Read Ninia Yali EFESUS 3 Bible Online

EFESUS 3 - Ninia Yali bible

EFESUS 3

¹Ai debesehuk wenggelfag anyo ebetuk kwit, hit ap homi dagma on Kristus Yesus wene hweag-hesauk katihik anyo fam sabu het-napswa ma, suma wereg lit, Allah mundoho mot-duruk kahi.

²At Allah en nenelaheg boruk kwit, hit fanoap henobahaukwag ulug, unduhuk nobahasi ai, hit mun heneluk. (

³Wene heraho welatfag nikdoho unug-nitsi ale lisu horog angge emberimmu bal-hisihi anyo.

⁴ Hit kumu haluhupdeg, an Kristus fahet Allah endama heraho ale nangginoho fureberihik anyo heneluk amluhup.)

⁵Wene herako welatfag wene hweag-esauihik anyo re, it ap homi atam welatfag on anyo fagdoho hweag-esa fug angge welatfag famen, ketia neg de, Allah en Aheime mondorik wahasi on anyo fene en, it ap Allah obahet eneg on fano wene walug di o su o hweag-isil noruk kamag ulug, mon-enepuk on rasul anyo nim, it ap Allah en hweag-esauk kweleg, wene hweag-esauk on nabi anyo nim, mundoho fagdoho eneluge fesesi.

⁶Fano Wene wauk fam it ap homi dagma on nim, ap homi Yahudi on nim, Allah omaliki neg deg ma, Allah en fanoap debesehuk ulug wenggelfag anyo, higitdoho hweleheg, nenebe foma minggirig hag hit at welaheg, ne, Allah en Yesus Kristus disi fam nit nenebuhu wene abug hweag-nesasi anyo, hit oho higitdoho weheg, duruk kahep ai, wene herako wene ketia neg fag atsi ai.

⁷Ne, wene Fano Wene anyo re, at omamne mun nikdoho duruk ale nolugap nobaharuk kwit, hweag-esauk kamag ulug, nelaheg en unduhuk nobahasi.

⁸It demdoho bousa on Allah omaliki anyo abirangge leho wereg kweleg, an mun enapma sebeleg kweleg famen, Kristus angge dindikdeg kweleg, nenebil wilibik waharuk anyo en, wene anyo hit ap dagma on heneluk amag ulug hweag-heseheg, ne, at di angge su angge wal-disi on Allah anyo en, wene o endam wenggeleg on heraho welatfag anyo, nangginoho dip-uhu wenggeloho febag anyo henelugap henobahakeg, duruk kamag ulug, nelaheg boruk kwit, unduhuk nobahasi.

¹⁰Ne, wene wenggeleg herako foroho latfag anyo re, nit Yesus omaliki kabog-duruk on jemaat di o su o welahe on en wene ai oho folug, dil noruk fam, it boholma on enalong wereg on inim, enautsi nim, it mundoho en, “Allah enda wereg lit, di wene su wene wenggeloho debeseruk anyo ketia su at hehe,” ulug, eneluk amag ulug, herako welatfag.

¹¹Allah endama heraho welatfag ai, o atam wal-duk fug mu, Tuhan Kristus Yesus en nenepuk kweleg, duhu ulug wenggeloho febag anyo higitdoho neg disi.

¹²Nit Kristus demdoho bolug, nenenda obam dip-deberuhuk mu, at ninim hundi nenobahasi mu, nenakol eleg nenenda seroho wereg lit, Allah akit kwik lahe ha fanoreg.

¹³Aireg ma, nori, nerekwi. An Fano Wene hweag-hesauk katihik fam anggin nobam atsi mu, welahi su fam, henakol en henenda fireheg, duk fug. Su napuk ai re, hit eke fanoap henebukwag ulug, napuk mu fano.

¹⁴Aireg ma, it ap homi boholma on nim, kwenangma on nim, enenggul unuk domog mundoho enakni misig neg, “Nenakni Allah,” ulug, uruk kahe anyo apma sebe ulug,

¹⁶“Hat mun leho wereg lit, hangge dindikdeg kweleg, homaliki debeseruk kahen anyo hag, Haheime en homaliki enendama enomamne apdoho feseruk kamin,” ulug, henobahet somban uruk kahi.

¹⁷Hit demdoho boruk kahep fam Kristus henendama bok aik kulug wereg kweleg, e omanggen kwenang wirik on fam belabeg hambukdeg wereg hag, ap homi hinim henenda hundig beheg, duruk kwit, hit airoho henenda hambukdoho wereg lamuhup, ulug, henobahet somban uruk kahi.

¹⁸O lendi yahandi ambiang foman foma ai wal-hauk famen, Kristus henelaheg boruk indip anyo re, mun humon deg ma, wal-ha fug alereg famen, hit demdoho boruhup on Allah omaliki mundoho hinim, we dorangge fureberuk kahep halug, ekenim furebelug henoluk aheg, ne, Allah enda abut deg ale ai mundoho hit higitdoho henobahakeg, dukwag ulug, henobahet Allah hweag-utuk kahi.

²⁰Allah omamne humon en nit nenendama nenepuk Allah en duruk ale along humdoho duruk kwit, niren heng-duruk kahe on nim, wenggelduk kahe on nim, dotdoho hag. Nenendaman nenepuk anyo neg de along humon wereg ma,

²¹nit Yesus omaliki di o su o ketia welahe on inim fobik welamuhup on inim en Kristus Yesus ninim hundig wereg lit, mundoho Allah leho foruk kamuhuk. Amin!