Read Ninia Yali FILIPI 3 Bible Online

FILIPI 3 - Ninia Yali bible

FILIPI 3

¹Nori, nerekwi. “Tuhan hinim hundig wereg lit, henenda henahayegdoho welamek,” ulug, wene ambiangma hweag-hisihi ai. An atam lisu bal-hesauihik anyo hagdoho, fobik bal-hesauk ale nerim napuk en de fug. Ite, henahap wendaroho welamuhup en bal-hesa ale neg napuk.

²It olomene en hag siag neg duruk on omano henekit waharuk kwit, “Henahap baliek,” ulug, hweag-hesa wam no henenda furoho kahaleg lamek.

³“Airoho napswa,” ulug, nenenda ai fam dip-debelug, leho fouk fug angge wereg lit, Allah Aheime en nenendama hweag-nesauk kweleg, Allah mot-deheg, Kristus Yesus en nenepsi ale anyo leho feheg, duruk kahe ai, nenahap ebe demdoho baleg on nit.

⁴It foman, “Nebe airoho nobahausa,” ulug, ai fam enenda dip-debelug, winik-wonog uruk ai, dorangge debeseswa on fahet uruk. Ne, an neg de, alongdoho napswa ma, nenda enahap fam duruk on ai fam dip-debelug, leho fahat-dihi ha ale fano famen, ai en eke nabuhu fug mu, ulug, fotog-esauihik su.

⁵ An ondoho kweleg, hup ligin angge nahap balswa. Nebe ai Israel on famen, nunggul unuk ai re, Benyamin on. Ibrani demdoho on endag-atihik. Ne, Musa wene melaleg fi-furoho duruk on, Farisi on at welatihik.

⁶ Wene ai nenda hundig wereg lit, Yesus omaliki lal-faldoho enowatil noruk katihik. Fanoap daul, ulug, Musa wene higitdoho duruk on anyo, an oho higitdoho dil lauk katihik mu, ap homi enele eke nobam fouk fug angge welatihik.

⁷Ai fam fanoap damin ulug welatihik famen, ketia Kristus wene wauihikdeg, “Kristus en Allah il hanim fanoap nabikoho angge fahet, wene atam anyo re, alemaroho dil noruk katihik hihi,” ulug, fotog-esauihik.

⁸Ne, at Kristus Yesus noluk aruhu ai, mun along deg ma, di angge su angge duruk on, abirangge we alemaroho dil noruk kahi halereg hihi, boruk katihik deg, Musa wene higitdoho duruk katihik anyo fam fano dahuk ai re nerim. Ite, “Kristus demdoho boruk fam Allah en nit at il hanim fanoapdoho nenobaharuk on anyo mundoho hobaharihik mu, Kristus hinim henda hundig weregma hihi o,” ulug, hweag-nomag ulug, Kristus hwelauihikdeg, an di ale su ale duruk katihik anyo, abirangge su enambilik apuhuno hag hihi, ulug, fotog-esauihik.

¹⁰At Kristus anggin-fanggin hil-hil waratsi hag, an ninim higitdoho hil-hil wararuhuk boruk kahi. Aireg ma re, at waratsi mu Allah omamne fam olugap debesi hag, an airoho at wararuhuk mu, nolugap nobahaku, ulug, obam ebereg welahi.

¹²“An fano on mun hweleheg, nenda mun wirik aheg, atihik mu,” ulug, hweag-hesauk kahi re fug. Ite, Kristus Yesus en wirik-ap nabuhu, ulug, og-napsi anyo, “Ai hwelak lahuk,” ulug, nil lou-lou mutlug lauk kahi.

¹³Aren ai nabuhuk, ulug, momal-napsi anyo, “Mundoho napsi mu,” ulug, hweag-hesauk kahi re fug, nori nerekwi. Ite, an atam duruk katihik ale anyo, horoho nambolhan embeselug, keron nabuhu ale wenggeloho fesi on nalukwe fil wereg anyo, hwelak lahuk, ulug, duruk kwit,

¹⁴Kristus Yesus disi fam, at Allah ninim boholma welamag ulug, nenayonggo fesi anyo neg nil lou-lou buroho mutlug, lauk kahi.

¹⁵Nit nenenda wirik atsi on halug, ninim airoho neg buroho mutlug lauk kamul. Ne, hit foma airoho dul fug, boruk kahep halug, duruk kamuhup ulug, Allah en henebuhu mu,

¹⁶nit abirangge nenenda misig debelug, hwelak lahuk ulug, wene atam wauhuk anyo embeselug, nenambol somban lahuk, ai ousa. Ite, ebetuk kwit, mundoho mutlug lauk kamul.

¹⁷ Nori, nerekwi. It ap foma abirangge omano en, Kristus e salib fam waratsi wene wauk ale nenerim, ulug, enenda amu on wenggeldil noruk mu, Allah nim minggirig wereg, ulug, hupmu hubet hweag-hesauk kahi anyo, ketia eke nim oba yatuk kwit, hweag-hisihi. It ap ai airoho dil noruk mu, an duruk kahi hag hit higitdoho duruk kwit, hit henori henerekwi foman, nit duruk kahe anyo hag duruk hesalug, furoho neg fahat-enesug lamek.

¹⁹It ap ai en kwenangma on neg ebetuk kwit, enehum fahet neg leho feheg, enenggali aikoho angge fahet winik-wonog eheg, duruk mu, Allah en mun elehapdoho fesehu famen,

²⁰nit neg de, nenobam femma boholma wereg ma, etman nenowe raja nenahap wendatuk on Tuhan Yesus Kristus anyo, “Folo-folo walep aho!” ulug, nangno-hauk kahe.

²¹Wambik waharuk kwit, at omamne fam di angge su angge mundoho at apma welamag ulug, sebeloho fohu famen, nenahap siag filik atuk on su, hokdoho embeselug, obalma at ahap hag mun amu on keron anyo wan-nenobahaku.