Read Ninia Yali FILIPI 4 Bible Online

FILIPI 4 - Ninia Yali bible

FILIPI 4

¹Airoho duhu mu, nori, nerekwi, hit an nenda mun hundig on deg ma, nenda napuk e! Hit an nawonog aruhuk hagdoho welahep ma, hit fahet an nahayeg boruk kahi mu, Tuhan awene wauhupdeg dil lauk kahep ai, furoho neg dil lauk kamek.

²Hit homi Euodia Sintike hinim, Tuhan nim nenda hundig wereg lit, henenda misig sebereg welamag ulug, nele sakoroho hweag-hisihi.

³Ne, hat nare nambieg Allah eyabuk furoho duruk kahen ma, it homi ai, Fano Wene saha ukwag ulug, hundig hundig duruk katswa ma, let-esauk kamin. Ne, hun Klemen oho, it an nori nerekwi demdoho bousa on foma eneluk welamuhup, ulug, enenuk boholma buku fam baleg anyo mel, airoho ninim duruk katuhuk mu, let-esauk kamin.

⁴Tuhan hinim hundig lit, henenda henahayeg boruk kamek, ulug, birenam hweag-hisihi, nori, nerekwi.

⁵Tuhan waruhu mun horog atsi mu, it ap homi abirangge en, “Enenda fano fam ap homi fanoap debeseil noruk mu esehe,” ulug, boukwag ulug, duruk kamek.

⁶Anggin eke henobam atuk halug, henenda firig welam fug. Ite, anggin airoho nobam aha, ulug, somban eheg, henengge eke eleg halug, og-hesowag ulug, Allah dang-duruk kwit, heng-deheg, duruk kamek.

⁷Henenda firig eleg angge seroho welamag ulug, henobaharuk on indip enameg hauk kahep fug kweleg, nenobahakeg neg duruk on Allah anyo en, Kristus Yesus hinim hundig mu, henenda furoho fahat-henesug laruhu.

⁸Nori, nerekwi. Wene ambiangma misig neg su hweag-hesa. Hit henendaman wene leho on mel, mot-duruk on mel, wenggelduk kwit ai, demdoho on mel, along boruk on mel dipdoho duruk on mel, ibi-ebe on mel neg wenggel-hauk kamek.

⁹An wene hweag-hesauk kweleg, wauk katuhup inim, uruk kweleg, henesanggo holduk katuhup inim, duruk kweleg, hinil neauk katuhup nim, anyo mundoho dil lauk kamek. Ai abirangge dil lauk hesalug, henenda we seroho welamuhup en, henobaharuk on Allah anyo en, fahat-henesug laruhu.

¹⁰Atam nobam henenda ebet-nabuk fug angge welatuhup famen, ketia neg henenda nobam ebet-napuk mu, hesauihikdeg, Tuhan Yesus ninim hundig lit, nenda nahayeg boruk kahi. Atam we nobam ebereg welatuhup famen, let-napuk ale horog atuk eleg en, ulug, welatuhup mu, ulug, hweag-hisihi, nori, nerekwi.

¹¹An di ale su ale nobam atuk kweleg, nenda mun seroho wereg ale noluk atihik mu, an nangge eleg kweleg, “Eke og-nom angge famen, dehesa ahi!” ulug, hweag-hesauk kahi fug.

¹²An nangge eleg halug, wereg halug, ai an nolukdeg. An siburu obok nabeheg, homo-nabeheg, duruk ale nolukdeg neg. Ne, nangge eleg aheg, wereg aheg, duruk ale ai oho an noluk neg. Fano ale siag ale nobam atuk kweleg, nenda seroho wereg ale noluk atsi.

¹³Kristus ninim hundig wereg lit, omamne napuk kweleg, di ale su ale mun fano duk ale atuk mu hauk kahi.

¹⁴Fano duk ale atuk mu hauk kahi famen, an anggin nobam atsi mu, hiren let-neauhup mu, fano uruk kahi.

¹⁵ Hit, nori, nerekwi, Filipi on su yei. An atam Fano Wene di o su o hweag-isil noruk karuhuk ulug, o Makedonia embeselug, o amumu lauk kweleg, Yesus omaliki halug ai let-let duruk kahe famen, it foma bok atswa man, hit Yesus omaliki kabogdeg jemaat o Filipi on en neg let-neauhup anyo heneluk o.

¹⁶ An o Tesalonika wereg lit anggoloreg li hiren atam let-napuhupdeg eke fobik oho let-napuhup anyo, ebereg lit welahi.

¹⁷Henangge eke og-nomag ulug, heng-henepuk eleg kweleg, og-nutuhup mu, we hwelauihik anyo, Allah en fobik onggo humon og-hesowag ulug, e anggen yihil lauk hag, hit airoho anggen humon yig-dauk mu, hesahuk ulug, hwelauihik.

¹⁸ Hiren mon-nabik waharuhup anyo, dindikdoho wauihik. Ne, Allah obahet foruk on indok yalduk mu amben fano halug, Allah en, “Fano og-nerehesa,” ulug, enda ahayeg boruk hag, hit an nobahet foruhup on, ap Epafroditus en og-nomag ulug, mondorik waharuhup anyo, walug og-nirik wahasi mu, hwelauihik deg, hweag-hisihi.

¹⁹Allah an den apne wauk kahi on anyo enggik wereg on deg ma, angge bulel-baleldoho og-nesauk on anyo en, Kristus Yesus fam hit anggolo angge higitdoho og-hesauk karuhu.

²⁰Aireg ma, “Nenakni Allah unuk mundoho mundoho leho foruk kamuhuk,” ulug, demdoho hweag-hisihi. Amin.

²¹An nori ninim suma wereg on anyo en, hit demdoho boruhup on Allah omaliki, Kristus Yesus hinim henenda hundig welahep anyo, abirangge dang-henebehe.

²²Ne, Allah omaliki o suma wereg anyo, ap kain on Kaisar omaliki anyo mel, mundoho en dang-henebehe.

²³Tuhan Yesus Kristus henelaheg boruk mu, fahat-henesug laruhu. An Paulus Timotius ninim en mundoho hweag-hesehe. Nori, nerekwi e!