg de, duruk kahe. Ne, it nenori foma hesa waharuk ai, it Kristus unuk leho foruk mu, Yesus omaliki kabogdeg on en eneko mon-enebik waharuk ai.

²⁴It Yesus omaliki di jemaat su jemaat amu kwe kabogdeg on anyo en, hit henenda hundig fam, Yesus omaliki og-eseheg, ne, “Paulus ori nim en it Korintus on leho feseruk anyo, airoho duruk fam leho feseruk,” ulug, eheg, dukwag ulug, enori mon-enebik wahausa ma, waharuk ai henenda hundig fam og-enebiyug.