Read Ninia Yali KOLOSE 3 Bible Online

KOLOSE 3 - Ninia Yali bible

KOLOSE 3

¹ Kristus oluk apdoho unduhuk foruk kwit, hinim heneluk apdoho unduhuk henobahasi mu, at Kristus akni Allah enggik bekit fil hwerieg weregma etma on fahet hwelahuk ulug, henenda dip-debelug welamek.

²Hit mundoho waratuhup mu, Allah en heneluk apdoho henobahasireg, Kristus hinim endama heraho henobahasi mu, henenda kwenangma angge fam neg dip-debelug, welam fug. Ite, henenda etlema on fam neg dip-debelug welamek.

⁴At nenelugap nenepuk indip Kristus anyo enam aik waharuk li em, at boholma leho weregma hinim enam amuhupdeg, hinim leho welamuhup.

⁵Aireg ma, nori nerekwi. Hit Allah wene sahaloho folug, homi hesangge enebil laheg, henenda homi fam neg dipdeg lit laheg, henenda nauk on anyo neg mutlug laheg, siag duruk ale neg henenda bolug deheg,[6] Allah obalma, “Di angge su angge hwelale e,” beil laheg, dil noruk mu hesalug, Allah olok henobam henobahaku angge re, ai duk ale henepuk anyo mun sebeloho foruk kamek.

⁷Hit atam siag on apma wereg lit, ai on abirangge henenda nauk fam dil lauk katuhup famen,

⁸ketia nolok holok beheg, nerim herim beheg, siahap debeseruk ale wenggeleheg, siahap biahapdoho feseheg, wene uk fug on famen, deg kweleg hweag-eseheg, duruk kahep ai re, nunggwe ulug duruk kahep? Ai on mundoho embeseiyek.

⁹ Nit nenenda ket buhun-duruk on Allah anyo en, at duruk ale heneluk amuhup ulug, at enda hag hit henenda ket buhundoho henobaharuk kweleg, hit henobabut endam on fam siag duruk katuhup anyo, horoho embeselug, henebut keron wan-dauhup mu, hit hit seiale uruk ale re ousa.

¹¹Nit nenenda ket buhundoho nenobaharuk anyo fam dil lauk kwit, “Su Yahudi on, su Yunani on, su enahap baleg on, su enahap baleg eleg on, su ap homi bohon, su ap enobabut hwaleg eleg on, su ap unuk wereg on, su unuk eleg on,” ulug, airoho ehe ha fug alereg. Di angge su angge inim, di ap homi su ap homi mundoho inim, nenowe Kristus at neg deg ma, nenebe abirangge at ninim hundig welahe.

¹² Aireg ma, at Allah en henelaheg boruk kwit, at omaliki siag duk eleg angge eneg welamuhup ulug, momal-henepsireg, eneko henobahasi mu, henebut keron wauk kwit, ap homi enelaheg beheg, henenda sakoreg fam, fanoap debeseheg, henenda sebeleg lit, noruk kaheg, henele omamne eleg angge lombukdoho hweag-eseheg, enele henobam henobaharuk halug, furebelug, hweag-eseheg,

¹³ duruk kwit, at eke en siahap henepuk halug, fetagdoho debouk fug angge wereg lit, asiag henapeleg apdoho feheg duruk kamek. Hit henere eke en siahap henobaharuk halug, Tuhan en hit henesiag mun apeleg apdoho fesi anyo hag, hit airoho at siahap henepuk anyo asiag henapeleg apdoho embeseruk kamek.

¹⁴Hweag-hisihi ai abirangge dil noruk kwit, nenenda hundig boruk kwit neg, nenenda misig mun sebereg welam alereg ma, henenda misig sebereg neg welamuhup en, henenda hundig boruk kamek.

¹⁵At Allah en Kristus disi fam nit at ebe misig fam hundig lit, nenenda misig sebereg neg welamag ulug, neneyonggo fesi mu, hiren di ale su ale duhuk ulug wenggelduk kwit, “Nenenda misig sebereg welamul en neg duruk kamuhuk,” ulug, wenggelduk kwit, Allah dang-duruk kamek.

¹⁶ Kristus en uruk katsi wene abirangge henendama mun ele sopdoho wauk kamek. Wahupdeg, henenda wereg atlug, wene hweag-eseheg, henenda aho wat-wat aheg, duruk kwit, Allah debag ale furebelug felaleg suni mazmur inim, Yesus disi fam mot-duruk suni inim, Allah Aheime en hweag-esauk kweleg felalduk suni inim, abirangge il noruk kwit, Allah dang-duruk kamek.

¹⁷Kristus henelaheg en henobahet duruk mu, henakni Allah dang-duruk kwit, henele uruk kahep fam inim, dil noruk kahep fam inim, mundoho Tuhan Yesus unuk leg amag ulug, neg duruk kamek.

¹⁸ Hit homi su yei. Hit Yesus omaliki deg ma, henehunsi enapma wereg lit, enele holduk kamek.

¹⁹ Hit ap su yei. Henohwesi henenda enepuk kwit, henele sakoroho hweag-esauk kamek.

²⁰ Hit ap omalik on hwelani omalik on su yei. Hit Yesus omaliki deg ma, henakni Allah enda ahayeg boukwag ulug, henaknisi henisingasi enele furoho hole folug hundig-hundig duruk kamek.

²¹ Hit henomaliki henehwelani wereg on halug, enenda wat-dauk kwit, enolok am no ulug, henele haperoho komo-enebeheg, duhup ousa.

²² Hit ap homi enamingming angge welahep halug, henaknisi enahayeg howag ulug, inil hanim neg fano duhup ai ousa. Ite, Tuhan apma wereg lit, it hweag-hesauk on ai, “Yu o,” ulug, hwenaroho fug, henenda demdoho fam enobahet duruk kamek.

²³Di angge su angge mundoho dil noruk kwit, “Su ap homi enobahet fug. Su Tuhan obahet duruk kahe,” ulug, henenda ahanhan fam furoho enobahet duruk kamek.

²⁴Enobahet duruk kwit, “Nit Tuhan neg obahet duruk kahe ma, aren at omaliki og-esahuk ulug enobahet fik-foukdoho fesi anyo, og-nesahu,” ulug, ebetuk nu.

²⁵ Allah en, “Ap eke along, ap eke maben,” ulug, boruk eleg. Ite nit duruk onggo higitdoho og-nesahu mu, it ap homi siag duruk halug, onggo higitdoho og-esahu.