Read Ninia Yali GALATIA 2 Bible Online

GALATIA 2 - Ninia Yali bible

GALATIA 2

¹ Ai en 14 tahun debelug, Allah en, O Yerusalem lahun, ulug, nikaleroho unuko hweag-nitsi mu, an hun Barnabas ninim lauk kwit, hun Titus anyo hondohweil lauhuk. Lauhukdeg, it Allah omaliki o Yerusalem fahat-enesug on omano, nenemu neg ambi atuhukdeg, nenele matuk kwit, Fano Wene it ap homi dagma holduk eleg on hweag-isil noruk kahi ale anyo, hweag-esauk katihik inim, hweag-esauk kahi inim, iren, “We alemaroho duruk,” ulug, bouk no ulug, enolukdoho furoho hweag-esauihik.

³Anyo hweag-esauihikdeg, at nenare ninim lauhuk on Titus anyo ap Yunani on deg ma, it ap foma we seiale, “Nit henori o,” ulug, nenenggelegma kwik wahausa anyo en, “Ahap balukwag,” boruk mu esauhuk famen, it nenowesi anyo en neg de, “Baliyug,” ulug, hweag-nesa fug angge we bok wereg ma esauhuk. It ap ai, nit Kristus Yesus ninim hundig mu, wundetdoho nenobahasi wene hwelauk kwit, Yahudi wene fotog-esauhuk anyo ekenim kwelaboho nenobahaul ulug kwik wahausa famen,

⁵hit Allah en uruk wene Fano Wene wauhup anyo neg nenenda kahaleg fam hwalduk kwit, dil lauk kamuhup ulug, nit wene fotog-esauhuk on ekenim duruk kamuhup ulug hweag-hesakoho kwik wahausa anyo, “Yu o, duhuk,” ulug, hweag-esa fug angge, “Henemu neg,” ulug, embeseruhuk.

⁶ Ne, it nenowesi enunuk bogdeg on ihi anyo en, it Allah en enorohole fu nenobahalug, “Eke su along deg, eke su maben deg,” boruk eleg ma, an oho enunuk ai fam along boruk kahi fug famen, it nenowesi enunuk bogdeg on famen, “Enalong boruk kwit, wene dil lauihik anyo bilinggoho hweag-esauk mu nealug, iren wene eke wene misig katukdoho, Su duhup, ulug, hweag-nutuk mu esamin ane?” berihik famen, it oho bok neg wereg ma esauihik.

⁷Wene Fano Wene it ap homi enahap baleg on Yahudi omano hweag-isil noruk kamag ulug, Allah en ap Petrus unduhuk folug monde fesi anyo hag, an higitdoho Fano Wene it ap dagma holduk eleg on hweag-isil lauk kamag ulug, Allah en unduhuk nobahasireg, monde nobahasi anyo furebousareg,

⁹it Allah omaliki o Yerusalem on fahat-enesug lit, enowesi enunuk bogdeg hag wereg on omano enunuk Yakobus mel, Kefas mel, Yohanes mel, omano en hweag-nutuk kwit, “Allah en hat oho unduhuk hobahasi hehe,” ulug, an Barnabas ninim nenenggik seneko dang-nenepswa ma, niren ap homi dagma holduk eleg on hweag-esa laheg, iren ap enahap baleg on Yahudi on omano hweag-eseheg, duruk kamuhuk fano, ulug, nenele matuhuk.

¹⁰Ne, nenele matuk kwit, iren, “It ap homi Allah omaliki ninim wereg on enenggik eleg on anyo enelaheg boruk kamek,” ulug, wene we misig neg ai nenobam fousa ai, an oho airoho neg duhuk ulug nahayeg boruk kahi.[3]

¹¹Ai en, fobik at nenowe Yakobus en autsi o Antiokhia nenekit mon-enebik wahasi anyo owan waharuk eleg kweleg, at Kefas unuk eke Petrus anyo en Antiokhia wahasi. Wahasireg, nenori Allah omaliki enahap baleg eleg on inim siburu hesangge nauk katsi famen, Yakobus en mon-enebik wahasi on waharuk mu esasireg, “It ap foman nenori enahap balukwag boruk on halug, nanggoho hweag-numlusa,” ulug, akol en ohwal-dalug, it enahap baleg eleg on inim ekenim nauk katsi fug mu, an hummen enggali ware ferihik.

¹³Ai en, it nenori Allah omaliki Yahudi on foma, Petrus akol en enda sug-sagdoho wereg ma hausareg, it higitdoho ohwal-dausa ma, at Barnabas oho it enekol en duruk ale mutlug lauk kwit, Petrus inim dopno isi.

¹⁴Ne, an oho Allah en demdoho ebag wene fano wereg kweleg, amuroho dil lauk mu nil esauihikdeg, it abirangge inil hanim, Petrus hweag-utuk kwit, “Hat ap Yahudi on famen, it Yahudi on duruk ale hagdoho duruk kahen fug lit en, it dagma on duruk ale anyo higitdoho fano dirihin famen, ketia nunggwe ulug, it dagma on en Yahudi on duruk hag, duruk kamag ulug, hweag-esauk kahen?” ulug, enggali ware ferihik.

¹⁵“It ap dagma holduk eleg on ai siag duruk on,” uruk anyo, nit ap aireg on fug. Nit demdoho Yahudi on endag-atuhuk famen,

¹⁶ Allah en wene melaloho Musa fene en hweag-nesebag anyo higitdoho duruk fam fanoapdoho nenobahaku fug. Ite, Kristus Yesus demdoho bolug nenenda obam dip-deberuk ai fam neg fanoapdoho nenobaharuk nenelukdeg ma, nit fanoapdoho nenobahaukwag ulug, nit oho Kristus Yesus demdoho bolug, obam dip-deberuhuk. Wene melaloho Musa fene en hweag-nesebag ale anyo duruk fam ap homi fanoapdoho fesehu fug nenelukdeg ma, nit Yahudi on oho, fanoapdoho nenobahaukwag ulug, wene melaloho Musa fene en hweag-nesebag anyo duruk kahe fug. Nit oho, Kristus demdoho bolug, nenenda at obam dip-deberuhuk.

¹⁷Nit Kristus demdoho bolug, obam dip-deberuk kahe fam inim hundig wereg lit, fanoapdoho nenobahaukwag ulug duruk kwit, “It ap homi dagma on siag duruk hagdoho duruk kahe hehe,” ulug, nenerim boruk kwit, “Kristus demdoho boruk wene anyo fam nenesiag enam atsi mu, Kristus ai re siag,” ulug, uk alereg behep? Mun eleg, nori, nerekwi.

¹⁸An den wene melaleg higitdoho duruk ale fotog-hauihik anyo oko nikangge obalma duruk katmin ulug, duruk halug, higitdoho duk fug angge wereg man, it ap homi en, “Fano duk angge famen, siag duruk hehe,” ulug, bohup fug behep? Airoho neg bohup famen,

¹⁹wene melaloho Musa fene en hweag-nesebag on deg kweleg, amuroho dirihik fam nowaroho nobahasi mu, waratihik hag deg ma, ketia, “Diroho diyug, airoho diyug,” hweag-nutuk anyo, an holihi ha fug alereg. Ite, Allah en hweag-nutuk halug neg de duruk karuhuk. An Kristus ninim e salib fam dopnoroho nobahausa ma, waratihik.

²⁰Ne, ketia dil lauk kahi ai, an nomamne fam fug. Kristus nendama wereg lit, nomamneap napuk kweleg, dil lauk kahi mu, an kwenangma suma wereg lit, at Allah amloho nelaheg bolug nobahet waratsi mu, at demdoho bolug obam dip-deberuk kwit, dil lauk kahi.

²¹Wene melaloho Musa fene en hweag-nesebag wene anyo, nit duruk kahe fam fanoapdoho fesouk ale welalep man, at Kristus alemaroho nenobahet waratsi bela. An fotog-hauihik anyo nikaleroho obalma duruk fam Allah nelaheg boruk kwit wenggelfag anyo, alemaroho fehi ha no, an airoho duhuk mun eleg, nori, nerekwi.