Read Ninia Yali GALATIA 4 Bible Online

GALATIA 4 - Ninia Yali bible

GALATIA 4

¹Wene hweag-hisihi anyo foma eke su hweag-hesa. Ap eke en, “An nangge su, namloho sauwe atuk halug, og-uruhuk,” boruk anyo, amloho angge famen, amloho anyo owan sauwe atuk eleg kweleg, nangno-hauk kweleg, ap homi enapma enamingming angge hag wereg.

²Akni en, “Ai salim og-uruhuk,” boruk anyo, owan hop uruk eleg kweleg, nimi anyo aknisi enapma wereg lit, enele furoho holduk kweleg, angge anyo akni en foroho wereg.

³Anyo hag, nit oho sauwe am fug angge omalik doron hag hesangge wereg kweleg, it ap homi kwenangma on en, “Diroho diyug, airoho diyug,” enenda wenggeloho enomaliki hweag-isil wilibik waharuk wene anyo neg hole folug, duruk kamag ulug, sabu hetdeg hag welatuhuk.

⁴ Ai famen, Musa fene en wene melaloho febag anyo, nit duruk kamag ulug, sabu hetdeg hag wereg anyo, nenonggo bale folug, wundetdoho nenobahakureg, ap eke amloho on kulduk hag, nit at omaliki airoho kul-nenebukwag ulug, Allah, en, “Ai salim, namloho mondorik lahuk,” ulug, wenggelfag anyo, andigim atsi mu, homi enomaliki endag-enepuk hag, hwe misig en amloho endetsi. Endetsi mu, Musa fene en wene melaloho febag wene duruk ale inim at dil lauk katsi.

⁶Ne, ketia hit Allah omaliki degma,[6] Allah Aheime mondorik wahasi anyo, henendama wereg lit, “Henakni ai Allah,” ulug, hweag-hesauk mu, hiren, “Nenayon e! Nenakni o!” uruk kahep.

⁷Aireg ma, nori, nerekwi. Hit ap homi enamingming angge hag welahep fug. Hit Allah omaliki at welahep. Ne, Allah omaliki deg ma, angge og-hesahuk bebag anyo hit neg.

⁸Hit atam Allah henapeleg wereg lit, Allah ebe on fug famen, it amu on enemingming angge atlug, enapma wereg lit, enele hole folug, kembu wiri folug mot-duruk katuhup famen,

⁹ketia neg de, Allah heneluk aheg, ne, Allah en hit oho henebe oluk aheg, atuhupdeg en, hit nunggwe fahet, wene ebe on anyo embeselug, fanoap henepuk eleg kweleg, alemaroho duruk katuhup wene anyo ekenim apma sebeleg welamul bolug, henambol somban wag lauk kahep?

¹⁰Nukoho su fam diroho duk ale siag. Bigalem su fam airoho duk ale siag. Mo laharuk kweleg, wamburuk kweleg, airoho duk ale siag, ulug, di salim su salim mundoho ousaroho feil lauk anyo, hit oho furebelug higitdoho dil lauk mu hesauihikdeg,

¹¹an henobahet duruk katihik ai, “We alemaroho duruk katihik ane?” bolug, nenda anggin napuk, nori, nerekwi.

¹²Hit wene, “Diroho diyug, airoho diyug,” uruk wene anyo, holuk fug angge en, demdoho bolug Allah omaliki atuhup anyo, an oho wene ai embeselug, hit duruhup hag Allah omalik atihik mu, an duruk kahi hag, hit duruk kamuhup, ulug, minggirig, nori, nerekwi. Hiren an siahap napuhup halug, hweag-hisihi fug.

¹³An ouk napsi mu, henenggelegma ninim wereg lit, atam fano wene hweag-hesauk katihik anyo heneluk.

¹⁴Ouk napsi fam nebe mun siag deg ma, “Asingsing deg ma, hwalduk ale nenerim a,” ulug, nahayeroho fotog-nea on famen, it yonggo boholma noruk on malaikat higitdeg ma, ulug, nebe og-nabeheg, henenda henahayeg fam hwal-nabeheg, su Kristus hag deg ma, ulug, nele holeheg, duruk kwit,

¹⁵atam henahayeg humdoho duruk mu, hesauihik famen, yaho, nanggin aha? Nelaheg boruk kwit, “Ninil hwiliroho og-utuk angge en de, og-hetla famen de, yehei,” boruk mu, hesauk katihik famen,

¹⁶ketia hit duruk katuhup anyo fagdoho hweag-hesauk kahi fam, selei on hagdoho nobaharuk mu, hesauk kahi.

¹⁷It ap foma anyo re, henenda lal-henebukoho lit, enenda ahanhan futdoho hera-henebil waharuk famen, ai fam fanoap henebukoho lit hera-henebil waharuk fug. Ite, “Nit neg nenomaliki wereg lit, nenele holduk kamag,” ulug, hera-henebil henekit waharuk.

¹⁸It demdoho henelaheg en fanoap henebik waharuk halug, fano deg ma, an nebe eleg kweleg neg leho feseruk ai fug. Ite, nebe henenggelegma wereg kweleg, leho feseruk ale fano, nori, nerekwi.

¹⁹Yehei, nomaliki. Homi omalik il fenggenlug heinet watuk hag, hit Allah omaliki amuhup ulug, an henobahet heinet watuk katihik famen, ketia hit Kristus obabut hag amuhup ulug, ekenim heinet watuk kahi.

²⁰An henenggelegma wereg lit, hit dil noruk ale hesahukdeg, nele sakoroho hweag-hesahuk, “Yehei,” boruk kahi famen, hit duruk kahep ale an hesauk kahi fug mu, nenda firig wereg lit, nele amuroho hweag-hesauk kahi ai, nori, nerekwi.

²¹Hit wene Musa fene en melaloho febag anyo duruk kala boruk kahep anyo, melaloho febag wene baleg eke hweag-hesamin behi mu, henesanggo holduk kamek.

²² At Abraham omaliki biren endag-enepfag anyo, eke hwe amingming angge anyo en endereheg, eke ohwe ebe oho on anyo en endereheg, debag lisu baleg wereg ma, hauk kahe anyo.

²³Hwe amingming angge fam endetfag ai, it kwenangma on en endag-enepuk hag, endetfag. Ne, at ohwe oho on en endetfag anyo neg de, wene abug wene fam endetfag.

²⁴Wene su anyo wal-heheg ulug, wereg. Homi biren ai, wene biren yihig anyo hag deg ma, eke Dom Sinai famen ebag wene ai, hwe Hagar hag. Hwe Hagar Abraham amingming angge wereg lit, omalik endetfag anyo inim Abraham amingming angge sebeleg welatfag anyo hag, it wene Dom Sinai fam ebag anyo wauk halug, it ap homi enemingming angge hag sebeleg wereg.

²⁵Ne, Dom Sinai o Arab wereg ai, hwe Hagar hag deg ma,[7] wal-hauk kwit, hwe Hagar omalik inim Abraham amingming angge sebeleg welatfag anyo hag, Dom Sinai fam, “Diroho diyug, airoho diyug,” wene hweag-etfag anyo, it o Yerusalem on en owan duruk mu, ap homi enamingming angge hag wene ai apma sebeleg wereg esauk kahe.

²⁶Ne, o Yerusalem boholma on ai, at ohwe ebe oho anyo hag deg ma, at wene yihig demdoho bebag fam omalik endetfag hag, nit oho, “Diroho diyug, airoho diyug,” ebag anyo duruk kahe fam de fug. Ite, demdoho boruk fam Yerusalem boholma on welahe.

²⁷ Allah wene baleg famen uruk kwit, Hwe hekipdoho hag foruk anyo omalik humdoho endag-enebeheg, ne, hwe ahayeg boruk anyo, omalik dorangge endag-enebeheg, duhu mu, hat hwe homalik endag-da fug angge ibili welahen su, hahayeg beheg, ne, omalik il fenggenlug heinet watuk kahen ale hapeleg anyo, hahayeg en dang-deheg, duruk kamin, ulug, ebag ai, nit demdoho boruk kahe on mundoho nenisinga hwe Sara at neg.

²⁸Nori, nerekwi. Hwe Sara abug wene demdoho bebag fam Ishak endetfag anyo hag, nit oho Allah wene hweag-nesauk on demdoho boruk kahe fam, at omaliki at endag-nenepuk.

²⁹ It kwenangma on endag-enepuk hag ondoho on anyo en, Allah Aheime en wene hweag-etfag fam ondoho on anyo siahap-biahapdoho dil lauk katfag hag, ketia it higitdoho Dom Sinai famen ebag ale duruk on anyo en, nit demdoho boruk kahe on anyo siahap-biahapdoho nenobaharuk famen,

³⁰ Allah wene lisu baleg anyo ke baleg behep? Eleg. “Hwe amingming angge amloho inim, enakni angge eta inim hwela fug alereg ma, hwe amingming angge omalik inim, wilibi fesein,” ulug, ebag ale lisu baleg wereg ma,

³¹nit hwe amingming angge ombalosi fug. Nit hwe ebe oho ombalosi deg ma, wene Sinai famen ebag anyo nit duhuk mun eleg, nori, nerekwi.