Read Ninia Yali FILIPI 2 Bible Online

FILIPI 2 - Ninia Yali bible

FILIPI 2

¹Kristus hinim hundig mu, henenda aho ware henobahakeg, at henelaheg boruk kwit, henenda sako henobahakeg, Allah Aheime en[2] melal-henebeheg, hit neg henenda hundig boruk kwit fanoap debeseil laheg, duruk kam ale henepuk mu hauhup halug,

²an eke nim nahayeg humdoho hahuk en, hit airoho henenda misig debelug wereg lit, Kristus enda hundig henepuk anyo hag, henori hinim henenda hundig beheg, henenda sebereg lit, duruk ale misig wenggele folug deheg, duruk kamek.

³Hit di angge su angge duruk kwit, eke hwelahuk ulug deheg, “Leho nenobahaukwag,” ulug, deheg, ai re duk fug. Ite, henenda sebeleg lit, “An de sebeleg hag, nare ai along hag,” boruk kwit debeseruk kamek.

⁴Hit henemu domog neg wenggel-dauk kam fug. Ite, henori enobahet nim wenggelduk kamek.

⁵At Kristus Yesus enda wenggele folug disi anyo hag, hit higitdoho duruk kamek.

⁶At Kristus anyo re, Allah enda wereg ale hagdoho, Kristus enda higitdoho welatsi famen, “Allah ninim higitdoho deg ma,[3] airoho neg wereg laruhuk,” besi fug.

⁷Ite, at wereg latsi ale embesesireg, “Ap homi enamingming angge hag damin,” ulug, ap homi nit hag endag-atsi.

⁸Endag-atsireg, ap homi nit hag dil noruk kwit, enda sebele fahat-dauk kwit, “Allah enda bebag ale higitdoho neg duruk karuhukdeg, wararuhuk fano,” bolug, dil noruk katsireg, e salib anyo fam neg waratsi.

⁹Airoho disi mu, at Allah en mun emberimmu leho foruk kwit, di ap homi su ap homi mundoho enenuk sebeleg kweleg, At neg unuk mundoho leho fesi.

¹⁰ It boholma on mel, kwenangma on mel, kwenang apma[4] on mel, it mundoho Yesus unuk, ulug, at apma sebe ulug, mot-deheg,

¹¹ne, ap homi enenggul unuk domog abirangge nenakni Allah unuk leg amag ulug, “Yesus Kristus ai re, nenowe Tuhan at,” ulug, hummen fag-deheg, dukwag ulug, leho fesi.

¹²Nori, nerekwi, hit an nenda hundig deg ma, wene eke hweag-hesa. At Allah en duruk ale enda boruk anyo, hiren, “Dimin,” boruk kahep nim, ebe duruk kahep inim, ai re, Allah en neg wenggel-hesauk mu, atam hit ninim etma wereg lit, an nele uruk ale higitdoho duruk katuhup hag, ketia nebe suma wereg kweleg, henahap wendat-dahup, ulug, henekol en henowag elek duruk kwit, henebiroho duruk kamek.

¹⁴ O suma it ap homi enebut kwasikdoho mun siag neg wenggelduk on, enenggelegma sohwalanggen dilel-walel angge duruk hag, hit airoho wereg lit, enele henobam fouk eleg angge, Allah omaliki henenda siag eleg angge mun fano neg dil noruk mu, hesowag ulug, hit di angge su angge duruk kwit, henele hape ale eheg, suahal eheg, duruk kam fug.

¹⁶At Kristus waruhu li em, “An buroho laheg, sehet-behet nabeheg, duruk kweleg, duruk katihik anyo re, we alemaroho dirihik fug. Eke hwelahuk ulug dirihik hihi,” bolug, nenda nahayeg hahuk ulug, wene neneluk nenepuk wene anyo, hit bug-bagdoho foroho lamek.

¹⁷Hit demdoho bolug henebe abirangge Allah og-utlug, at obahet dil noruk kahep anyo re, domba waroho Allah obahet og-utuk hag deg ma, eke nim dil noruk kamuhup en, henobahet duruk kweleg, domba wareg fam ahalue hililduk hag, an ketia nebe nowatuk halug, namep wilibuhu ai, “Wararuhuk fano,” bolug, nenda nahayeg boruk kahi mu, hit oho henenda henahayeg boruk kamek.

¹⁸An nenda nahayeg boruk kahi hag, hit higitdoho henenda henahayeg boruk kamuhup en, hweag-hisihi, nori, nerekwi.

¹⁹Hit nanggoho welahep anyo fu henobahalug, hweag-nirik wamuhup mu, noluk aruhukdeg, nenda we seroho welaruhuk en, Tuhan Yesus en nenda wenggel-napuk halug, Timotius folo-folo henekit mondorik waruhuk ulug, berihik.

²⁰It ap homi suma mundoho Yesus Kristus obahet duruk ale enerim boruk kwit, it enendomog ale neg wenggeldil noruk kweleg, famen, at Timotius en neg de, an ninim higitdeg lit, hit nanggoho welahep anyo wenggel-henepuk mu, at neg mondorik waruhuk.

²²Ap eke amloho en akni let-duruk hag, an Fano Wene hweag-isil noruk kweleg, hupmu hubet let-neauk katsi ai fam, at obabut henelukdeg ma,

²³nangginoho nobahakup anyo nawene balduk ale, noluk aruhukdeg neg de, folo-folo henakit mondorik waruhuk boruk kahi.

²⁴Ne, an oho folo-folo hesa waharuk ale nakni Allah en kwe hwaloho nobahaku demdoho boruk kahi famen,

²⁵owandeg kweleg nenda aho ware nobahaukwag ulug, ap eke aut inim weim higitdoho yapuk hag, Allah wene saha ukwag ulug, nambieg higitdoho duruk kahe on nare Epafroditus, hit mondorik waharuhup anyo henakit mondorik wahi ai.

²⁶At anyo en, “An ouk napsi ale nori mun holswa ma, it nanggoho boruk kweleg, welahi ha no esa la ane?” ulug, enda fituk mu, hauihikdeg, at atam henekit mondorik wahi ai.

²⁷At ouk waram hag demdoho disi famen, Allah elaheg boruk kwit fanoap debesi. At neg elaheg besi fug o. At ouk disi anyo fam an oho nenda eke nim anggindeg lit, wat-dauk kahi ha no ulug, nenda seroho welamag ulug, fanoap debesi.

²⁸Aireg ma at hesa waharuk halug, henenda henahayeg fam dangdoho wauk halug, an nenda firig welahi anyo, se atuk kwit, nenda nahayeg bohuk en, ulug, folo-folo henekit mondorik wahi ai.

²⁹Ne, hit an nabuhuk boruhup anyo obalma aren nabil waharuk kwit, “Kristus obahet dil lauk kwit, waratuk fano,” ulug, akol en ebe ili yig-dasi fug deg nea wahasi mu, ketia hit hesa waharuk ai, “Nenere Kristus inim hundig, nenesa waharuk su,” ulug, henenda henahayeg fam dangdoho wakiek. It ap aireg on hesa waharuk halug, dangdoho og-enepuk kamek.