Read Ninia Yali KOLOSE 4 Bible Online

KOLOSE 4 - Ninia Yali bible

KOLOSE 4

¹ Ne, hit naknisi yei. Henamingming angge wereg halug, An oho nakni boholma wereg hihi, ulug, boruk kwit, it henemingming angge en henobahet duruk higitdoho henenda fano fam debeseruk kamek.

²Hupmu hubet kungguk duk fug angge somban neg uruk kwit, Allah dang-duruk kamek.

³Somban uruk kwit, at Kristus awene heraho welatfag anyo, hweag-esauk katihik fam sabu het-napswa ma, suma welahi mu, nakol eleg lit, fagdoho hweag-esauk ale, Allah en kwe hwaloho nobahakeg, ne, hweag-esauk kweleg, ap homi en, “Su demdoho hweag-nesauk mu, hauk kahe,” bolug, weheg, nenepuk kamag ulug, Timotius nambieg nenobahet somban uruk kamek.

⁵ It ap homi demdoho boruk eleg on inim, dil noruk kwit, “Allah demdoho boukwag ulug, wene hweag-esauk ale iyale aha,” ulug, henenda mun hambuk debelug, dil noruk kamek.

⁶Di ap homi su ap homi enele hweag-hesa waharuk halug, onggo hweag-esauk kwit, yerum unduk fano amag ulug, mayu folduk hag, hit airoho henele asig eleg angge enelaheg boruk kwit, sakoroho hweag-esauk nu.

⁷ At nenere Tikhikus, ninim nenenda hundig deg ma, Tuhan amingming angge wereg lit, furoho duruk on anyo en, an suma duruk kahi ale anyo abirangge hweag-hesa waruhu.

⁸Henelugap henobahaukwag ulug, henekit monde feik waruhuk mu, waharuk kwit, nit abit nenebe keroho welahe anyo hweag-heseheg, ne, henenda hambugap henobahakeg, dik waruhu.

⁹ At Tikhikus anyo hesa waharuk kwit, henaut Onesimus mel, nenenda hundig deg ma, Kristus wene mun furoho mutlug lauk anyo, inim mon-enebik waruhuk mu wamuhupdeg, nit suma wereg kweleg, nenepuk ale anyo, bilinggoho hweag-hesa wamuhup.

¹⁰ At nenere Aristarkhus sabu hetdeg nambieg suma welahe anyo en, dang-henepuk. Ne, ap Barnabas are unuk Markus mel en, dang-henepuk kahe. At Markus disi ale hweag-hesauihik anyo famen, hesa waharuk halug, dangdoho ebe wauk kamuk. Ne, at Yustus unuk eke Yesus anyo en oho dang-henepuk. It ap henahan ai enahap baleg on famen, Allah apma fesehu wene ninim higitdoho dil noruk kwit, nenda nikdoho aho ware nobahausa ma, hweag-hisihi.

¹² Ne, at henare Epafras nim en dang-henepuk. At Kristus Yesus angge deg ma, hit demdoho boruhup anyo mun bugdoho foroho lit, henenda wirik aheg, ne, Allah en nit duhup besi anyo su, ulug, demdoho boruk kwit, dil laheg, duruk mu, hesahuk ulug, elahegdoho wereg lit, henobahet somban uruk.

¹³It ap homi o Laodikia on nim, o Hierapolis on mel, hinim, henobahakuk ulug, enenda henobam ebereg wereg ma esauk kahi.

¹⁴ Ne, at Lukas ap dokter nenenda hundig on anyo inim, ap Demas anyo mel en oho dang-henebehesa.

¹⁵Ne, nenori Yesus omaliki o Laodikia on mel, hwe Nimfa Yesus omaliki at obam kabog-duruk on anyo mel, Paulus ori mel en, dang-henepuk.

¹⁶Lisu baleg su hit dam kumu hahupdeg, it Yesus omaliki o Laodikia kabogdeg on anyo kumu howag ulug, monde feik manu o. Ne, hit atam kumu hahupdeg, it Yesus omaliki o Kolose wereg anyo kumu howag ulug, monde feseiyug, ulug, hweag-esauihik mu, ai nim kumu hahup.

¹⁷ Ne, ap Arkhipus anyo hweag-utuk kwit, “Tuhan en unduhuk hobahasi anyo higitdoho duruk karuhun en, fureberuk kamin,” ulug, hweag-umuk.

¹⁸Yehei, nori, nerekwi. An sabu hetdoho suma welahi anyo nobahet ebet-napuk kamek o. An henakni Paulus en, hit nomaliki abirangge dang-henebihi, ulug, lisu ambiangma dia nenggik fam bal-hisihi, nori nerekwi.