Read Ninia Yali GALATIA 5 Bible Online

GALATIA 5 - Ninia Yali bible

GALATIA 5

¹Nit wundetdoho noruk kamag ulug, Kristus en wundetdoho nenobahasi mu, it ap homi enamingming angge sebeleg wereg hag, “Diroho diyug, airoho diyug,” ebag wene anyo apma henobahaukwag ulug, hweag-hesa waharuk halug ai, enele holuk fug angge henolokdoho welamek.

²Hit furobahat-daluhup en an Paulus en wene eke hweag-hesa. Hiren, “Nenahap bal-nenepluhup fano,” hweag-esauk kahep halug, at Kristus en henepuk anyo, alemat apdoho foruk kahep.

³“Nit nenahap bal-nenepluhup fano,” hweag-esauk kahep halug, wene “Diroho diyug, airoho diyug,” wene foma embeselug, wene misig ai neg unduhuk folug, mun abirangge duruk kam ale aruhu, ulug, henolukdoho komo-henebihi.

⁴Musa fene en wene melaloho febag anyo duruk fam, “Allah il hanim fanoap-dauk kamul,” boruk kahep on, Kristus hinim minggit-dauk kahep ma, Allah henelaheg en henebuhuk wenggelfag anyo henebuk fug aleroho fahat-dauk kahep.

⁵Nit Allah demdoho bolug Kristus obam dip-deberuhuk anyo fam Allah Aheime en Allah il hanim let-nesauk kweleg, Allah en at il hanim fanoapdoho nenobahaku, ulug, nenenda ebereg lit, nangno-hauk kahe.

⁶Nit Kristus Yesus ninim hundig wereg lit, nenahap baleg inim, baleg eleg on inim, ai along deg fug. Ite, Kristus obam dip-deberuhuk fam ap homi enelaheg en fanoap debeseil noruk kamuhuk ai neg de along deg.

⁷Hit atam Kristus obam dip-deberuk kwit, henenda ahanhan fam dil lauk mu hesauk katihik famen, Allah demdoho uruk wene anyo fano mutlug lauk katuhup ai, wene fotog-esowag ulug, san henenda kwani-henebil lauk?

⁸At Allah hit yonggo henobahasi on anyo en de fug.

⁹ “Roti firukwag ulug, fituk angge ragi dorangge neg foruk men, ebe abirangge humdoho fituk,” ulug, hwenaroho uruk anyo heneluk.

¹⁰Nit Kristus ninim misig hundig mu, an boruk kahi ale anyo hit higitdoho boruk kwit, dil noruk kamuhup ulug, demdoho boruk kwit, hweag-hisihi, nori, nerekwi. Ne, at lal-henebil lauk on ai neg de, Allah en siag onggo og-uruhu mu, akol boruk kamag.

¹¹Ne, nori, nerekwi. An neg de, indip ke fam lal-fal napuk behep? An, “Henahap baluhup,” il noruk kale man, airoho napuk kalep fug famen, Yesus e salib fam waratsi wene hweag-hisil lauk kwit, “Henahap baluhup fug,” ulug, kwelaboho feseil lauk kahi fam, enolok en lal-faldoho nobahail lauk.

¹²It ap henenda enden-henebil kuruk anyo enahap ai neg balusa hayog. Ite, ebe ai inim bal-dalug, henenggelegman wilip-amag, boruk kahi.

¹³Nori, nerekwi. Hit neg de wundetdoho noruk kamag ulug, Allah en momal-henepsi mu, “An iyale wundetdoho nobahasi mu, nenda nauk halug, hesangge dil noruk kaikohon,” ulug, duruk kam fug. Ite, nelaheg helaheg boruk kwit, henori henerekwi hinim let-let duruk kamek.

¹⁴ “Hit henebe henenda hundig dauk kahep hag, hinim welahep on airoho neg henenda hundig enepuk kamek,” ulug, hweag-nesasi ai, wene melaleg ebe mundoho duruk de ai.

¹⁵Hit libil-libil atuk kwit, at eke senggeloho feik laheg, duruk kahep fam henebe elehapdoho fahat-dehep ha no, furebahat-dauk kamek.

¹⁶Ai halug, dil lauk kamuhup en, Allah Aheime en melal-henepuk kamag. Ne, henenda endam on nauk on anyo mutlug lauk kam fug, ulug, hweag-hisihi.

¹⁷ Henenda endam on en Allah Aheime watmin beheg, ne, Allah Aheime en henenda endam on watmin beheg, boruk kwit, inim seleiroho minggirig wereg ma, hit duhuk boruk kahep anyo, duk fug ale atuk mu, hahup.

¹⁸Ne, Allah Aheime en melal-henepuk anyo dil lauk halug neg de, wene melaleg apma welamuhup fug.

¹⁹Enobabut endam on fam duruk ale anyo su. Homi inim hesangge dil laheg; enenda homi fam neg ebereg lit, hesangge-besangge dil laheg; duk fug on famen, enenda nauk halug, mutlug laheg;

²⁰kembu duhwi wireheg; kwenangal fam ap homi enowareheg; enenda minggit-manggat dauk kwit, suahal eheg; an airoho welale e, ulug, boureheg; enolok folo-folo wilibeheg; an den duruk kahi ale neg fano beheg; an along hat along eheg; enendan wenggele folug, seialeroho il lauk kwit, minggit-enebeheg;

²¹an den ap su hagdoho welale e, ulug, enenda hape beheg; ahalue siag on homoroho nil lauk kwit, wenenebo deheg; yunggul hesangge dil lauk kwit, enele ahalue fam homi hesangge enebil laheg; duruk ai on mundoho obabut enegdeg ma, eke dil noruk halug, at Allah apma fesouk fug alereg, ulug, atam komo-henepihik anyo at komo-henebihi, nori, nerekwi.

²²Ai famen de, e anggen ebe on yihil lauk hag, Allah Aheime enendama melalduk kweleg, duruk anyo su. Ap homi enenda hundig beheg, enahayeg neg beil laheg; enenda seroho welaheg; anggin-fanggin enobam atuk kweleg, enenda hambukdoho welaheg; ap homi enelaheg beheg; ap homi fano debeseil laheg; furoho neg dil laheg;

²³enda sakoreg lit, debeseheg; enonggwareg hwal-dauk kwit, enenda nauk on folo-folo sebeloho feheg; duruk ai on Allah Aheime enendama debeseruk kweleg, duruk. Ne, duruk ale ai on, “Duk fug,” ulug, wene eke melaloho hweag-nesauk fug, nori, nerekwi.

²⁴Nit Kristus Yesus omaliki atuhuk on halug, nenenda endam on en nenenda nauk kwit, siag duk ale nenepuk ale ai, mun waroho sebeloho foruhuk.

²⁵Nit Allah Aheime en nenobabut keron fam duruk kamag ulug, nenobahasi mu, aren melal-nenepuk on anyo neg de hole folug, higitdoho dil noruk kamul.

²⁶Niren winik-wonog uruk kwit, eke en eke enda ouk-ap debeheg, an ap su hagdoho welale, ulug, boureheg, duruk kam fug, nori, nerekwi.