Read Ninia Yali 1 TESALONIKA 1 Bible Online

1 TESALONIKA 1 - Ninia Yali bible

1 TESALONIKA 1

¹ Nori, nerekwi. Hit Yesus omaliki o Tesalonika kabogdeg welahep anyo nit wene eke hweag-hesak. Hit nenakni Allah, nenowe Tuhan Yesus Kristus hinim hundig lit, Allah omaliki atuhupdeg kabog-duruk kahep on anyo, an Paulus inim, Silas inim, Timotius inim en Allah enda hundig en og-heseheg, henenda seroho fano welamuhup ulug, henobahakeg, duruk kamag ulug, hweag-hesehe.

²Nit somban uruk kwit, hit mundoho henobahet hundig hundig Allah dang-duruk kahe.

³Hit demdoho bolug dil laheg, ap homi enelaheg en fanoap debeseil lauk kwit, asingsing basingsingdoho henobahakeg, ne, Tuhan Yesus Kristus obam dipdeg lit, nenebuhu on henenda hambukdoho ebereheg, duruk kahep ale ai fahet Allah hweag-utuk kahe.

⁴Nori, nerekwi. Allah enda hundig henepuk kwit, ak-henepsi ai, nenoluk.

⁵Niren Fano Wene hweag-hesa waharuhuk anyo re, nit nenele fam neg de fug, ite, Allah Aheime en nenepuk kweleg, along on deheg, “Wene su demdoho on,” ulug, fureberuhukdeg, hweag-heseheg, duruk katuhuk. Hit henobahet nit henenggelegma wereg lit, keroho dil noruk katuhuk ai, henolukdeg.

⁶ Nit Tuhan ninim duruk kahe ale nenowal-heheg, duruk katuhup. Anggin-fanggin henobam atuk mu, wene anyo Allah Aheime ahayeg henendama henepuk kweleg, wauk katuhup.

⁷Airoho duruk katuhup mu, it ap homi Yesus demdoho boruk on o Makedonia on inim, o Akhaya inim, mundoho hit henebut wal-heheg duruk.

⁸Indip hit duruhup fam Tuhan awene anyo o Makedonia inim, o Akhaya inim, etma neg saha il lasi fug. Ite, di o su o mundoho hit Allah demdoho boruhup wene saha il lasi mu, niren ekenim ehe ha fug alereg.

⁹Nit henesa waharuhuk mu, og-nenepuhup ale inim, kembu mot-duruk katuhup anyo embeselug, Allah oluk demdoho wereg on anyo mutlug noruk kamuhuk ulug ak-dauhup ale inim,

¹⁰ne, at Amloho Yesus boholman wambik waruhu en, nangno-hauk kahep ale inim, mundoho nit ninil hanim uruk mu, holduk kahe. At Amloho Yesus ai, waratukmen Allah en oluk apdoho unduhuk fesi on anyo en, fobik Allah olok en nit siahap nenebuk no ulug, Yesus en nenahap wendat-nenepuk.