Read Ninia Yali 1 TESALONIKA 2 Bible Online

1 TESALONIKA 2 - Ninia Yali bible

1 TESALONIKA 2

¹Nori, nerekwi. Nit henesa waharuhuk anyo re, alemaroho waharuhuk fug, hit mun henolukdeg.

² Nit owan o Filipi wereg kweleg, nenobam anggin fanggindoho nenobahakeg, siahap biahapdoho nenobahakeg, duswa ale henoluk anyo famen, deg kweleg it humdoho Allah wene Fano Wene, “Nenerim,” ulug, duruk kweleg, Allah ninim hundig wereg ma, nenakol bouk fug angge hweag-hesauk kamag ulug Allah en nenambong seap nenepuk katsi.

³Nit komo-henepuk kwit, hweag-hesauk katuhuk anyo, nit nenapelegdeg lit, hweag-heseheg, nit eke hwelaul ulug hweag-heseheg, lal-henepul ulug, seiale wene hweag-heseheg, duruhuk fug.

⁴At Allah en nenebut bale folug, “Iren Fano Wene hwalduk kam alereg,” ulug, nenepsi higitdoho neg hweag-hesauk kahe. Hit henahayeg howag ulug, hweag-hesauk kahe fug. Ite, at Allah en nenobabut bal-nenepuk on anyo ahayeg howag ulug hweag-hesauk kahe.

⁵Nenele ahalue dep-dep hweag-hesauk kwit, hinil omandoho henengge hwelaul ulug, duruk katuhuk fug anyo henoluk. Allah en oho il nesasi.

⁶Ne, Kristus ayonggo rasul unduhuk nenobahasi mu, nenele omamne fam heng-henebehe ha fano famen, hit inim, it ap homi amu on inim, nit nenunuk mot-nenebukwag ulug, waharuhuk eleg neg.

⁷Hwe eke at omalik elaheg en aleloho foroho wereg hag,[1] nit henenggelegma wereg lit, airoho henepuk kwit welatuhuk.

⁸Hit nenenda hundig henepuk kwit, hit nenenda hundig mundoho on atuhuk mu, Fano Wene neg hweag-hesaul boruhuk eleg, ite, henobahet waramuhuk neg de fano boruhuk.

⁹Nori, nerekwi. Airoho neg dil noruk kwit, asingsing basingsingdoho hauk katuhuk anyo henenda eberiek. Allah wene Fano Wene anyo hweag-hesauk kwit, hit neg sehet henobam henobahake ha no ulug, foma nenonggwareg en nukoho et hubanggo et dobahat-dil lauk katuhuk anyo.

¹⁰Nit, hit Yesus demdoho boruhup on henenggelegma wereg lit, Allah wene furebelug deheg, ne, siag duk fug angge, fano neg duruhuk fam henele eke nenobam fouk fug angge welaheg, dil lauhuk ai, Allah oho, hit oho, mun nesauhup.

¹¹Hit Allah apma kulug, Allah mot-duruk kwit welamuhup en henayonggo fesi on anyo at enda boruk ale neg higitdoho duruk kamuhup en, ulug, niren enaknisi en enomaliki komo-enepuk hag henemu hundomog komo-henebeheg, henenda aho ware henobahakeg, melale henobahakeg, duruk katuhuk anyo hit henoluk.

¹³Aireg ma, Allah wene hweag-hesauhuk mu, holduk kwit, “Su we ap homi enele fug. Ite, su Allah en wene demdoho wene hweag-nesauk,” bolug, wauhup mu, nit bok am fug angge hundig-hundig Allah dang-duruk kahe. Ne, at Allah en hit Yesus demdoho boruhup on henendama henepuk ai.

¹⁴ Nori, nerekwi. It Yesus omaliki at Kristus Yesus inim hundig lit, jemaat Allah anyo o Yudea etma kabog-duruk on enonggwareg enori Yahudi on en di anggin su anggin enepuk katswa hag, hit henori on en di anggin su anggin henepuk ai.

¹⁵ It ap Yahudi on en it ap atam Allah wene hweag-esauk katfag on nabi omano enowareheg, Tuhan Yesus waroho feheg, duswa hag, nit anggin-fanggin nenepuk ai Allah en, “Fano,” ulug, boruk eleg. Ap homi mundoho eneselei on boruk kwit,

¹⁶Allah en it ap homi dagma on enahap wendarukwag ulug, niren Fano Wene hweag-isil lauk mu, ap homi kwe bal-enepuk hag, it ap Yahudi on en, “Wene Fano Wene ai hweag-esahup fug,” ulug, suahal uruk ai. Airoho duruk kwit, hundig-hundig siag duruk on obam loukdoho duruk ai en, Allah olok humon enobam fesi.

¹⁷Nori, nerekwi. Niren de hit henemu henobahalug waharuhukdeg, ketia elamna fahet nenebe yatdoho welahe famen de, nenenda hit ninim misigmu welahe hag ai. Airoho wereg lit de, “Enorohole ninil hesa lela e!” ulug, endam et angge nenenda nenepuk mu wereg lit, henekit wamuhuk ulug, wal-hauk kahe.

¹⁸Wal-hauk kwit de, an Paulus nonggwareg atam waruhuk ulug wal-heheg, fobik waruhuk ulug, wal-heheg, dirihik famen de, Iblis en kwe bale nobahasi mu, bok atihik.

¹⁹Niren de, “Fano aruhu,” ulug, nenendama nenahayeg boruk kahe ai re, sa mel fahet no? Tuhan Yesus ebe waruhureg, “Fano duruhup,” ulug, at il hanim eneko nenobahaku mu, nenawonog amuhuk ai, indip de ke famen no? Indip amu on fahet de fug. Hit henebe henobahet nenalong amuhuk.

²⁰Nenahayeg heheg, nenawonog heheg, uruk kahe ai, hit henebe fahet at.