Read Ninia Yali EFESUS 4 Bible Online

EFESUS 4 - Ninia Yali bible

EFESUS 4

¹Ai halug, nori, nerekwi. Allah en, “Hit airoho duruk kamuhup,” ulug, heneyonggo henobahasi anyo, an den Tuhan awene hweag-isil noruk kahi fam sabu het-napswa anyo en higitdoho neg dil lauk kamuhup ulug, komo-henebik.

² Dil lauk kwit, henenda sebele fahat-deheg, henenda sakoroho debeseheg, henenda hapereg eleg angge hambukdeg lit, fetagdoho debesouk fug angge welaheg, hinim wereg on henenda hundig demdoho duruk kahep eneg deg ma hesowag ulug, nelaheg helaheg boruk kwit, let-let deheg,

³Allah Aheime en henenda misig sebe henobaharuk anyo, hinim minggit-dehep ha no, furebelug welaheg, duruk kamek.

⁴Henenda ebereg welahep anyo misig neg hwelahup ulug, yonggo henobahasi anyo higitdoho, henebe misig at. Ne, Allah Aheime oho misig neg boruk kamek.

⁵Nit Tuhan anyo ebe misig neg, ne, nenenda demdoho boruk wene anyo oho misig. Ne, ikma belap-nenepuk wene oho re misig.

⁶Nit ap homi mundoho nenakni ai, Allah misig neg wereg lit, olma dagma at ebe sahareg lit wereg. Di angge su angge abirangge at apma wereg ma, di duruk su duruk abirangge aren neg duruk kwit wereg.

⁷ Allah wene baleg famen uruk kwit, “At lendima mun lehoma lahaik lauk kwit, it aselei on sabu hetdoho wereg anyo humdoho og-eneplug lahaik lasireg, at angge ap homi onggo eleg we yohwan-enepsi,” ulug, ebag anyo hagdoho, nenelaheg boruk kwit Kristus en yohwan-nesasi higitdoho, nenemu hundomog wauhuk.

⁹Ne, “At lahaik lasi,” ebag anyo ai, ke ulug ebag behep? Eleg, at kwenang apma mun sebeloho wambik lasireg,[5] lahaik wahasi anyo halug ebag anyo eleg a?

¹⁰Ne, at wambik lasireg, lahaik wahasi anyo ai, di o su o mundoho at ebe sahareg welamag ulug, bohol emberimmu neg lahasi anyo.

¹¹Ne, nenemu domog yohwan-nesasi ai, it foma mon-enepuk on rasul anyo welamag ulug, unduhuk feseheg, foma Allah en hweag-esauk kweleg, Allah wene hweag-esauk on nabi anyo welamag ulug, unduhuk feseheg, foma Fano Wene di o su o ekema hweag-isil noruk kamag ulug, unduhuk feseheg, it foma o misigmu Allah omaliki Allah wene furoho hweag-eseheg, hwal-enebeheg, duruk kamag ulug, unduhuk feseheg, disi.

¹²Ai disi ai, nit Allah eyabuk furoho dil lauk kwit, nit nenebe fam Kristus ebe humdoho saha ukwag ulug, nit demdoho boruhuk on Allah omaliki anyo abirangge fi-furoho og-nesasi.

¹³Ai disi ai re, nit abirangge Allah amloho duruk ale neneluk amuhukdeg, demdoho boruk fam nenenda misig atlug, Kristus enda mun wirik on wereg anyo hag, nit airoho nenenda wirik-ap nenebil wilibik waharuk kamag ulug, unduhuk nenobahasi.

¹⁴Aireg ma, nori, nerekwi. Ik funag-lenggag angge duruk kwit, di angge su angge haroho hwik-eseheg, ne, hol en di angge su angge walug laheg, duruk anyo hag, it ap homi seiale wene uruk on anyo en, lal-henepul ulug, enenda wenggele folug, kwani-enepil lauk on enele il noruk anyo, fou on hag wereg lit, holduk hag, nit nenenda wirik atuk halug, holduk kamuhuk fug.

¹⁵Ite, niren ap homi nenenda hundig bolug neg debeseruk fam, demdoho wene Allah diroho wereg ulug, hweag-nesauk wene oho folug, furoho duruk kwit, nenenggul hag Kristus enda mun wirikdeg hag, nit airoho nenenda wirik-ap nenebukwag ulug, dil noruk kamul.

¹⁶ Nenenggik neneyog abirangge duruk on amu amu yohwandeg wereg famen, nenebe misig nenomanggen fam kindi-fundireg lit, dil noruk halug, nenebe mun fano wereg anyo hag, nit Allah omaliki demdoho boruhuk anyo, nenenggul hag Kristus ninim airoho hundig lahe ma, nelaheg helaheg boruk kwit, nenemu domog duruk ale unduhuk nenobahasi anyo higitdoho dil noruk nesalug, Kristus ebe omamne aheg, sauwe aheg, dil lauk karuhu.

¹⁷Aireg ma, nori, nerekwi. It ap homi Allah wene holduk eleg on dagma on en enenda mumdeg hag deg lit, alemaroho wenggele folug, dil noruk ai hag, hit ekenim dil lauk kam fug, ulug, Tuhan en hweag-nutuk kweleg, nele omamneroho komo-henebihi. It anyo Allah wereg ale mun enapelegdeg lit, enenda haroreg ma, Allah inim minggirig wereg ma, Allah en enobabut kerap debesehu mun eleg.

¹⁹It siag duruk ale enenggali bouk fug angge homi fam neg enenda ebereg lit, “Hesangge dul,” bolug, enenda nauk halug, enahayeg fam dil noruk.

²⁰Ai famen de, Kristus duruk katsi wene anyo hweag-hesauk kwit, hit duruk kahep ai on eke inim hweag-hesauihik fug.

²¹At duruk katsi wene anyo hweag-hesauk kweleg, wauhupdeg, at ele wauk kwit, Allah obabut deg ale ai Yesus duruk katsi fam henoluk atsi.

²² “Nenenda nauk halug mutlug lauk katuhuk ai fanoap nenebukwag ulug mutlug lauk katuhuk fug. Ite, siahap nenebikoho angge fahet mutlug lauk katuhuk hehe,” ulug, heneluk atuhup mu, henobabut endam on anyo nonggoloho embeseiyek.

²³Embeselug, henenda mun ket wal-henebukwag ulug, Allah wene neg mutlug laheg,

²⁴ ne, Allah siag duruk eleg abut mun fano eneg wereg anyo hag, hit henobabut mun kerapdoho henobahasi ai oho fahat-dauk kwit, fano neg dil laheg, duruk kamek.

²⁵ Aireg ma, nori, nerekwi. Kristus ninim hundig mu enggik eyog hag nit deg ma, hit hit seiale uruk kahep anyo embeselug, hit abirangge demdoho wene neg yig-yig atuk kamek.

²⁶ Henolok duruk kwit, siag dehep ha no duk fug. Ne, henolok duruk kwit, siag henendama sebele folug wereg kweleg, mo obuk ik lauk ai siag.

²⁷At Iblis en, “Iyale aha,” ulug, henenda kahal-henebuk no, siag duk fug angge welamek.

²⁸Hit ap homi enangge yoholi angge wauk kahep on anyo, ekenim yoholi angge wauk kam fug. Ite, henesiburu nenggeg, it ap homi enengge eleg on let-eseheg, duruk kamag ulug, hwenaroho hag duk fug angge henenggik famen neg yabuk wit-dauk kamek.

²⁹Wene siag on eke uruk kwit, siahap-enepuk kam fug. Ite, it holduk on anyo en, “It uruk kahesa ai fam, nenenda wirik-ap nenebeheg, fanoap nenebeheg, duruk mu esehe,” boukwag ulug, ap homi enobam atuk ale higitdoho wene fano on neg uruk kamek.

³⁰Allah en Aheime og-hesauk kwit, hit at omaliki ulug, enehaleroho henobahakeg, ne, “Fobik wundet-nenebik waruhu lit deg,” ulug, demdoho boukwag ulug, heneluge henobahakeg, disi mu, hit siag duruk fam Allah Aheime anyo enda siag am no ulug, duk fug.

³¹Henendaman nerim herim boruk kwit boureheg, henehumkwe het-bet eheg, nolok holok beheg, henolokdoho suahal eheg, seiale enebug siag on eheg, hinim wereg on henenda henerim boruk kahep ai on mundoho embeseruk kamek.

³² Embeselug, hinim nelaheg helaheg bolug, henenda sakoreg fam fanoap debeseruk kwit, Kristus disi anyo fam Allah en hit henesiag apeleg apdoho embesesi anyo hagdoho, hit hit siag duruk kahep anyo henapeleg apdoho embeseruk kamek.