Read Ninia Yali EFESUS 1 Bible Online

EFESUS 1 - Ninia Yali bible

EFESUS 1

¹ Hit Allah omaliki Kristus Yesus hinim hundig lit, dipdoho dil lauk kahep on, o Efesus[1] welahep anyo, Allah enda bebag fam Kristus Yesus ayonggo rasul unduhuk nobahasi on, an Paulus anyo en wene eke hweag-hesa.

²Nenakni Allah inim Tuhan Yesus Kristus inim, enenda hundig en, og-heseheg, henenda hambukdoho fano welamuhup ulug, henebeheg, duruk kamuhup, ulug, henobahet somban uruk kahi.

³At Allah en o boholma etmano en nenendama fanoapdoho nenobaharuk on anyo abirangge Kristus ninim hundig lahe ai fam fanoapdoho nenobahasi mu, Tuhan Yesus Kristus akni Allah mundoho mot-duruk kamul.

⁴At Allah en, “Fobik Kristus en debesehu anyo fam an nomaliki siag eleg angge nil hanim an nobahet eneko fano neg welamuhup,” ulug, o kwenang su owan wal-duk fug mu, momal-nenepfag.

⁵O atam at Allah en nenelaheg boruk kwit, “Kristus Yesus en[2] debesehu fam it an nomaliki neg welamag ulug, og-enebuhuk,” ulug, enda wenggeloho febag ai, “An nahayeg hahuk,” ulug, debag.

⁶Nenelaheg boruk kwit, at amloho enda hundig on en og-nesasi anyo fam, angge nikdoho hilil-helal heheg og-nesauk mu, nit at mundoho mot-duruk kamul.

⁷ At Allah en, Kristus waratuk kwit, amep wilipsi ai fam nenonggo bale folug, sabu loloho nenobahakeg, nenesiag mundoho elehapdoho nenobahakeg, disi ai, at enda hundig en nenelaheg neg boruk ale anyo embesouk fug angge en dindikdoho nenebeheg neg dil wahasi.

⁹Allah enda wereg on neg deg ma, mun fu nenobahasireg, “An den Kristus fene en airoho debesehuk,” ulug, wenggeloho febag ale heraho welatfag anyo, “Eneluge fesele angge aho!” ulug, boruk katfag anyo, fagdoho hweag-nesasi.

¹⁰At Allah en wenggeloho febag ai, “Andigim aruhu salim, an den boholma on mel, kwenangma on mel, di angge su angge mundoho Kristus apma neg seberoho fohuk,” wenggelfag ale higitdoho dip-uhu en wereg.

¹¹At Allah en, “Duhuk,” ulug, wenggelduk anyo, higitdoho neg dip-atuk mu, o atam en “An nomaliki neg welamuhup en, Kristus inim sebe debesehuk,” ulug, wenggelfag higitdoho, nit at omaliki at momal-nenepfag ma, welahe.

¹²Aireg ma, nori nerekwi. Ai nenebuhuk wenggelfag ai, “Nit Kristus airoho nenebuhu,” ulug, nit atam demdoho bolug nenenda at obam dip-deberuhuk anyo en, dil noruk fam, Allah unuk leho foruk kamul.

¹³Hit oho, henahap wendatuk wene Allah en uruk wene, Fano Wene anyo hole folug, demdoho bolug, henenda Kristus fam dip-deberuhup mu, Allah omaliki atuhup mu, wam enegdeg ma howag ulug, esanggo benelduk anyo hag, at Allah en, “Hit an namu neg nomaliki,” ulug, enegdeg ma hesowag ulug, Aheime enehaleroho og-nesahuk ulug, wenggelfag anyo higitdoho hit og-hesasi.

¹⁴Ai hit et nit et og-nesasi ai, fobik demdoho nit at omaliki neg nenebe loloho nenobahaku anyo ebereg welamuhuk ulug, hwe elowam watuk hag, Allah Aheime akdoho og-nesasi mu, Allah unuk leg amag ulug, mot-duruk kamul.

¹⁵Aireg ma, hit en Tuhan Yesus demdoho bolug, henenda at obam dip-debeheg, ne, Allah omaliki hinim henenda hundig enebeheg, dil noruk kahep anyo an nesanggo holdihikdeg,

¹⁶hupmu hubet hit henobahet somban uruk kwit, hit dil noruk fam an den Allah dang-duruk kahi.

¹⁷Tuhan Yesus Kristus akni Allah mun leho wereg on en hit henenda werehap henobahakeg, Allah en duruk ale enegdeg ma hauk kwit, at ebe furoho henelugap henobahakeg, duruk on Allah Aheime anyo, og-hesowag ulug, henobahet heng-duruk kahi.

¹⁸ Ai duruk kwit, hit hwelahup ulug, henayonggo henobahasi mu, henenda ebereg welahep anyo inim, nit at omaliki deg ma, angge nikdoho alongdoho og-nesauk kwit, fanoap nenepuk karuhu wenggelfag anyo inim, ne, nit demdoho boruk on Allah omamne mun alongdoho nenepuk anyo inim, heneluk amuhup ulug, “Enendaman fureberuk kamag ulug, selehap enepuk kamin,” ulug, Allah hweag-utuk kahi. Nit demdoho boruk nesalug, at omamne nenepuk ai fam, Kristus waratuk men, oluk apdoho unduhuk fesireg, Allah inim higitdoho mun leho welamag ulug, boholma enggik bekit fil hwerie fesi.

²¹Kristus anyo airoho leho neg wereg lit, it bohol kwe enalong boruk inim, it enele omamne fam ap homi melale feseruk on inim, it enowesi enunuk bogdeg lit enanggilug wereg on inim, ketia wereg on inim fobik welamuhup on inim mundoho enunuk humon boruk famen, it abirangge mun sebeleg lit, Kristus apma wereg kweleg, Kristus amu neg mun leho wereg.

²² Allah en di mungguat su mungguat inim, di ap su ap enalong wereg on inim, di angge su angge abirangge Kristus apma sebeloho folug, nit Allah omaliki di o su o welahe on seberoho, nenunggul hag at neg leho welamag ulug unduhuk fesi.

²³Ne, nit Allah omaliki di o su o seberoho welahe on anyo re, at ebe foma minggirig deg ma, ebe misig amag ulug, unggul anyo fam hundi nenobahasi mu, ketia at ebe di o su o abirangge mun sahareg[3] wereg.