Read Ninia Yali GALATIA 6 Bible Online

GALATIA 6 - Ninia Yali bible

GALATIA 6

¹Nori, nerekwi. Henare eke fetagdoho siag duruk mu halug, hit ap Allah Aheime ele henendaman uruk kweleg, furebelug duruk kahep on anyo en, “Nare enda kahaleheik ma, siag deheik ai hag, an oho siag dihi ha no, nakol,” ulug, henare anyo ekenim fano dil lauk kamag ulug, henele sakoroho hwalduk kamuhup.

²Anggin henobam atuk halug,[8] let-let duhup fam, Kristus wene melaleg hweag-nesasi anyo higitdoho duruk kamuhup.

³Hit ap along on eleg famen, ap eke en, “An along on,” boruk kahep halug, henonggwareg lal-dauk kahep ma, fureberuk kamek.

⁴Nenemu domog en duruk kahe ma, hit eke en at eke duruk ale fam wal-hauk kwit, hit duruk kahep ale anyo, “Fano duruk kahi ane?” ulug, wal-ha fug. Ite, henemu domog en duruk kahep anyo wal-hauk kwit, fano halug, henahayeg bohup fano.

⁶Nit Kristus wene holduk kahe anyo en, nenengge fano angge anyo minggiroho ap nenaknisi hweag-nesauk on og-esahuk fano.

⁷Allah laluk fug alereg famen, lalduk kahep halug, henonggwareg neg lal-dauk kahep ma, furobahat-dauk kamek. Ap eke a yatuk hag, anggen yihig airoho neg bal-dauk mu,

⁸hit henenda endam on en duk ale henepuk anyo dil lauk kahep halug, anggen yihig siag on bal-dauk anyo hag, henebe at waramuhup. Ne, Allah Aheime henendaman hweag-hesauk anyo neg furebelug dil lauk kahep halug neg de, anggen yihig fano on bal-dauk anyo hag, mundoho henoluk at welamuhup.

⁹Aireg ma, nit di fano su fano dil noruk kwit, ko-nenepuk kweleg, fotog-esa fug angge mundoho dil lauk halug, anggen yihig fano bal-dauk anyo hag, nit hwelahuk neneluk deg ma, ko-nenepuk halug, fotog-esahuk fug. Dil lauk kamuhuk neg.

¹⁰It di ap homi su ap homi abirangge fanoap debeseruk ale, “Iyale aha,” ulug, fanoap debeseil noruk kwit famen, it ap homi nit ninim higitdoho demdoho boruk on anyo halug neg de, fanoap debesehuk ulug, mun ebereg welamek.

¹¹An nenggik fam lisu ebe mun humon bal-hesauk kahi su hakiek.

¹²“Henahap baliek,” ulug, enele omamne fam mingming-henepuk anyo, we enonggwareg en enenggik fam duruk ale fahet, ap homi en yande-nenebukwag ulug, leho fahat-dil noruk ai, Kristus e salib fam waratsi wene anyo hweag-isil noruk fam, lal-faldoho nenobahauk no ulug, enakol boruk kwit, “Henahap baliek,” ulug, duruk.

¹³It enahap baleg anyo en, Musa fene en melaloho febag wene higitdoho duk fug angge wereg lit en hit neg henahap balduk kamuhup ulug, mingming-henepuk anyo re, “Nit nenomaliki neg hum ahesa,” ulug, leho fahat-dakoho hweag-hesauk.

¹⁴Ai famen, an neg de Tuhan Yesus Kristus e salib fam waratsi wene anyo demdoho bolug wauihik ai fam, it ap kwenangma on duruk ale anyo re, ap waratlug enele uruk eleg anyo hag deg ma, it duruk anyo an eke duruk kamag ulug, hweag-nom fug alereg beheg, ne, an oho waratihik hag deg ma, iren hweag-nutuk anyo oho holuk fug ale nabeheg, duruk kahi mu, an duruk kahi ale fam leho fahat-dihi ha fug alereg. Ite, Tuhan Yesus Kristus e salib fam waratsi wene anyo neg leho foruk kahi.

¹⁵Enahap baleg mel, enahap baleg eleg mel, ai along deg fug. Ite, enenda ket endag-enepuk kwit, nenobabut hwaloho nenobaharuk ai neg de, along deg.

¹⁶It wene ai ebereg lit, dil noruk on anyo mel, ne, Israel on eleg famen, it demdoho boruk fam Allah omaliki atuk on mel, di ap homi su ap homi abirangge Allah en enelaheg boruk kwit, enesiag hwik-esalug, enenda sereg enahayeg welamag ulug, debeseruk karuhu.

¹⁷An Yesus wene hweag-isil noruk kahi fam, nabil noruk katswa yebil abog nobam hundig wereg ma, it henenda kahalik waharuk on anyo enewene eke balduk ale re nerim deg ma, mun fotog-hesalug wilibik lowag.

¹⁸Ne, nori, nerekwi. Tuhan Yesus Kristus hinim wereg lahep ma, henelaheg boruk kwit, fahat-henesug welamag, ulug, wene su mundoho hweag-hisihi, nori nerekwi. Amin!