Read Ninia Yali GALATIA 1 Bible Online

GALATIA 1 - Ninia Yali bible

GALATIA 1

¹Nori nerekwi, hit Yesus omaliki o Galatia sili domog jemaat kabog-duruk on, an Paulus it ap homi kwenangma on en enenda wenggele folug, yonggo mon-enepuk on rasul eneko unduhuk nobahausa fug. Ite, at Yesus Kristus waratlug laukmen oluk apdoho unduhuk fesi Akni Allah inim en nayonggo di obam su obam hweag-isil noruk kahi on anyo en hit wene eke hweag-hesa. Nori abirangge ninim welahe on en dang-henepuk kahe.

³Nenakni Allah, Tuhan Yesus Kristus inim enenda hundig en og-heseheg, henenda hambugap henobahakeg, duruk kamag.

⁴O ketia su fam it ap homi kwenangma on en siag neg dil lauk anyo ninim duk no ulug, deloho nenobahaikoho at Nenakni Allah besi ale higitdoho, nit siag duruk nesalug, Kristus en, “Enobahet wararuhuk,” ulug, nenobahet waratsi.

⁵At Allah en debesehuk ulug wenggelsi fam, Kristus nenobahet waratsi mu, “Allah unuk mundoho mundoho leho foruk kamuhuk,” ulug, demdoho hweag-hisihi. Amin.

⁶At Kristus henelaheg bolug[1] waratsi anyo fam, at Allah en fanoapdoho henobahakuk, ulug, momal-henepsi anyo folo-folo embeselug, wene amu on eke mutlug lauk kahep ma, hesauk kwit, nakol en yande-henepuk kahi.

⁷Wene Fano Wene amu on eke inim wereg eleg famen, it ap foman Kristus duruk katsi wene Fano Wene anyo, “Aham-dukohon,” ulug, wene amu on eke dopnoroho il noruk ai fam, hit henenda nong-hongdoho henobaharuk mu, esauihikdeg, ulug, hweag-hesauk kahi, nori nerekwi.

⁸Aireg ma, nit Fano Wene uruk on eke en ane, it yonggo boholma noruk on malaikat en ane, wene atam hweag-hesauhuk mu, wauhup anyo famen, nigon eke hweag-hesa waharuk halug ai, hururungdeg welamag.

⁹Hit atam Fano Wene wauhup anyo famen, ap misig eke en wene nigon eke walug hweag-hesa waharuk halug, “Waramag ulug, Allah en hururungdoho foukwag,” ulug, hweag-hesauk katuhuk anyo higitdoho su hweag-hisihi.

¹⁰An hweag-hesauk kahi ai, ap homi enahayeg nabukwag ulug uruk kahi ane, Allah ahayeg nabukwag ulug uruk kahi a? Ne, an ap homi en leho nobahaukwag ulug uruk kahi ane, Allah en leho nobahaukwag ulug uruk kahi a? Eleg. An atam ap homi enahayeg nabukwag ulug uruk katihik anyo hag uruk kale man, ketia an Kristus amingming angge welale fug. An uruk kahi ale anyo Allah ahayeg nabukwag ulug neg uruk kahi.

¹¹An Fano Wene hweag-isil noruk kahi ai re, it ap homi en enenda wenggele folug, il noruk ale wauihikdeg hweag-isil noruk kahi re fug, nori, nerekwi.

¹²An wene hweag-esauk kahi anyo re, ap homi enele wauihikdeg fug. Ne, it ap eke en hweag-nutswa fam il lauk kahi oho re fug. Ite, Yesus Kristus amu en nikaleroho unuko hweag-nitsi mu, hweag-isil noruk kahi.

¹³ An nit Yahudi nenele mutlug lauk kwit, dil lauk katihik ale ai hit oho holduk katuhup. Yesus omaliki kabog-duruk on jemaat Allah anyo di o su o wereg on eke fesehuk ulug, boruk katihik fug, mundoho elehapdoho fesemin ulug, sig-mug esauk katihik ale hit heneluk.

¹⁴ Nit Yahudi nenele mutlug lauk kwit, nori foma we dorangge hag duruk kweleg, an neg de nenombasi duruk katfag ale anyo mundoho hwalduk on atihikdeg, nenda ahanhandeg lit, furoho dil lauk katihik ai oho heneluk neg.

¹⁵ Airoho dil noruk katihik famen, nisinga ahummen owan endag-atuk eleg kweleg, at nelaheg bolug momal-napsireg, yonggo nobahasi on Allah anyo en

¹⁶an ap homi dagma holduk eleg on hweag-isil lauk karuhuk ulug, at amloho Yesus unug-neauk ale enda bolug, unug-neauk katsi mu, “Su keroho dik?” ulug, ap homi eke en hweag-nomag ulug, enekit hweag-esa laheg,

¹⁷ne, it atam mon-enepuk on rasul o Yerusalem welatswa on etmano enekit hweag-esa laheg, ai dirihik fug. Ite, an o Arab lauihikdeg, etma wereg latihikdeg, fobik sombandoho o Damsyik waharihik.

¹⁸ Waharihikdeg wereg man, 3 tahun debelug, ap Petrus ebe nolukdoho ulug, o Yerusalem lauihikdeg, nambieg demdoho hup 15 en nohorihik famen,

¹⁹it mon-enepuk on rasul foma ai an nil mun esauihik fug. Tuhan Yesus aut Yakobus anyo[2] amu neg nil hauihik.

²⁰An lisu bal-hesauk kahi su re, seiale re fug. Allah il hanim mun dik-demdoho hweag-hisihi.

²¹An ap Petrus nambieg welatuhukdeg, ai en, o Siria inim, o Kilikia inim, waharihikdeg,

²²o etma mundoho noruk kweleg, it Kristus inim hundig on di jemaat su jemaat o Yudea kabog-duruk on anyo en nebe inil neausa fug famen,

²³aben uruk kwit, “Nit demdoho boruk kahe wene anyo atam aren elehapdoho femin ulug, sig-mug nesauk katsi anyo famen, ketia wene anyo oho folug hweag-isil noruk,” uruk mu, holswareg,

²⁴“Yehei u,” ulug, an duruk kahi anyo fam, Allah unuk leho foruk katswa.