Read Ninia Yali KOLOSE 2 Bible Online

KOLOSE 2 - Ninia Yali bible

KOLOSE 2

¹It Laodikia on nim, it foma an nebe enapeleg on nim, hinim abirangge fano neg duruk kamuhup ulug, anggindeg kweleg famen, henobahet hundig hundig duruk kahi anyo, heneluk amuhup en, ulug, hweag-hisihi.

²Hit abirangge henenda misig atlug, nenda henda hundig duruk kwit, Allah wene herahoma herako welatsi anyo, Kristus at deg ma, at ebe furoho heneluk amuhupdeg, ap enggik wereg on siburu sono nahuk on olukdeg lit, enda seroho wereg hag, hit oho fobik henebuhu ale mun henelukdeg ma, henakol en henenda somban deheg duk fug angge henahayegdoho welamag ulug, henobahet somban uruk kahi.

³Allah enda wereg ale inim, aren di angge su angge olukdeg ale inim, atam heraho welatfag anyo, nenoluk amag ulug, Kristus en neg[3] mundoho ename foruk.

⁴It ap homi enele ahalue ik dep-dep il lauk kwit, kwani-heneplug, kwe amu on fam lauk kam no wene su hweag-hesauk kahi.

⁵An nebe hit ninim etma welahe eleg famen, nenda neg de, hinim etma wereg lit, hit henenda Kristus obam dip-debelug demdoho boruhup anyo bugdoho foroho lit, mun higit-higit dil lauk kamuhup ulug, an nenda mun nahayeg boruk kahi.

⁶Hit atam en Kristus Yesus ai re, “Nit nenowe Tuhan at o,” ulug, wauhup mu, ketia henebe at hinim hundig wereg lit, hweag-hesauk anyo hole folug mun higitdoho dil lauk kamek.

⁷E omanggen kwenangma hambukdoho yaho lit, mun sipuk-dil laharuk hag, hit airoho Kristus fam henomanggen yaho lit, henenda wirik aheg, ne, o anduli omamneroho belabeg ma fano wereg anyo hag, Kristus fam demdoho boruhup anyo bugdoho foroho lit, welamuhup ulug hweag-hesausa anyo, higitdoho foroho welaheg, duruk kwit, henenda mun ahanhan nget-nget lahaik waharuk fam, Allah dang-duruk kamek.

⁸It ap homi ak debeseruk ale eleg kweleg, we lal-nenebukoho lit, enenda wenggeloho hweag-nesauk anyo re, Kristus wene re fug. Ai it enombasi nim mungguat along boruk on anyo mel, enele melaleg at il noruk mu, it enapma wereg lit, enele neg holduk kamuhup ulug, hit lal-henebuk no kahaleg lamek.

⁹At Allah ebe eitog lik-loukdoho wereg anyo ebe abirangge Kristus obam loukdeg lit, ap hag endag-atsireg, noruk katsi.

¹⁰Ne, hit Kristus hinim, hundig welahep ma, at Allah ebe lik-loukdoho wereg anyo, hit oho henobam lik-loukdoho henobahasi mu welahep ma, amu on eke henebuhu mun eleg. Ne, it di mungguat su mungguat en enapma ap homi feseheg, melal-enebeheg duhuk ulug dil noruk on anyo abirangge Kristus apma wereg lit, at ele neg holduk.

¹¹Ne, at Kristus hinim hundig wereg lit, henahap baloho henobahasi mu hag welahep. Ai disi ai re, it ap homi en henepswa fug. Ite, ap homi enahap baloho feseruk hag, hit siag duk ale neg henepuk indip anyo, fobik siag duk ale henebuk no ulug, at Kristus en mun omamne elehapdoho sebele fesi mu, ulug, hweag-hisihi.

¹² Kristus hinim hundig wereg lit, waratlug owikmu kwelapuk men, hinim heneluk apdoho unduhuk henobahasi demdoho bolug, ikma wamburuhupdeg, lahaik waharuhup anyo. Ne, hit waratlug owikmu feserukmu hag wereg ma, Allah en Kristus waratuk men, at omamne fam oluk apdoho unduhuk fesi anyo, demdoho boruhup ai fam, at ninim neneluk apdoho unduhuk nenobahasi boruk kamek.

¹³ Hit atam wene diroho diyug airoho diyug melaleg anyo henapeleg ma, ap homi dagma henahap baleg eleg on wereg lit, di siag su siag dil noruk fam wareg hag welatuhup famen, Allah ele sahaloho folug, siag dil noruk kweleg, Allah en, “Siag onggo airoho debesehuk,” ulug, enggik wenako lisu balfag anggin henobam welatsi anyo, “Mun embesemin,” ulug, lisu baleg anyo, Kristus inim, e salib fam dopnoroho folug, nenesiag abirangge elehapdoho fesireg, Kristus hinim heneluk apdoho unduhuk henobahasi.

¹⁵Ai disi ai re, it weim yapuk katlug, waharuk kwit, “Nit nenesehen along aha,” ulug, yande-enebukwag ulug, ap homi enebe huhul og-eneplug waharuk hag, at Kristus en, “An nasehen along ahi neowag,” ulug, at Iblis nim, at autsi mungguat inim, abirangge aren enomamne elehapdoho folug,[4] enenggali amag ulug, enebe o bul suma og-eneplug lasi.

¹⁶ Aireg, ma nori, nerekwi. Hit di angge su angge nenggeg, soni esereheg, dugwi eke enam atuk halug, esereheg, somban salim hari Sabat fam eke deheg, duruk kwit halug, it enenda wenggele folug, “Eke su siag deg kweleg dehep,” ulug, “Hweag-nesowag,” bohup fug.

¹⁷Ai duruk anyo re, fobik ebe nenebuhu en we ilirangge hag duruk katswa anyo, ebe mundoho nenepsi famen duruk mu, leho fouk fug. Ite, ketia nenenda nenahayeg nenebuhu on ebe anyo re, Kristus deg ma, at neg leho foruk kamek.

¹⁸It ap homi kwenangma on neg enenda wenggeldil lauk on anyo en, it ap along on eleg kweleg, enendan leho fahat-dauk kwit, “Na fam wene hweag-nutuk mu, an along,” ulug, enele omamne fam, “Malaikat mot-duruk kamek,” ulug, hweag-heseheg, ne, enenda sebeleg noruk boukwag ulug, enekol beil laheg, dil noruk anyo, hit fureberuk halug, Allah og-hesahuk ulug enda ahayeg boruk anyo elehapdoho fahat-dehep ha no, enele holduk kam fug.

¹⁹ Nenomanggen misig fam nenenggik neneyog munangge manangge mundoho nenenggul fam kindi-fundireg lit, nenebe sauwe atuk kahe hag, nit nenenggul Kristus ninim airoho hundig mu, at Allah en Kristus ebe wirik amag bolug, nenepuk anyo wereg kweleg, it ap ai enenda winik-wonog uruk kwit, enenggul Kristus anyo fotog-esalug, inim hundig eleg hesangge noruk mu, enele holduk kam fug.

²⁰Hit Kristus hinim hundig lit waratuhup mu, di mungguat su mungguat mot-enepuk kwit, enele holduk katuhup anyo sebele feselug, wundetdoho henobahasi famen, nunggwelug it ap su mungguat mot-duruk on etma higitdoho dauk kahep?

²¹It ap ai en uruk kwit, “Di bal-hahup ousa. Su nahup ousa. Ai sen-hahup ousa,” ulug, hweag-hesauk anyo re, nunggwelug, “Su demdoho hweag-nesauk,” ulug, enele holduk kahep?

²²“Ai nahup ousa,” hweag-hesauk anyo nalug, eleg atuk on famen, nunggwe ulug hweag-hesauk? It il noruk anyo re, ap homi enenda wenggele folug, “Di diyug su diyug,” ulug, wene melaleg at hweag-hesauk mu,

²³enele omamne fam “malaikat mot-duruk kamek,” ulug, hweag-heseheg, enenda sebeleg lit, noruk, boukwag en, enekol beil laheg, ne, ap su along boukwag ulug, enahap fam ouk-boukdoho fahat-deheg, dil noruk halug, “Su enenda wereg on en duruk,” bohup famen, wene ai duruk fam, henenda nauk on[5] mutlug la ale henepuk anyo re, sebeloho fouk ale henebuhu fug angge re, mutlug lauk kam fug.