Read Ninia Yali GALATIA 3 Bible Online

GALATIA 3 - Ninia Yali bible

GALATIA 3

¹Nori nerekwi, hit Galatia on su yei. Yesus Kristus e salib fam waratsi wene anyo, hwenaroho fug, fagdoho enamegma hweag-hesauk katihik on holduk katuhup famen, ketia san henenda kahalsi mu, henenda eleg sohouroho hag dil noruk kahep?

²Hit wene onggo eke hweag-numluhup ulug, hein og-hesamin behi anyo su. Hit Musa fene en wene melaloho febag wene anyo higitdoho dil noruk fam Allah Aheime wauhup ane? Fano Wene henesanggo hole folug, Yesus demdoho boruhup fam wauhup a? Eleg. Demdoho boruhup fam wauhup.

³Hit nunggwelug henenda eleg sohouroho duruk kahep? Hit henoluk keron fam dil lauk kamag ulug, Allah Aheime omamne en henepsi famen, ketia henonggwareg henomamne en dil lauk fam, “Nenenda wirik daul,” ulug, duruk kahep a? Airoho duk fug alereg famen.

⁴Hit wene wauhup mu, henobam atsi ale anyo mundoho we alemaroho henobam atsi a? An airoho boruk kahi fug, nori, nerekwi.

⁵At Allah en Aheime og-heseheg, ne, henenggelegma along on deheg, duruk ai, hit Musa fene en wene melaloho febag wene higitdoho duruhup fam duruk ane? Fano Wene hole folug, Yesus demdoho bolug, wauhup anyo fam duruk a? Eleg. Wauhup fam duruk henolukdeg.

⁶ Allah wene baleg fam uruk kwit, “Ap Abraham en Allah demdoho bolug, enda at obam dip-debebag ma, Allah ahayeg en at il hanim fanoapdoho febag,” ulug, lisu baleg wereg anyo furebeiyug.

⁷ Aireg ma, it ap homi Allah demdoho boruk on anyo neg Abraham ombasi ebe on it wereg, boruk kamek.

⁸ At Allah en Abraham hweag-utuk kwit, “An nahayeg hat hobam hobaharuk kwit, di ap homi su ap homi abirangge enobam feseruk karuhuk,” ulug, abug wene hweag-etfag anyo, it ap Allah en hweag-esauk kweleg, hweag-esauk katfag on anyo en, “Wene su fam fobik at Allah en ap dagma on Allah demdoho boruk halug, Allah il hanim fanoapdoho fesehu hehe,” ulug, enegdegma hebagdeg, lisu balfag.

⁹Aireg ma, at Abraham en Allah ele demdoho bolug, obam dip-debebag ma, Allah ahayeg obam febag anyo hag, nit oho at ele demdoho bolug, Kristus obam dip-deberuk kahe halug, Allah ahayeg nenobam nenobaharuk.

¹⁰ Allah wene baleg famen uruk kwit, “It ap homi wene Musa fene en melaloho febag wene anyo abirangge higitdoho duruk kwit, misig neg eke duk fug angge sahaloho embeseruk halug, Allah en hururungdoho fesehu mu, waramuhup,” ulug, ebag ma, it eke en, “Nit fanoapdoho nenobahaukwag ulug, wene melaleg anyo higitdoho dukohon,” ulug, duhup famen, duk fug alereg en, deg kweleg, waratuk kamuhup at hauk kahe.

¹¹ “Ap eke Allah ele demdoho bolug, obam dip-deberuk halug neg de, Allah en at il hanim fanoapdoho fohumu,[4] oluk mundoho welaruhu,” ulug, lisu baleg ai fam, Musa fene en wene melaloho febag anyo higitdoho duruk fam, Allah en at il hanim fanoapdoho nenobahaku fug enegdeg ma hauk kahe.

¹² Ai famen de, wene melaleg higitdoho duruk ale ai, Allah demdoho boruk ale higitdeg fug. Ite, Allah wene baleg fam uruk kwit, “Di wene su wene melaleg anyo abirangge furoho duruk halug, oluk welaruhu,” ulug, ebag ai fam, wene melaleg higitdoho duruk ale amureg hauk kahe.

¹³ Ne, Allah wene baleg famen uruk kwit, “Ap misig eke e fam dopnoroho foruk halug, at hururungdeg wereg,” ulug, uruk ale lisu baleg wereg ma, Allah en Musa fene en melaloho febag wene anyo wereg kweleg, nit amu duruk katuhuk ai fam, nit oho waramag ulug hururungdoho feseruk hag, hururungdeg welatuhuk famen, ketia re, Kristus nenobalma e salib fam dopnoroho fousa ai fam, hururung atuk kwit, nenonggo bale folug, wundetdoho nenobahasi mu, welahe.

¹⁴Ai disi ai re, Allah en, “Nahayeg hobam hobahakuk,” ulug, abug Abraham hweag-etfag ai, Kristus Yesus duhu fam it ap homi dagma holduk eleg on inim ahayeg enobam feseruk kwit, nit abirangge Allah ele demdoho bolug, Kristus obam dip-deberuk fam Allah en, “Naheime og-hesahuk,” ulug, abug hweag-nesebag anyo wahuk ulug, disi hehe.

¹⁵Nori nerekwi, nit uruk kahe ale eke wal-heheg ikohon. Nit ap kwenangma on famen, ap eke ninim sali ware folug, “Airoho neg duhuk,” ulug, lisu baloho ahalue enehaleroho foruk halug, ap eke en wene ai sahaloho embeseheg, ne, ap eke en wene amu on eke dopnoroho feheg, duk ale mun siag hauk kahe anyo hag,

¹⁶ at Abraham ombasi inim fobik duhu wene Allah en Abraham abug hweag-utuk kwit, ombasi enebe humdoho halug, “Hombasi,” ulug, ai hweag-etfag fug. Ite, ebe misig neg Kristus deg ma, “Homba,” ulug, abug hweag-etfag.

¹⁷ At Allah en, “Airoho duhuk,” ulug, abug wene Abraham katukdoho hweag-etfag li em 430 tahun debelug, Musa fene en wene melaloho febag ma, fobik melaloho febag anyo famen, atam hweag-etfag ale owan duruk eleg kweleg, elehapdoho fouk alereg behep? Fouk fug alereg, ulug, hweag-hisihi, nori nerekwi.

¹⁸ Nit Allah demdoho boruk fam Allah en nenobahakuk, ulug, Abraham hweag-etfag anyo, fobik Musa fene en melaloho febag anyo duruk fam debesehuk belep man, atam at Abraham ai hweag-etlep fug famen, ebag ma, demdoho bebag fam Abraham en webag hehe.

¹⁹Airoho deg ma, Musa fene en wene melaloho febag ai, nunggwe ulug hweag-etfag behep? Eleg. Allah demdoho boruk fam wahup, ulug, abug hweag-etfag wene anyo, Abraham omba eke fene en duhuk ebag ma, omba ai owan endag-atuk eleg kweleg, siag atam enegdeg ma hauk kamag ulug, Musa fene en wene melaloho dopnoroho hweag-nesebag. Musa fene en wene melaloho febag ai, Allah en bekit ap homi Israel on hweag-esebag fug. Ite, it boholma yonggo noruk on malaikat en oko ap homi kwenangma on eke bul honggolegma wereg ma, hweag-etfag ma, aren oko ap homi hweag-esebag.

²⁰Ap biren wereg kweleg, ap bul honggolegma on en eke hweag-itsi on walug, eke hweag-irik lauk famen, Abraham hweag-etfag anyo neg de, Allah ebe misig neg deg ma, amu en enda wenggele folug,[5] Duhuk, bebag ma, bekit Abraham hweag-etfag.

²¹Aireg halug, Allah en Musa fene en wene melaloho febag inim, ne, Abraham abug hweag-etfag inim, ai indip amu amu behep? Mundoho eleg, nori nerekwi. Nit neneluk welamag ulug, wene melaleg indip amu welalep man, wene ai higitdoho duruk fam, Allah il hanim fanoap nenebuhu boruk kala famen,

²²nit abirangge siag duk ale neg nenepuk ai fam, waramuhuk anyo neneluk amag ulug, Allah wene baleg famen hweag-nesauk. Aireg ma, Allah en nenebuhuk ulug abug hweag-etfag anyo, nit di ap homi su ap homi mundoho Allah ele demdoho bolug, nenenda Yesus Kristus fam dip-deberuk fam, nenebuhu hehe.

²³Nit demdoho boruk fam wahup ebag wene anyo, waharuk halug, “Allah demdoho bolug wauk kamul,” ulug, owan enam aik waharuk eleg kweleg, ap sabu hetdoho olma kwelaboho wereg hag, Musa fene en wene melaloho febag fam laroho fahat-nenesug latsi.

²⁴Aireg ma, Yesus waharuk halug, “Hit demdoho boruk fam Allah il hanim fanoapdoho henobahaku su,” ulug, hweag-nesowag ulug, Musa fene en melaloho febag ai, we elamna apma fahat-nenesug latsi famen,

²⁵Allah demdoho boruk fam wauk on anyo enam aik wahasi mu, ketia wene melaleg elamna on anyo apma welahe fug.

²⁶Hit mundoho Kristus Yesus demdoho bolug, henenda at obam dip-deberuhup mu, hinim hun-atuhupdeg, hit Allah omaliki welahep.

²⁷Kristus hinim hundig halug, at unuk fam ikma wamburuhup mu, sum oko wan-dauk anyo hag, Kristus obabut oho fahat-dauhup.

²⁸Henobabut misig Kristus on atuhup mu, su Yahudi on su Yunani on, su ap unuk wereg su ap unuk eleg, su ap su hwe, airoho mun uk fug alereg. Nit mundoho Kristus Yesus ninim hundig mu, nenebe misig at welahe.

²⁹ Ne, nit Kristus omaliki demdoho welahe halug, Abraham ombasi deg ma, wene demdoho boruk fam wahup abug hweag-etfag anyo, nit at wauk kahe.